1509 NO LU RİZE ŞERİYYE SİCİLİNİN TRANSKRİPSİYONU - 2 - VI Yazdır e-Posta
Aded 146 B: Tonik karyesi
Der-i devlet mekine arz-ı dai kemineleridir Trabzon vilayeti dâhilinde kâin Lazistan Sancağı’nın merkezi olan Rize kazası nevâhîsinden Karadere nahiyesinin Tonik karyesinden Yetimoğlu Osman Çavuş bin Osman ve Öksüzoğlu Durali bin Osman ve Eloğlu Edhem bin İslâm ve Yetimoğlu Dursun bin Hacı Hüseyin ve Yetimoğlu Hasan bin Ömer ve Yetimoğlu Murad bin Ahmed ve Yetimoğlu Ali bin İsmail ve Yetimoğlu Yaşar bin Yehuza vesair ceride-i şer’iyede mazbutu’l-esami müslimin bi ecmaihim liva-i mezkûr hükümet konağında münakid meclis-i şer’i meali-i ukudda her biri takrir-i kelâm ve tabir-i ani’l-merâm idub ahalisi bulunduğumuz mezkûr Tonik karyesi ve civarında vâki karyelerde salât-i Cuma ve ideyn eda olunur cami-i şerif olmadığından eyyam-i şita ve metarde salât-i Cuma ve ideyn eda etmekte diğer karyelere azimet ve avdet hususunda düçar-i usret ve içimizde ihtiyarlarımız meşakkat çekmekte olmalarıyla karyemizde vâki cami-i şerif ahali-i karyeye gayr-i vasi olub ikame-i salât-i Cuma ve ideyni edaya eşed ihtiyac ile muhtac olmamızla karyemiz kebire ve ahalisi kesire mısr hükmünde olduğuna binaen mescid-i şerif-i mezkûre minber vaz’ıyla salât-ı cuma ve ideyn eda ve îfâ olunmak ve hitabeti dahi işbu mahkeme-i şer’iyeden tanzîm olunan bir kıta vakfiye ciheti mantukunca mezkûr Tolun karyesinden İslâmoğlu Hafız Yusuf Efendi ibn Mustafa’nın ber nehc-i şer’i vakf-ı lazım ile vakfeylediği bin kuruşun ğalle ve nemasının vazife-i tahsisiyle işbu hazır bi’l-meclis cümlemizin muhtar ve müntehabı olan vâkıf-ı muma ileyh Hafız Yusuf Efendi dailerine tevcih ve izin ve icazeti hâvî ferman-ı âli sudur-i niyazında olduğumuz der-i devlet medara arz olunmak matlubumuzdur deyu istid’â eylediklerinde hakikat-i hal ahali-i mezbûrunun takrir-i meşruhları üzere bulunduğu bi ğaraz-i erbab-ı vukuf haberleriyle zâhir olduğu gibi mezkûr Tolun karyesinin onüçüncü hanesinin üçüncü numarasında mukayyed ve binüçyüz senesinde tevellüd edub kura ve bakaya firarisi olmadığı ve nüfus memuru ve mensub olduğu redif taburu zabıtani taraflarından mevrud künye pusulası ve mazbata meallerinden müstebân olan işbu baisu’l-arz muma ileyh Hafız Yusuf Efendi’nin usul-i müttehize-i ahire mucebince imtihan komisyonu huzurunda vâki olan ilan üzerine tayin olunan günde muma ileyhden başka kimesne müracaat etmediğine mebni tarifat-ı kanuniyesi vecihle mezkûr hitabet cihetine ehliyeti lede’l-imtihan dahi sabit ve zâhir olmağla cami-i şerif-i mezkûre minber vaz’ıyla salât-i Cuma ve ideyni edaya izn-i hümayun mülükâne erzan ve hitabeti vazife-i mezkûre ile muma ileyh Hafız Yusuf Efendi dailerine tevcihe ve yedine müceddeden berat-ı şerif-i âlîşân sadaka ve ihsan buyurulmak ricası paye-i serir-i alaya arz ve i’lâm olundu el emr li meni’l hazreti veliyu’l-emr fi’l yevmi’l-hamise aşer min Recebi’l-ferd li sene isna ve selâsîne ve selâsemie ve elf.
Baş kâtib, kadı.
Aded 147 B:
Kura-i Seba’nın Varda karyesinden Feyzoğlu kerimesi Fatıma bint Mehmed’in taksim-i verâseti itasını hâvî varid olan verâseti ilmuhaberi zeyline yazılan taksim müzekkiresidir.
Müteveffa-yi mezbûrenin verâseti zevci Süleyman Çavuş ile oğlu Mehmed Efendi ve kızları Hacer ve Ümmü Gülsüm’e munhasıra olduğu bala-i ilmuhaberden anlaşılmış olmağla tashih-i mesele-i mirasları bi hükmi’l feraiz on altı sehmden olub siham-ı mezkûreden dört sehmi mezbûr Süleyman Çavuş’a ve altı sehmi Mehmed Efendi’ye ve üçer sehmden altı sehmi dahi Hacer ve Ümmü Gülsüm’e isabet eylediğine beyan olunur fi Şabani’l ?
Baş kâtib, kadı.
Aded 148 B: Karayemiş Karyesi
Lazistan Sancağı’nın merkezi olan Rize kazası kurâsından Karayemiş karyesinden zatı Kudurganoğlu Hüseyin bin Yunus ile Kotikoğlu Osman bin Şaban tarifleriyle muarrefe olan Şaburoğlu kerimesi Keziban bint Abdulaziz meclis-i şer’-i şerif-i enverde takrir-i kelâm ve tabir-i ani’l-merâm idub halen zevci dahilim olan Sengöz karyesinden Hasan Başoğlu Hasan bin Yunus bundan akdem beni bila nafaka vela munfek-i şer’i terk idub müddet-i sefer-i baid olan Dersaadet’e gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf nafaka farz u takdir olunmak matlubumdur dedikte hakikat-i hal mezbûre Keziban’ın takrir-i meşruhi üzere olduğu karye-i merkume imam ve muhtar ve heyet-i ihtiyariyesi tarafından mevrud ilmuhaberden müstebân ve tarafeynin usr ve yusr halleri nazar-ı itibara alınarak zikr-i atî meblağ dahi kadr-i marûf idugi müslimin-i mezbûrun ihbarlarıyla lede’ş-şer’il enver zâhir ve nümâyân olmağın mezbûre bade’t-tahlifi’ş şer’i mucebince nafaka ve kisve bahâ vesair levazım-ı zaruriyesi içun işbu tarihten itibaren beher şehrî elli kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer zevci gaib-i mezbûr üzerine rucua mezbûre Keziban’a kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’r-râbi min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Kotikoğlu Osman bin Şaban, Kudurganoğlu Hüseyin bin Yunus.
Aded 149 B: Mapavri nahiyesinin Babik karyesi
Lazistan Sancağı’nın merkezi olan Rize kazası nevâhîsinden Mapavri nahiyesinin Babik karyesi ahalisinden iken bundan dört ay mukaddem vefat eden Alatomoğlu Refik bin Ali bin İbrahim’in tereke vesairesinden hisse-i irsîyesini taleb maksadıyla ber vechi ati varisi olduğunu iddia eden ve tezkire-i osmaniyesi görülen zatı Alatomoğlu Osman bin Ali ile Osoğlu(?) Salih bin Mahmud tarifleriyle muarrefe olan zevce-i menkuhe-i metrukesi Reyhanoğlu kerimesi Ayşe bint Mehmed meclis-i şer’-i şerif-i enverde müteveffa-yi mezbûrun medyuni karye-i mezkûreden Baş Kabanoğlu Mehmed Efendi ibn Osman mahzarında üzerine dava ve takrir-i kelâm idub zevcim müteveffa-yi mezbûr Refik’in verâseti benimle sulbî sağir oğlu Ali ve sulbîye-i kebire kızı Fatıma ve sulbîye-i sağire kızı Emine’ye munhasıra ve tashih-i mesele-i mirasları otuziki sehmden olub siham-ı mezkûreden dört sehmi bana ve ondört sehmi mezbûr Ali’ye ve yedişer sehmden ondört sehmi mezbûretan Fatıma ve Emine’ye isabet idub başka varisi ve terekesine mustahik-i ahari olmamağla zevcim müteveffa-yi mezbûrun hayatında mezbûr Mehmed Efendi zimmetinde cihet-i karzdan alacak hakkı olan kırksekiz kuruş kable’l-ahz ve’l-istifa vefat etmekle meblağ-ı mezkûrdan ber mûceb-i mesele-i miras hisse-i irsîyeme isabet eden altı kuruş bana eda ve teslime mezbûr Mehmed Efendi’ye tenbih olunmak bi’l-verâse matlubumdur deyu dava ve lede’s-sual ol dahi cevabında fi’l-hakika müteveffa-yi mezbûr Refik’e ol mikdar kuruş zimmetinde halen deyni olduğunu taven ikrar ve itiraf idub ancak müddeiye-i mezbûre Ayşe’nin ber vech-i muharrer verâset müddeası malûmum değildir deyu verâset müddeâsını bade’l-inkar müddeiye-i mezbûre Ayşe’den ber vech-i muharrer verâset müddeâsına mütabık beyyine taleb olundukta udul-i ahrâr-i rical-i müsliminden ve mezkûr Babik karyesinden Taşçıoğlu Ahmed Kadir ibn İslâm bin Ahmed ile yine karyeden Yağcıoğlu İbrahim bin İsmail bin Süleyman’dan her biri li ecli’ş şahade meclis-i şer’e hazıran olub münferiden ve müvaceheten istişhad olunduklarında fi’l-hakika müteveffa-yi mezbûr Refik bin Ali bin İbrahim’in verâseti zevce-i menkuhe-i metrukesi zatı malûmemiz olan müddeiye-i mezbûre Ayşe bint Mehmed ile sulbî sağir oğlu Ali ve sulbîye-i kebire kızı Fatıma ve sulbîye-i sağire kızı Emine’ye munhasıra olub bunlardan başka varisi ve terekesine mustahik-i ahari olduğu malûmumuz değildir biz bu hususa bu vech üzere şahidiz ve şahadet dahi ederiz deyu her biri müttefiku’l lafz ve’l mana ber nehc-i şer’i eda ve şahadet-i şer’i etmeleriyle şahidan-ı mezbûran evvelen ba veraka-i mesture mensub oldukları mezkûr Babik karyesi imamı Osoğlu(?) Mehmed bin İsmail ve muhtar-ı evveli Salih bin Mahmud’dan sirren ve badehu tarafeyn ve şahidler müterâfian hazır ve mevcud oldukları halde mezkûr Babik karyesinden Taşçıoğlu Hasan bin İsmail ve Alatomoğlu Osman bin Ali’den alenen lede’t-tezkiye adl ve makbulu’ş-şehade idugleri işar ve ihbar olunub şahadetleri makbule olmağın mucebince verâsete bade’l-hükm ve’t-tenbih müddeâ bih meblağdan hisse-i irsîyesi olan altı kuruş müddeiye-i mezbûre Ayşe’ye edaya ve teslime mezbûr Mehmed Efendi’ye tenbih olunduktan sonra verese-i mezbûrundan sağiran-ı mezbûranın valideleri ve tesviye-i umurlarına kıbel-i şer’iden ba hüccet-i şer’iye mensube vasileri zevce-i müddeiye-i mezbûre marifetu’z-zat Ayşe tekrar meclis-i makud-i mezkûrde mezkûr Babik karyesinden Alatomoğlu Osman bin Ali mahzarında bi’l-vesâye ve bi’l-verâse takrir-i kelâm ve tabir-i ani’l-merâm idub murisimiz zevcim müteveffa-yi mezbûr Refik’in hayatında sakin olduğu Bursa vilayetinin İnegöl kazasının Mezid karyesinde vâki mahallinde beyne’l-ahâlî ve’l-cîrân malûm ve müteârefu’l-hudud bi’l-cümle emlak ve arazilerden Duhter(?) tabir olunur su bıçkısı fabrikasıyla bi’l-cümle tereke ve zımem-i nasda olan kaffe-i hukukundan benimle vasileri olduğum sağiran-i mezbûranın hisse-i irsîyemizi vazıu’l-yed olan ve icab edenlerden taleb ve ahz u kabza ve emlak-ı mezkûreyi mesa’-ı şer’i tahakkuk eylediği surette semen ve bedel-i misilleriyle hisse-i irsîye ve musibemizi talibine memuru marifetiyle bey’ ve temlik u teslime ve semen ve bedel-i misillerini kezalik ahz u kabz ile bi’l-cümle makbuzatını bana irsal ve isal ve teslime ve takrirlerini i’tâ ve muamele-i lazımelerini icrâya ve mucib-i muhâkeme bir hal vukuunda icab edenlerle aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis ve itirazu’l-ğayr-i tarik ve sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzalarıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve tefrik u taksime ve taleb-i keşf ve mümeyyiz ve hâkim ve ehl-i vukuf tayin ve azline ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile mezbûr Osman’ı kabulune mevkûfe kaza-i mezkûrede sakin dava vekîllerinden Müderrisoğlu İsmail Efendi ibn Yusuf Efendi’yi münferiden ve müctemian icra-i vekâlete mezun olmak üzere bi’l-vesâye ve bi’l-verâse vekîl ve naib-i menab nasb u tayin eyledim dedikte mezbûr Osman dahi ? mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’t-tasi min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Osoğlu(?) Salih bin Mahmud, Baş Kabanoğlu Mehmed bin Osman.
Aded 150 B:
Leyle-i beraat hakkında mutasarrıflığa takdîm olunan ilamdır.
Mazhar-ı nûr-i iman olan ehl-i İslâm içun berat-ı tecelli-i ayat işbu şabanu’l muazzamanın onbeşinci gecesi yani önümüzdeki yarınki Perşembe gecesine şeref müsadif olmasıyla işbu şeb-i mukaddesi takdis ve tekrim içun bi’l-cümle cevami ve mesacid ve minarat-ı şerifenin ber mutad ikad-ı kanadil ile tenvir ve kulub-i islamiyanin tezyini hususunun ilanı zımnında belediyeye bera-i havale müzekkire takdîm kılındı. Fi 14 Şaban sene 1332 ve fi 14 haziran sene 1330.
Baş kâtib, kadı.
Aded 151 B: Ğorğor karyesi
Lazistan Sancağı’nın merkezi olan Rize kazası kurâsından Ğorğor karyesi ahalisinden iken işbu binüçyüzotuz sene-i rumisi nisanının yirmiüçüncü günü tarihinde vefat eden Koçaloğlu Ahmed Efendi ibn Şaban ibn Ahmed’in sulbî sağir oğulları Yusuf ve Abdurrahman ile sulbîye-i sağire kızı Ümmü Gülsüm’ün pederleri müteveffa-yi mezbûrdan mevrus mallarını hıfz ve umurlarını tesviye ve ru’yete kıbel-i şer’iden bir vasi nasbı ehem ve elzem olmağın emanet ile marûfe ve istikamet ile mevsûfe olub her vecihle vesâyet uhdesinden gelmeğe kadire idugi karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika zatı zeyl-i vesikada muharreru’l-esâmî Mehmed bin İbrahim ve Ahmed Efendi ibn İbrahim tarifleriyle muarrefe olan anaları Koçaloğlu kerimesi Ayşe bint Mehmed Efendi sağirun-i mezbûrunun pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l yevmi’r-râbia aşer min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Koçaloğlu Ahmed Efendi ibn İbrahim, Koçaloğlu Mehmed bin İbrahim.
Aded 152 B: Piri Çelebi mahallesi
Lazistan Sancağı’nın merkezi olan Rize kazası mahallâtından Piri Çelebi mahallesinden tezkire-i osmaniyesi görülen Sukyaszâde Hacı İbrahim Efendi ibn müteveffa Hacı Yusuf meclis-i şer’-i şerif-i enverde takrir-i kelâm ve tabir-i ani’l-merâm idub Erzincan’da Huran mahallesinde vâki iki taraf-ı tarik-i âm ve bir taraf-ı Kışla bahçesi ve taraf-ı rabii Fatıma Hanım bint Tufan bahçesiyle mahdud batapu müstakillen malik ve mutasarrıf olduğum bir kıta arazimi bedel misliyle talibine memuru huzurunda katiyen ferağ ve tefviz ve teslime ve ve bedel mislini ahz u kabz ile makbuzatını bize irsal ve isal ve teslime ve muamele-i lazımesini bi’l icrâ takririni i’tâya ve ber vech-i muharrer ahari tevkil ve azle ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile Erzincan’da Bank memuru Rizeli Sukyaszâde Hasan Tahsin Efendi ibn İzzet Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’s-sadise aşer min Şabani’l-muazzam li sene isna ve selâsîne ve selâsemie ve elf.
Aded 153 B: Atina Jandarma mülazım-ı sanisi Musa Kazım Efendi
Lazistan Sancağı’na tabi Atina kazası merkezi jandarma takımı kumandanı mülazım-ı sani İstanbullu Musa Kazım Efendi ibn Miralay müteveffa Mehmed Asaf Bey meclis-i şer’-i şerif-i enverde takrir-i kelâm ve tabir-i ani’l-merâm idub Dersaadet’te Koca Mustafa Paşa’da Leblebici köşesinde Kisedar sokağında beyne’l-ahâlî ve’l-cîrân malûm ve müteârefu’l-hudud beş numara ile murakkam bir kıta mülk-i arsada basenedi hakani malik ve mutasarrıf olduğum hisse-i şayıa-i malûmemi semen misliyle talibine memuru huzurunda bey’ u ferağ ve temlik u teslime ve muamele-i lazımesini icrâ ve takririni i’tâya ve semeni ahz u kabz ile makbuzatını bana irsal ve isal ve teslime ve ber vech-i muharrer ahari tevkil ve azle ve lede’l-hâce isbat-ı verâset iddiasına ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile Dersaadet’te Sütlüce’de Sokullu Mehmed Paşa ahfadından Derviş Bey namıyla mulakkab merhum Cemaleddin Bey’in mahdumi mütekaid icracı Kadri Bey’i kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’s-sadise aşer min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Velioğlu Hafız Mustafa Efendi, Nafia kâtibi Osman Efendi.
Aded 154 B:
Petroz karyesinden olub bundan akdem vefat eden Molla Hüseyinoğlu Yakub bin Salih bin Abdullah’ın verâsetini mübeyyin taksim müzekkiresidir.
Müteveffa-yi mezbûr Yakub bin Salih’in verâseti sulbî kebir oğulları Salih ve Şaban ve Şakir ve sulbîye-i kebire kızı Uluve’ye munhasıra ve badehu mezbûr Şakir vefat idub verâseti sulbî kebir oğlu Hamid ve sulbîye-i kebire kızları Fatıma ve Hanıme ve Mevlude’ye munhasıra olduğu bala-i ilmuhaberden anlaşılmağla şu halde tashih-i mesele-i mirasları bi hükmi’l feraiz kırkbeş sehmden olub siham-ı mezkûrden onar sehmden ceman otuz sehmi ibnu’l-mezbûrun Salih ve Şaban ve Hüseyin’e ve beş sehmi bintu’l-mezbûre Uluve ve dört sehmi mezbûr Hamid’e ve ikişer sehmden ceman altı sehmi mezbûrât Fatıma ve Hanıme ve Mevlude’ye isabet eder. Fi 18 Şaban sene 1332
Baş kâtib, kadı.
Aded 155 B:
Samri mahallesinden Kalafatoğlu Hacı İbrahim’in fi 12 Rebii’l-ahir sene 1332 tarih ve 55 numaralı idane hücceti zahrına yazılan mukteza ilamıdır.
İşbu idane hüccetinde muharrer olduğu üzere medyun-i merkum Hacı İbrahim’in eytâm sandığına medyun olduğu gayri ez teslimat altıyüzyedi buçuk kuruş lira akçenin tesviyesi luzumu medyun-i mezbûr ile küfelası Rıdvan ve Kemal’e ihbar edildiği halde tesviye-i deynden imtina eyledikleri eytâm müdürlüğü tarafından ifade edilmekle meblağ-ı mezbûrun hıyn-i tahsiline değin işleyecek nema ve mesarifat-ı vakıa ile mea asıl merkum Hacı İbrahim ile küfela-i merkuman Kemal ve Rıdvan’dan her birinden tahsiliyle eytâm müdürlüğüne teslimi iktiza eylediği i’lâm olundu. Fi 18 Şabani’l-muazzam sene 1332.
Baş kâtib, kadı.
Aded 156 B: Çancol mahallesi
Lazistan Sancağı’nın merkezi olan Rize kasabası mahallâtından Çancol mahallesinden zatı Dilonunoğlu Hasan bin Mahmud ve Dilonunoğlu Mahmud bin Hüseyin tarifleriyle muarrefe olan Safinaz bint Emin Efendi meclis-i şer’-i şerifde mahalle-i merkûmeden Hoholoğlu Ali Rıza bin Ahmed mahzarında takrir-i kelâm ve tabir-i ani’l-merâm idub üç aydan beri yirmibeş aded Osmanlı lirası mehr-i müeccel tesmiyesiyle mezbûr Ali Rıza’nın zevce-i menkuhe-i medhul-i bihâsı isemde zevcim mezbûr Ali Rıza’nın hanesi iki odalı olub bunda diğer zevcesi ve anası ve baba ve bir kız karındaşı mesken-i şer’î olmadığına binaen mesken-i şer’î tedarik ve tehiyyesine değin zevcim mezbûr Ali Rıza üzerine kadr-i marûf meblağ takdir olunmak matlubumdur deyu dava ve lede’s-sual ol dahi cevabında zevcesi müddeiye-i mezbûrenin müddeâsını bitamamiha taven ikrar ve itiraf idub ancak hanenin üç odası mesken-i şer’î olduğuna müddeiye-i mezbûrenin inkarına karşı dermiyan etmiş isede mesken-i şer’îsini isbat edinceye kadar tarafeynin usr ve yusr halleri nazar-ı itibara alınarak Zikr-i âtî meblağ kadr-i marûf idugi zeyl-i vesikada müslimin-i mezbûrun ihbarlarıyla lede’ş-şer’il enver zâhir ve nümâyân olmağın mucebince mezbûre Safinaz’ın nafaka ve kisve bahâ vesair levazım-ı zaruriyesi içun mesken-i şer’î tedarik ve tehiyyesine kadar mezbûr Ali Rıza üzerine işbu tarihten itibaren beher yevmî iki kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer zevci mezbûr Ali Rıza üzerine rucua mezbûre Safinaz’a izin verilmegin ma vekaa bi’t-taleb ketb olundu. Fi’l-yevmi min şehr-i Rebii’l-evvel li sene isna ve selâsîne ve selâsemie ve elf.
Baş kâtib, kadı. Dilonunoğlu Mahmud bin Hüseyin, Dilonunoğlu Hasan bin Mahmud.
Aded 157 B: Babik mahallesi
Tahakkuk-i özr-i şer’iye mebni Zikr-i âtî hususun mahallinde ketb u tahrir içun canib-i şeriat-i ğarradan mezunen bi hükm irsal olunan umenadan mahkeme-i şer’iye ikinci kâtibi Hafız Rahmi Efendi ibn Hafız Mahmud Efendi Lazistan Sancağı’nın merkezi olan Rize kasabası mahallâtından Babik mahallesinde kâin Hacı Osmanoğlu Hacı Mustafa Efendi’nin müsteciren menzilinde sakin olan Saniye bint Nazif Efendi’nin hanesinde varıb Hacı İbrahimzâde Hüseyin Efendi ibn Mahmud ve Emir Ahmedzâde Cemil Efendi ibn Abdulkadir huzurlarında akd-i meclis-i şer’i âli ettikte iken üçyüzyirmiyedi sene-i rumisi kanun-i sanisinin ondördüncü günü Yemen’de vefat eden Hacı Alizâde İbrahim Edhem Efendi ibn Hacı Ali ibn Abdullah’ın muhallefat ve tereke-i sairesinden hisse-i irsîyeden taleb maksadıyla ber vechi ati varisi olduğunu iddia eden ve tezkire-i osmaniyesi görülen zatı müslimin-i mezbûrun Hüseyin Efendi ile Cemil Efendi tarifleriyle muarrefe olan zevce-i metrukesi mezbûre Saniye bint Nazife ile Zelkifl Efendi meclis-i makud-i mezkûrde müteveffa-yi muma ileyhin medyuni Vonit-i İslâm mahallesinden Molla Ömerzâde Hasan Efendi ibn Abdulhamid Efendi nezdinde ba verese üzerine dava ve takrir-i kelâm idub zevcim müteveffa-yi muma ileyh İbrahim Edhem Efendi’nin verâseti zevce-i menkuhe-i metrukesi olduğum cihetle benimle sulbî sağir oğulları Hıfzı ve Seyfi Efendiler ve sulbîye-i kebire kızı Radife ve sulbîye-i sağire kızı Kâtibe’ye munhasıra ve tashih-i mesele-i mirasları kırksekiz sehmden olub siham-ı mezkûrden altı sehmi bana ve ondörder sehmden ceman yirmisekiz sehmi ibnu’l-mezbûran Hıfzı ve Seyfi Efendiler yedişer sehmden ceman ondört sehmi bintu’l-mezbûretan Radife ve Kâtibe’ye isabet idub başka varis ve terekesine mustahik-i ahar kimesnesi olmamağla zevcim müteveffa-yi muma ileyhin hayatında muma ileyh Hasan Efendi zimmetinde cihet-i karzdan alacak hakkı olan dört kuruşu kable’l-ahz ve’l-istifa vefat etmekle meblağ-ı mezkûrdan ber mûceb-i mesele-i miras hisse-i irsîyem olan üç kuruşu bana eda ve teslime muma ileyh Hasan Efendi’ye tenbih olunmak bi’l-verâse matlubumdur deyu dava ve lede’s-sual ol dahi cevabında fi’l-hakika müteveffa-yi muma ileyhe ve ol miktar kuruş zimmetinde halen deyni olduğunu taven ikrar ve itiraf idub ancak müddeiye-i mezbûrenin ber vech-i muharrer verâset müddeâsı malûmum değildir deyu verâset-i mezkûre müddeâsını bade’l-inkar müddeiye-i mezbûreden ber vech-i muharrer verâset müddeâsına mütabık beyyine taleb olundukta udul-i ahrâr-i rical-i müsliminden ve Babik mahallesinden muhasebe-i liva baş kâtibi Muhsin Efendi ibn Afvan Efendi ibn Emin Efendi ile kezalik mahalleden ve mısr mağazacılarından Hacı Osmanoğlu Hacı Mustafa bin Hacı Ömer ibn Hacı Ali’den her biri li ecli’ş şahade meclis-i şer’e hazıran olub mütekarrer ve muvaceheten istişhad olundukta fi’l-hakika müteveffa-yi muma ileyh İbrahim Edhem Efendi ibn Hacı Ali bin Abdullah’ın verâseti zevce-i menkuhe-i metrukesi zatı malûmumuz olan müddeiye-i mezbûre Saniye bint Nazif Efendi ile sulbî sağir oğulları Feyzi ve Hafzı ve sulbîye-i kebire kızı Rafia ve sulbîye-i sağire kızı Kâtibe’ye munhasıra olub bunlar ? varisi ve terekesine mustahik-i ahari olduğu malûmumuz değildir biz bu hususa bu vech üzere şahidiz ve şahadet ederiz deyu her biri müttefiku’l lafz ve’l mana ber nehc-i şer’i eda-i şahadet-i şer’i etmeleriyle şahidan-i mezbûran evvelen ba veraka-i mesture mensub oldukları muhasebe-i liva merkez kâtibi Ali Rıza Efendi ibn İbrahim Efendi ile liva sandık emini Ahmed Efendi ibn Abdulkerim’den ve mezbûr Hacı Mustafa mağazacı esnafından Kürd Alizâde Şakir Efendi ibn Ömer ile Lazzâde Hacı Rıdvan ibn Hacı Mustafa Efendiler’den sirren ve badehu tarafeyn ve şahidler müterâfian hazır ve mevcud oldukları halde muhasebe-i liva-i merkez kâtibi muavini Tahir Efendi ibn Abdulkerim ile Aşar kâtibi Rıza Efendi ibn İsmail Efendi ve mağazacı esnafından Tatarzâde Kazım Efendi ibn Hacı Şükrü ve Kürd Alizâde Hakkı Efendi ibn Şakir Efendi’den alenen lede’t-tezkiye adl ve makbulu’ş-şehade idugleri işar ve ihbar olunub şahadetleri makbule olmağın mucebince verâsetine bade’l-hükm ve’t-tenbih müddeâ bih meblağdan hisse-i irsîyesi olan üç kuruş müddeiye-i mezbûre Saniye’ye eda ve teslime muma ileyh Hasan Efendi’ye tenbih olunduğu kâtib-i muma ileyh mahallinde ketb u tahrir ve mea mürsel umena-i şer’ile meclis-i şer’e gelib ala vukuihi inha ve takrir eylediği tescîl ve i’lâm olundu. Fi’l-yevmi’s-sania aşer min Recebi’l-ferd li sene isna ve selâsîne ve selâsemie ve elf.
Baş kâtib, kadı.
Aded 158 B: Hazavit karyesi
Lazistan Sancağı’nın merkezi olan Rize kazası kurâsından Hazavit karyesinden iken dokuz sene akdem vefat eden Nimetoğlu Mehmed bin Osman bin Abdullah’ın emval-i metrukesinden hisse-i irsîyesini taleb maksadıyla ber vechi ati varisi olduğunu iddia eden ve tezkire-i osmaniyesi görülen zevce-i menkuhe-i metrukesi zatı İslâmoğulları Sefer ve İslâm benan-i İbrahim tarifleriyle muarrefe olan Has Hatun bint Osman meclis-i şer’-i şerif-i enverde müteveffa-yi mezbûrun medyuni karye-i merkûmeden Durmuş Alemdaroğlu Osman bin Hacı Ali mahzarında bi’l-verâse üzerine dava ve takrir-i kelâm idub zevcim müteveffa-yi mezbûr verâseti benimle sulbî kebir oğlu Ömer ve sulbîye-i kebire kızı Şakire’ye munhasıra ve tashih-i mesele-i mirasımız bi hükmi’l feraiz yirmidört sehmden olub siham-ı mezkûreden üç sehmi bana ve ondört sehmi mezbûr Ömer’e ve yedi sehmi mezbûre Şakire’ye isabet idub başka varisi ve terekesine mustahik-i ahari olmamağla zevcim müteveffa-yi mezbûr Mehmed’in hayatında mezbûr Osman zimmetinde cihet-i karzdan alacak hakkı olan kırk sekiz kuruş kable’l-ahz ve’l-istifa vefat etmekle meblağ-ı mezkûrdan ber mûceb-i mesele-i miras hisse-i irsîyeme isabet eden altı kuruşu bana eda ve teslime mezbûr Osman’a tenbih olunmak bi’l-verâse matlubumdur deyu dava ve lede’s-sual ol dahi cevabında fi’l-hakika müteveffa-yi mezbûre ol mikdar kuruş zimmetinde halen deyni olduğunu taven ikrar ve itiraf idub ancak müddeiye-i mezbûre Has Hatun’un ber vech-i muharrer verâset müddeâsı malûmum değildir deyu verâset müddeâsını bade’l-inkar müddeiye-i mezbûreden ber vech-i muharrer verâset müddeâsına mütabık beyyine taleb olundukta udul-i ahrâr-i rical-i müsliminden ve Ğortoz mahallesinden ve bakkal esnafından İslâmoğlu Receb bin İbrahim bin Beşir ile Hazavit karyesinden Topçuoğlu Hurşid bin Hüseyin bin Mehmed’den her biri li ecli’ş şahade meclis-i şer’e hazıran olub münferiden ve muvaceheten istişhad olunduklarında fi’l-hakika müteveffa-yi mezbûr Mehmed bin Osman bin Abdullah’ın verâseti zevce-i menkuhe-i metrukesi zatı malûmemiz olan müddeiye-i mezbûre Has Hatun bint Osman ile sulbî kebir oğlu Ömer ve sulbîye-i kebire kızı Şakire’ye munhasıra olub bunlardan başka varisi ve terekesine mustahik-i ahari olduğu malûmumuz değildir biz bu hususa bu vech üzere şahidiz ve şahadet dahi ederiz deyu her biri müttefiku’l lafz ve’l mana ber nehc-i şer’i eda ve şahadet-i şer’iye etmeleriyle şahidan-ı mezbûr andan mezbûr Receb evvelen ba veraka-i mesture mensub olduğu bakkal esnafından Babuşcioğlu Hasan Reis ibn Ahmed ve Kanburoğlu İdris Efendi ibn Ahmed’den ve mezbûr Ahmed’den ve mezbûr Hurşid dahi Hazavit karyesi muhtar-ı evveli Alemdaroğlu Mehmed bin Osman ile muhtar-ı sanisi Akmehmedoğlu Yahya bin Feyzi ve ihtiyar meclis-i azasından Mamatioğlu Emin ve Nimetoğlu Mehmed’den sirren ve badehu tarafeyn ve şahidler müterâfian hazır ve mevcud oldukları halde yine bakkal esnafından Ekşioğlu Osman bin Hacı Süleyman ve Bekiroğlu Ruşen bin Hurşid ile Hazavit karyesinden Asbetoğlu Mehmed bin Bahadır ve Hacı Mehmed ibn Mustafa’dan bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idugleri işar ve ihbar olunub şahadetleri makbule olmağın mucebince verâsetine bade’l-hükm ve’t-tenbih müddeâ bih meblağdan hisse-i irsîyesi olan altı kuruşu müddeiye-i mezbûre Has Hatun’a eda ve teslime mezbûr Osman’a tenbih olunduktan sonra verese-i mezbûrundan her birinin zatı zeyl-i vesikada muharreru’l-esâmî Durali bin Osman ve Osman bin İbrahim nâm müslimîn tarifleriyle muarrefe olan zevce-i müddeiye-i mezbûre Has Hatun ile bint-i mezbûre Şakire tekrar meclis-i makud-i mezkûrde her biri takrir-i kelâm ve tabir-i ani’l-merâm idub murisimiz müteveffa-yi mezbûr Mehmed’in hıyn-i vefatında nezdinde mevcud bi’l-cümle tereke ve eşya ve nukûdiyle müstakillen malik olduğu Dersaadet’te Kasımpaşa iskelesinde yüzyirmisekiz numaralı bir aded iki çifte kayığını vazıu’l-yed ve alakadar olanlardan taleb ve davaya ve mezkûr Refik ile terekesinden bizim hisse-i irsîye ve şayiamızı semen misilleriyle talibine bey’ ve temlik u teslime ve makbuzatını bize irsal ve isal ve teslime ve muamele-i lazımelerini icrâ ve takrirlerini i’tâya ve mucib-i muhâkeme bir hal vukuunda icab edenlerle aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis ve itirazu’l-ğayr-i tarik ve sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâ ve hacz vaz’ u fekkine ve ber vech-i muharrer ahari tevkil ve azle ve lede’l-hâce sulh ve ibraya ve’l-hâsıl mütevakkıf olduğu umûrun küllîsine tarafımızdan vekâlet-i mutlaka-i sahiha-i şer’iye ile Dersaadet’te Haliç vapurları kumpanyasının oniki numaralı vapurunda müstahdem aşçı Rizeli Nimetoğlu Ömer bin Abdullah’ı kabulune mevkûfe vekîl ve naib-i menab nasb u tayin eyledik dediklerinde ma vekaa bi’t-taleb ketb olundu. Fi’l-yevmi’s-sadis min Şabani’l-muazzam li sene isna selâsîne ve selasemi ve elf.
Baş kâtib, kadı. İslâmoğlu İslâm bin İbrahim, İslâmoğlu Sefer bin İbrahim, Akmehmedoğlu Osman bin İbrahim, Kenanoğlu Durali bin Osman.
Aded 159 B: Fatla karyesi
Lazistan Sancağı’nın merkezi olan Rize kazası kurâsından Fatla karyesinden iken bundan akdem vefat eden Bayrakdaroğlu nâm-ı diğeri Alininoğlu Reşid bin İdris bin Ali’nin sulbîye-i sağire kızları Hatice ve Gülliye ve Melnemşe ve Tibuka’nın pederleri müteveffa-yi mezbûrdan mevrus mallarını hıfz ve umurlarını tesviye ve ru’yete bir vasi nasbı ehem ve elzem olmağın emanet ile muarref ve istikamet ile mevsûf olub her vecihle vesâyet uhdesinden gelmeğe kadir idugi karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisu’l-vesika li ebeveyn amuceleri Ali bin İdris siğar-ı mezbûrunun pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin vasi ve üzerine zatı zeyl-i vesikada Gül Ali bin Hasan ve Ali bin Memiş tarifleriyle muarrefe olan anaları Bayrakdaroğlu kerimesi Zekiye bint Hasan nazır nasb u tayin olunduklarında onlar dahi ber vech-i muharrer vesâyet ve nezaret-i mezkûreleri kabul ve hizmet-i lazımelerini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’r-râbi aşer min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Alininoğlu Ali bin Memiş, Bayrakdaroğlu Gül Ali bin Hasan.s
Aded 160 B: Varankoz karyesi
Lazistan Sancağı’nın merkezi olan Rize kazası kurâsından Varankoz karyesinden iken bundan akdem vefat eden Kukucoğlu Osman Efendi ibn Ahmed’in sulbî sağir oğlu Ahmed ile sulbîye-i sağire kızları Pakize ve Havva ve Naciye’nin üçyüzotuz senesi muharremu’l-haramının yirmialtıncı günü tarihli hüccet mucebince kıbel-i şer’iden mensube vasileri valideleri zatı zeyl-i vesikada muharrer’ul esami müslimin Mustafa Usta bin Yusuf ve Osman Usta bin Ahmed Usta tarifleriyle muarrefe olan Molla Ömeroğlu kerimesi Meryem bint Mehmed meclis-i şer’-i şerif-i enverde karye-i mezkûreden Kukucoğlu Kazım Efendi ibn Hüseyin Efendi mahzarında bi’l-vesâye ve bi’l-âsale takrir-i kelâm ve tabir-i ani’l-merâm idub vasileri bulunduğum siğar-ı mezbûr una pederleri müteveffa-yi mezbûr Osman’dan mevrus ve müntakil emlak ve arazi ve su ve hark ve hakk-ı mesil ve alacak haklarından benimle vasileri olduğum siğar-ı mezbûrunun hisse-i irsîye ve müntakılelerimize müdahale eden karye-i merkûmeden İsmailoğlu Mustafa bin İsmail ile aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis ve itirazu’l-ğayr-i tarik ve sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzalarıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve taleb-i keşf ve mümeyyiz ve hâkim ve ehl-i vukuf tayin ve azline ve tefrik u taksime ve lede’l-hâce isbat-ı verâset iddiasına ve’l-hâsıl mütevakkıf olduğu umûrun küllîsine tarafımdan bi’l-âsale ve bi’l-vesâye vekâlet-i mutlaka-i sahiha-i şer’iye ile muma ileyh Kazım Efendi ile münferiden ve müctemian icra-i vekâlete mezun olmak üzere kabulune mevkûfe Kukucoğlu Hüseyin Efendi ibn Ahmed Efendi’yi vekîl ve naib-i menab nasb u tayin eyledim dedikte muma ileyh Kazım Efendi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sâlis ve’l-ışrin min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Kukucoğlu Mustafa Usta bin Yusuf, Tarlacıoğlu Osman Usta bin Ahmed Usta.
Aded 161 B: Umma karyesi
Lazistan Sancağı’nın merkezi olan Rize kazası kurâsından Umma karyesinden zatı zeyl-i vesikada muharreru’l-esâmî müslimîn Sefer bin Hasan ile Hüseyin bin Mehmed tarifleriyle muarrefe olan ve tezkire-i osmaniyesi görülen Şeremetoğlu müteveffa Ali Efendi ibn Mustafa’nın zevcesi Şetoğlu kerimesi Yasime bint Hasan meclis-i şer’-i şerif-i enverde dava vekîllerinden Arif Efendi ibn Tevfik Efendi mahzarında takrir-i kelâm ve tabir-i ani’l-merâm idub zevcim müteveffa-yi mezbûr Ali Efendi ile oğlum Hüseyin’in katili olan Of kazasının Keler karyesinden Hacı Fazlıoğlu Behram ve refiki Abdulaziz aleyhlerinde aid olduğu muhâkeme ve devâir ve cezaiyede ve ikame-i dava ve irae-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i kısasa ve’l-hâsıl her türlü hukuk-i şahsiye ve kanuniyemi muhafaza ve müdafaya ve mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile muma ileyh Arif Efendi’yi vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sani ve’l-ışrin min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Mehmed Alioğlu Memiş bin Mehmed, Şetoğlu Sefer bin Hasan.
Aded 162 B: Kozandinoz karyesi
Lazistan Sancağı’nın merkezi olan Rize kazası kurâsından Kozandinoz karyesinden iken bundan akdem vefat eden Köseoğlu Mehmed bin Yusuf bin Ali’nin sulbî sağir oğulları Abdullah ve İsmail ile sulbîye-i sağire kızı Fatıma’nın pederleri müteveffa-yi mezbûrdan mevrus mallarını hıfz ve umurlarını tesviye ve ru’yete kıbel-i şer’iden bir vasi nasbı ehem ve elzem olmağın emanet ile marûf ve istikamet ile mevsûf olub her vecihle vesâyet uhdesinden gelmeğe kadire idugi karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisu’l-vesika li ebeveyn erkarındaşları Abdullah bin müteveffa-yi mezbûr Mehmed’in siğar-i mezbûrunun pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi ve üzerine zatı zeyl-i vesikada muharreru’l-esâmî İsmail bin Yunus ve İsmail ve Halid ve Ali bin İbrahim tarifleriyle muarrefe olan anaları Ayşe bint Mehmed’in nazır nasb u tayin olunduklarında onlar dahi ber vech-i muharrer vesâyet ve nezaret-i mezkûreleri kabul ve hizmet-i lazımesini kema yenbağî edaya taahhüd ve iltizam itmelerin ma vekaa bi’t-taleb ketb olundu. Fi’l-yevmi’l-hamis ve’l-ışrin min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Köseoğlu İsmail bin ?, Ganceoğlu(?) İsmail bin Halid, Mumoğlu Ali bin İbrahim.
Aded 163 B: Rados karyesi
Lazistan Sancağı’nın merkezi olan Rize kazası kurâsından Rados karyesi sakinelerinden zatı zeyl-i vesikada muharreru’l-esâmî Mustafa bin Ali ile Kamil Çavuş bin Ahmed tarifleriyle muarrefe olan Reisoğlu kerimesi Musibe bint Hacı Salih meclis-i şer’-i şerif-i enverde Hanes karyesinden Mustununoğlu Hamza bin Süleyman mahzarında mezbûr Hamza’nın bir seneden beri yediyüz kuruş mehr-i müeccel tesmiyesiyle zevce-i menkuhe-i medhul-i bihâsı isemde zevcim mezbûr ile beynimizde hüsn-i imtizac olamadığına binaen mehr-i müsemma-i mezkûr ve nafaka-i iddet ve maunet-i süknâm dahi kendi üzerime olmak üzere kabulumu hâvî zevcim mezbûr Hamza ile muhalaa-i sahiha-i şer’iye ile hul’ olub hukuk-i zevciyete müteallıka-i âmme dava ve kaffe-i mutalebattan mezbûr Hamza’nın zimmetini ibra-i âm sahiha-i şer’i ile ibra ve ıskat ol dahi ber vech-i muharrer benim zimmetimi ibra ve ıskat etmiş ise de zevcim mezbûrun firaşından hasıl ve benden mütevellide ve halen bi hakki’l-hidâne hacr ve terbiyemde olan sulbî sağir oğlu hazır bi’l-meclis Şevket içun üzerine kadr-i marûf meblağ farz u takdir olunmasını taleb ederim deyu dava ve lede’s-sual ol dahi cevabında mezbûre Musibe’nin kelimat-ı meşruhesini vicahen ve şifahen kabul ve ikrar idub ancak sağir-i mezbûr içun yevmî kırk para verebileceğini dermiyan ve müddeiye-i mezbûr ede ol mikdara razıye olduğunu ityan etmeleri üzerine mucebince sağir-i mezbûrun nafaka ve kisve bahâ vesair levazım-ı zaruriyesi içun terazî-i tarafeynle mezbûr Hamza üzerine beher şehrî otuz kuruş nafaka farz u takdir olunub meblağ-ı mefruz-i mezkûri sağir-i mezbûrun nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer babası mezbûr Hamza üzerine rucua mezbûre Musibe’ye kıbel-i şer’iden bi’l hidâne izin verilmegin ma vekaa bi’t-taleb ketb olundu. Fi’l-yevmi’s-sadise aşer min Recebi’l-ferd li sene isna ve selâsîne ve selâsemie ve elf.
Baş kâtib, kadı. Kuyumcuoğlu Kamil Çavuş bin Ahmed, Caboğlu Mustafa bin Ali.
Aded 164 B:
Binüçyüzotuziki senesi Ramazan-i mafiretü’t tâm(?) ilamıdır.
Şaban-i şerifin ğurresi Çarşamba gününden sabit olduğuna mebni Perşembe günü bade’l gurub yani Cuma gecesi hilal-i ramazan meclis-i şer’i münirden(?) ber mutad taharri olunarak bi’l ru’ye sabit olamadığı takdiren ve tekmil-i selasin ile Cuma günü mebde-i şehr-i sıyam-ı saadetü’t tâm olduğu cihetle bera-i ilan belediyeye emr ve havale buyrulmak üzere müzekkire takdîm kılındı. ?
Baş kâtib, kadı.
Aded 165 B: Çoncik karyesi
Lazistan Sancağı’nın merkezi olan Rize kazası kurâsından Çoncik karyesinde Kara Alioğlu Eşref bin Ali’nin katl kasdıyla kendisini cerh ve karındaşı Ali Rıza’yı katl eden Vila karyesinden Kopuzoğlu Kıro Osman ve rufeka-i sairesi aleyhlerinde aid olduğu devâir ve mehâkim-i cezaiyenin her derecesinde ikame-i dava ve muhâkeme ve muhâsama ve irae-i şuhûd ve teblîğ ve tebellüğa ve imzasıyla istid’â ve lâyıha tanzîm ve takdîmine ve ber vech-i muharrer ahari tevkil ve azle ve’l-hâsıl her türlü hukuk-i şahsiye ve kanuniyemi muhafaza ve müdafaya işbu mahkeme-i şer’iyeden muti üçyüzotuziki senesi Receb-i şerifin yirmiikinci günü tarihli hüccet mucebince vekîli bulunan karındaşı Seyfeddin ile mezbûr Seyfeddin’in babası mezbûr Ali meclis-i şer’-i şerif-i enverde her biri bi’l-vekâle ve bi’l-âsale takrir-i kelâm ve tabir-i ani’l-merâm idub murisimiz müteveffa-yi mezbûr Ali Rıza’nın katili olan mezbûr Kıro Osman ve rufeka-i sairesi ber vech-i muharrer icra-i vekâlete münferiden ve müctemian mezun olmak üzere dava vekîllerinden Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledik dediklerinde ma vekaa bi’t-taleb ketb olundu. Fi’l-yevmi’s-sadis min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Muhzır İbrahim Efendi, Mataracızâde Hüsni Efendi.
Aded 166 B: Hamalyoz karyesi
Lazistan Sancağı’nın merkezi olan Rize kazası kurâsından Hamalyoz karyesi sakinelerinden zatı zeyl-i vesikada muharreru’l-esâmî İsmail bin Esad ve Esad bin Ali tarifleriyle muarrefe olan Çolakoğlu kerimesi Meryem bint Yahya meclis-i şer’-i şerif-i enverde Perkam karyesinden Hacı Ömeroğlu Mahmud bin Ahmed mahzarında üç seneden beri on lira-i Osmanî mehr-i müeccel ve üç lira mehr-i muaccel tesmiyeleriyle mezbûr Mehmed’in zevce-i menkuhe-i medhul-i bihâsı isemde zevcim mezbûr beni infak ve iksâ etmemekte ve karye-i merkumede vâki iki odayı hâvî meskenine anası ve üç kardeşi sakineler olub menzil-i mezkûr mesken-i şer’î olmadığından mesken-i şer’î tedarik ve tehiyyesine değin üzerine kadr-i marûf nafaka farz u takdir olunmak matlubumdur deyu dava ve lede’s-sual ol dahi cevabında müddeiye-i mezbûrenin ber vech-i muharrer müddeâsını ikrar ve itiraf idub ancak mesken tedarik edeceği cihetle nafaka itasına kudreti olmadığı dermiyan etmekle tarafeynin usr ve yusr halleri nazar-ı itibara alınarak Zikr-i âtî meblağ kadr-i marûf idugi müslimin-i mezbûrun ihbarlarıyla lede’ş-şer’il enver zâhir ve nümâyân olmağın mucebince mesken-i şer’î iraesine değin nafaka ve kisve bahâ vesair levazım-ı zaruriyesi içun müddeâ aleyh mezbûr Mehmed üzerine işbu tarih-i vesikadan itibaren beher şehrî altmış kuruş kadr-i marûf farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer mezbûr Mehmed üzerine rucua mezbûre Meryem’e kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’s-sabi ve’l-ışrin min Recebi’l-ferd li sene isna ve selâsîne ve selâsemie ve elf.
Baş kâtib, kadı. Çolakoğlu İsmail bin Ahmed, Çolakoğlu Esad bin Ali.
Aded 167 B: Asbet karyesi
Lazistan Sancağı’nın merkezi olan Rize kazası kurâsından Asbet karyesinden iken bundan akdem vefat eden Cafer bin Halid bin Hüseyin’in sulbîye-i sağire kızları Hatice ve Emine ve Zehra ve İkbale’nin pederleri müteveffa-yi mezbûrdan mevrus mallarını hıfz ve umurlarını tesviye ve ru’yete kıbel-i şer’iden bir vasi nasbı ehem ve elzem olmağın emanet ile marûfe ve istikamet ile mevsûfe olub her vecihle vesâyet uhdesinden gelmeğe kadire idugi karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî Hüseyin Efendi ibn Salih Efendi ile Tahsin Efendi ibn Hakkı Efendi ihbarlarıyla lede’ş-şer’il enver zâhir ve nümâyân olan işbu baisetu’l-vesika zatı müslimin-i mezbûrun tarifleriyle muarrefe olan anaları Çalıkoğlu kerimesi Fatıma bint Mustafa siğar-ı mezbûranın pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l yevmi’s-sani min şehr-i Ramazani’l-mübarek li sene isna ve selâsîne ve selâsemie ve elf.
Baş kâtib, kadı. Kakavanoğlu Hüseyin Efendi ibn Salih Efendi, Kakavanoğlu Tahsin Efendi ibn Hakkı Efendi.
Aded 168 B: Hamalyoz karyesi
Lazistan Sancağı’nın merkezi olan Rize kazası kurâsından Hamalyoz karyesinden Azaklıoğlu Şevki bin Hacı Harun meclis-i şer’-i şerif-i enverde takrir-i kelâm ve tabir-i ani’l-merâm idub Raşota karyesinden Çolakoğlu Esad bin Ali tarafından aleyhime ikame olunan alacak davasından dolayı mezbûr Esad ile aid olduğu mehâkimin her derecesinde müddeî ve müddeâ aleyh sıfatlarıyla bidayeten ve iâdeten ve itizaren ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve lede’l-hâce sulh ve ibraya ve ber vech-i muharrer ahari tevkil ve azle ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile pederim Azaklıoğlu Hacı Harun ibn Hüsnü’yü kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’l-hamis ve’l-ışrin min Şabani’l-muazzam li sene isna ve selâsîne ve selâsemie ve elf.
Baş kâtib, kadı. Muhzır İbrahim Efendi, Köseoğlu Osman Sabri Efendi.
Aded 169 B:
Arkotil mahallesinden Berber Hüseyinoğlu Ruşen Yazıcı bin Hüseyin’in sübut-i verâsetine dair taksim müzekkiresidir.
Müteveffa-yi mezbûr Ruşen’in verâseti zevce-i menkuhe-i metrukesi Gülika bint Şakir ile sulbî kebir oğulları Salih ve Mustafa ve sulbîye-i kebire kızları Rukiye ve Azize’ye munhasıra olduğu bala-i ilmuhaberden anlaşılmağla şu halde tashih-i mesele-i mirasları kırksekiz sehmden olub siham-ı mezkûreden altı sehmi zevce-i mezbûreye ve ondörder sehmden ceman yirmisekiz sehmi ibnu’l-mezbûran Mustafa ve Salih’e ve yedişer sehmden ceman ondört sehmi bintu’l-mezbûretan Rukiye ve Azize’ye isabet ettiği beyan olunur. Fi 6 Ramazan sene 1332.
Baş kâtib, kadı.
Aded 170 B: Ğotoz karyesi
Lazistan Sancağı’nın merkezi olan Rize kazası kurâsından Ğotoz karyesinden Kanburoğulları Hasan Efendi ibn Hüseyin Efendi ile Şakir bin Hacı Temel meclis-i şer’-i şerif-i enverde her biri takrir-i kelâm ve tabir-i ani’l-merâm idub karındaşlarımız Hacı İsmail ve Ali’nin katilleri olan Hazavit karyesinden Mamatioğulları Tahir ve Ali benan-i Mehmed Ağa aleyhlerinde aid olduğu mehâkim ve devâir-i cezaiyenin her derecesinde bidayeten ve iâdeten ve itizaren ve istinafen ve temyizen ikame ve takib-i davaya ve irae-i şuhuda ve teblîğ ve tebellüğa ve imzasıyla istid’â ve lâyıha tanzîm ve takdîmine ve icabında mehâkim aidesinde kısas ve diyet davası ikamesine ve’l-hâsıl her türlü hukuk-i şahsiye ve kanuniyemizi muhafaza ve müdafaya ve mütevakkıf olduğu umûrun küllîsine tarafımızdan vekâlet-i mutlaka-i sahiha-i şer’iye ile Trabzon’da dava vekîllerinden Hüseyin Avni Efendi ibn Ali’yi kabulune mevkûfe vekîl ve naib-i menab nasb u tayin eyledik dediklerinde ma vekaa bi’t-taleb ketb olundu. Fi’l yevmi’l-hamis min Ramazani’l-mübarek li sene isna ve selâsîne ve selâsemie ve elf.
Baş kâtib, kadı. Kanburoğlu Mustafa, Muhzır Sadık Efendi.
Aded 171 B:
Ğorğor karyesinden Külünkoğlu Hüseyin Efendiye
Karyenizin Ahayoz dinmekle marûf nâm mahallinde kâin cami-i şerifin imamet cihetinin uhdenize tevcihine dair iktiza eden i’lâm ve mazbatası fi 8 kanun-i sani sene 1329 tarihiyle müerreh ve 5368 numara ile murakkam olduğu halde evkaf-ı nezaret-i celilesinden takdîm kılınıb lede’l havele meclis-i idare baş küttabından ba derkenar beyan edilmiş olmağla gerekdir ki berat-ı şerif-i âlîşânın şeref vuruduna değin ikame-i salât-i Cuma ve ideyn olunmak üzere kıbel-i şer’iden izin ve ruhsatı hâvî işbu murasele i’tâ kılındı. Fi 16 Ramazan sene 1332 ve fi 26 Temmuz sene 1330.
Baş kâtib, kadı.
Aded 172 B: Mağloz karyesi
Lazistan Sancağı’nın merkezi olan Rize kazası kurâsından Mağloz karyesinden iken bundan akdem vefat eden Köse Mehmedoğlu Kasım bin müteveffa Hüseyin bin müteveffa Ali’nin sulbîye-i sağire kızı Zehra’nın pederi müteveffa-yi mezbûrdan mevrus malını hıfz ve vakt-i rüşd-i sedadına değin umurunu tesviye ve ru’yete kıbel-i şer’iden vasi nasb-ı ehem ve elzem olmağın emanet ile marûfe ve istikamet ile mevsûfe olub her vecihle vesâyet uhdesinden gelmeğe kadire idugi karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika zatı Mustafa bin Hacı Ahmed ve Mustafa bin Şerif ve Mustafa bin Hüseyin Efendi tarifleriyle muarrefe olan anası Araboğlu kerimesi Necibe bint Ömer sağire-i mezbûrenin pederi müteveffa-yi mezbûrdan mevrus malını hıfz ve vakt-i rüşd-i sedadına değin umurunu tesviye ve ru’yete vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’r-râbi ve’l-ışrin min Recebi’l-ferd li sene isna ve selâsîne ve selâsemie ve elf.
Baş kâtib, kadı. Araboğlu Mustafa, Köseoğlu Mustafa, Araboğlu Mustafa.
Aded 173 B: Kavaroz mahallesi
Lazistan Sancağı’nın merkezi olan Rize kasabası mahallâtından Kavaroz mahallesinden Kör Osmanoğlu Hafız Eşref Efendi ibn Hacı Durmuş Efendi meclis-i şer’-i şerif-i enverde Eytâm müdürü Hafız Harun Efendi mahzarında takrir-i kelâm ve tabir-i ani’l-merâm idub Haldoz mahallesinden Durmuş Efendizâde müteveffa Hacı Kaşif Efendi’nin sulbîye-i sağire kızları Emine ve Havva’nın mallarından lira-i Osmanî yüz kuruş hesabıyla dokuzyüz kuruş istidane ve kabz ve umuruma sarfla istihlâk eylediğim gibi semeni işbu sene-i kamile müeccel olmak üzere kezalik eytâm-ı mezbûrunun mallarından ve müdir-i muma ileyh yedinden iştira eylediğim bir cild Ali Efendi fetvası semeninden seksenbir kuruş ki ceman dokuzyüzseksenbir kuruş zimmetimde vacibu’l-eda ve lazımu’l-kada deynim ve borcum olub murur edecek eyyam içun lazım gelen meblağ ile mesarifat-ı saireyi dahi terk ve teberru eyledim dedikte ğıbbe’t-tasdik kefalet-i vakıaları meclis-i eytâmca musaddak olan mahalleden ve tüccardan Metozâde Hacı Hafız Ahmed Efendi ibn Mehmed ile Kör Osmanoğlu Ruşen Efendi ibn Hacı Durmuş Fencioğlu Remzi ibn müteveffa Dursun tekrar meclis-i makud-i mezkûrde ve müdir-i muma ileyh mahzarında takrir-i kelâm ve tabir-i ani’l-merâm idub medyun-i muma ileyh Hafız Eşref Efendi’nin ceman zimmetinde edası vacib olan dokuzyüzseksenbir kuruş ile terk ve teberru eylediği meblağın edasına bizler dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’s-sadise aşer min Ramazani’l-mübarek li sene isna ve selâsîne ve selâsemie ve elf.
Baş kâtib, kadı. Muhzır İbrahim Efendi, Hacı Ahmedoğlu Şevki.
Aded 174 B: Kavaroz mahallesi
Lazistan Sancağı’nın merkezi olan Rize kasabası mahallâtından Kavaroz mahallesinden Kör Osmanoğlu Hafız Remzi Efendi ibn müteveffa Hafız Mahmud Efendi meclis-i şer’-i şerif-i enverde Eytâm müdürü Hafız Harun Efendi mahzarında takrir-i kelâm ve tabir-i ani’l-merâm idub Haldoz mahallesinden Durmuş Efendizâde müteveffa Hacı Kaşif Efendi’nin sulbîye-i sağire kızları Emine ve Havva’nın mallarından ve müdir-i muma ileyh yedinden lira-i Osmanî yüz kuruş hesabıyla istidane ve kabz ve umuruma sarfla istihlâk eylediğim sekizyüz kuruş ile semeni işbu tarihten iki sene-i kamile müeccel olmak üzere eytâm-ı mezbûrun mallarından ve müdir-i muma ileyh yedinden iştira eylediğim bir cild Ali Efendi fetvası semeninden yüzkırkdört kuruş ki ceman dokuzyüzkırkdört kuruş zimmetimde vacibu’l ve lazımu’l-kada deynim ve borcum olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbe’t-tasdiki’ş-şer’i kefalet-i vakıaları meclis-i eytâmca musaddak olan mahalleden ve tüccardan Metozâde Hacı Hafız Ahmed Efendi ibn Mehmed ile kezalik Kör Osmanoğlu Ruşen Efendi ibn Hacı Durmuş Efendi ve yine mahalleden Fencioğlu Remzi Efendi ibn Dursun tekrar meclis-i makud-i mezkûrde ve müdir-i muma ileyh mahzarında her biri takrir-i kelâm ve tabir-i an’il meram idub medyun-i muma ileyh Hafız Rahmi Efendi’nin ceman zimmetinde edası vacib olan dokuzyüzkırkdört kuruş ile terk ve teberru eylediği meblağın edasına bizler dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharın zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’s-sadise aşer min Ramazani’l-mübarek li sene isna ve selâsîne ve selâsemie ve elf.
Baş kâtib, kadı. Muhzır İbrahim Efendi, Aza mülazımı Şevket Efendi.
Aded 175 B:
332 senesi ıyd-i fıtr ilamı
İşbu binüçyüzotuziki senesi Ramazanu’l mübarekin ğurresi Cuma gününden niyet edilmesiyle yevm-i mezkûrdan itibaren sıyama ibtidar olunmasını tekmil-i selasin ile el-yevm arafe-i ğufran ihtiva ve yarınki Pazar günü ıyd-i said-i fıtr olduğu bera-i ilan-ı belediyeye havale buyurulması babında emr-u irade hazreti men lehu’l emrindir. Fi ? Ramazan sene 1332
Baş kâtib, kadı.
Aded 176 B:
Salarha Likoz karyesinden Civelekoğlu Ahmed Efendi bin Memiş’in sübut-i verâsetine dair tanzîm olunan taksim ilamıdır.
Müteveffa-yi muma ileyh Ahmed Efendi’nin verâseti zevce-i menkuhe-i metrukesi Pupuze bint Tahir Ağa ile sulbîye-i kebire kızı Fatıma ve li ebeveyn karındaşı Hacı Hurşid’e munhasıra ve badehu mezbûre Pupuze vefat idub verâseti sadriye-i kebire kızı mezbûre Fatıma’ya munhasıra ve badehu mezbûr Hacı Hurşid vefat idub verâseti sulbî kebir oğulları Mustafa ve Kemal ve Behlul ve Sadık Efendiler’e munhasıra ve badehu mezbûre Fatıma dahi vefat idub verâseti mezbûr Sadık Efendi ile li ebeveyn âmmi oğulları merkumun Mustafa ve Kemal ve Behlul ve Sadık Efendiler’e munhasıra idugi ve deruni ilmuhaber mealinden müstebân ve mesele-i mirasları altmışdört sehmden ibaret olub siham-ı mezkûreden onbirer sehmden otuzüç sehmi Mustafa ve Kemal ve Behlul’e ve otuzbir sehmi mezbûr Sadık Efendi’ye isabet eder. Fi 8 Şevval sene 1332
Baş kâtib, kadı.
Aded 177 B: Ğorğor karyesi
Lazistan Sancağı’nın merkezi olan Rize kazası kurâsından Ğorğor karyesinden iken bundan akdem vefat eden Sofioğlu Mustafa bin Yunus bin Ömer’in sulbî sağir oğlu Mehmed ile sulbîye-i sağire kızları Nokta ve Emine’nin pederleri müteveffa-yi mezbûrdan mevrus mallarını hıfz ve umurlarını tesviye ve ru’yete kıbel-i şer’iden bir vasi nasbı ehem ve elzem olmağın emanet ile marûf ve istikamet ile mevsûf olub her vecihle vesâyet uhdesinden gelmeğe kadir idugi karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve müslimin-i mezbûrun ihbarlarıyla lede’ş-şer’il enver zâhir ve nümâyân olan li ebeveyn erkarındaşları İsmail siğar-ı mezbûrunun pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi ve üzerine zatı Mustafa bin Hacı Receb ile Maksud bin Memiş tarifleriyle muarrefe olan anaları Fatıma bint Reşid Efendi nazır nasb u tayin olunduklarında onlar dahi ber vech-i muharrer vesâyet ve nezaret-i mezkûreleri kabul ve hizmet-i lazımelerini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’r-râbi min Ramazani’l-mübarek li sene isna ve selâsîne ve selâsemie ve elf.
Baş kâtib, kadı. Maksud bin Memiş, Mustafa bin Hacı Receb.
Aded 178 B:
Emineddin mahallesinden Sofizâde Hacı Mehmed bin Hacı Mahmud Efendiler’le sübut-i verâsetlerine tanzîm olunan taksim müzekkiresidir.
Müteveffa-yi muma ileyh Hacı Mehmed Efendi’nin verâseti zevce-i menkuhe-i metrukesi Hafize Hanım ile sulbî kebir oğulları Hasan Rıza ve Hüseyin Hüsnü ve Mahmud Şevki Efendiler ve sulbîye-i kebire kızları Şükrüye ve Mahfuze’ye munhasıra olduğu işbu ilmuhaberden anlaşılıb şu halde mesele-i mirasları bi hükmi’l feraiz altmışdört sehmden olub siham-ı mezkûreden sekiz sehmi zevce-i mezbûre ve ondörder sehmden kırkiki sehmi benun-i mezbûr una yedişer sehmden ondört sehmi bintan-i mezbûr etana isabet eylediği beyan olunur. Fi 19 Şevval sene 1332 ve fi 13 Ağustos sene 1330
Baş kâtib, kadı.
Aded 179 B: Yapraklar karyesi
Lazistan Sancağı’nın merkezi olan Rize kazası kurâsından Yapraklar karyesinden olub bera-i ticaret Rusya’nın Sohum kasabasında iken orada vefat eden Hacı Ömeroğlu Ali bin Abdulkerim bin Mustafa’nın verâseti zevce-i menkuhe-i metrukesi Meryem bint Receb ile sulbî sağir oğulları Dursun ve Sefer ve Abdulkerim ve sulbîye-i sağire kızları Elmas ve Hatice’ye munhasıra olduğu bi’l-ihbar lede’ş-şer’il enver zâhir ve mütehakkık olduktan sonra verese-i mezbûrundan siğar-ı mezbûrunun valideleri ve tesviye-i umurlarına kıbel-i şer’iden mensube vasileri zatı zeyl-i vesikada muharreru’l-esâmî Mustafa ve Ali Rıza Efendiler tarifleriyle muarrefe olan zevce-i mezbûre Meryem meclis-i şer’-i şerif-i enverde pederi mezbûr Receb bin Mehmed mahzarında bi’l-vesâye ve bi’l-verâse takrir-i kelâm ve tabir-i ani’l-merâm idub murisimiz zevcim müteveffa-yi mezbûrun hıyn-i vefatında nezdinde mevcud bi’l-cümle tereke-i vafiyesiyle zımem-i nasda olan kaffe-i matlubat ve tütün damı vesair âlâtını mahallinde vazıu’l-yed olan ve alakadar bulunanlardan ve müsteciri olduğu tarladaki mahsulat ve emval-i menkulesini icab edenlerden aid olduğu mehâkim ve mecalisde taleb ve dava ve ahz u kabza ve bunları semen misilleriyle her nevi evrakı talibine bey’ ve teslim ve temlike ve semen-i mezkûr ile kaffe-i makbuzatını bana irsal ve isal ve teslime ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve tahtîm ve takdîmine ve mümeyyiz ve ehl-i vukuf tayine ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile pederim mezbûr Receb’i bi’l-verâse ve bi’l-vesâye vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sabi min Şevvali’l-mükerrem li sene isna ve selâsîne ve selâsemie ve elf.
Baş kâtib, kadı. Rakıcıoğlu Rıza Efendi ibn Tevfik Efendi, Rakıcızâde Mustafa Efendi ibn İzzet Efendi.