Aded 329: Aron
Vefeyat-ı askeriyeden olub Aron karyesinden Sofoğlu Ömer bin Ahmed hakkında tanzîm olunan mukteza verâset ilamıdır.
Müteveffay-ı mezbûr Ömer’in verâseti zevce-i menkuhe-i metrukesi Rukiye bint Arif ile anası Havva bint Harun ve sulbî sağir oğlu Mustafa ve sulbîye-i sağire kızları Fatıma ve Ayşe ve Gülizar’a munhasıra olduğu bi’l muhâkeme sabit ve sübut-i verâsetlerine hükm-i şer’i lâhik olduğu ve mesele-i mirasları bi hükmi’l feraiz yüzyirmi sehmden olub siham-ı mezkûreden onbeş sehmi zevce-i mezbûreye yirmi ve sehmi ümmü mezbûreye ve otuzdört sehmi mezbûr Mustafa’ya ve onyedişer sehmden ellibir sehmi dahi benat-i sağirat-i mezbûrât Fatıma ve Ayşe ve Gülizar’a isabet eylediği arz ve i’lâm olundu. Fi 17 Muharremi’l-haram sene 1332
Mukabele olmuştur. Baş kâtib, kadı.

Aded 330: Umma Tarikler
Lazistan Sancağı’nın merkezi olan Rize kazası kurâsından Umma Tarikler karyesinden olub şahs-ı zeyl-i vesikada muharreru’l-esâmî müslimîn tarifleriyle muarrefe olan Tavukçuoğlu Ömer bin İsmail meclis-i şer’-i şerif-i enverde Tavukçuoğlu Murad Efendi ibn Memiş Efendi mahzarında ikrar-ı tam ve takrir-i kelâm idub nefs-i Umma karyesinde vâki karındaş ve kızkarındaşlarımla basened-i hakani şayıan mutasarrıf olduğum malûm ve müteârefu’l-hudud bir kıta arazideki hisse-i şayiamı kızkarındaşımın oğlu Behzad bin Yusuf’a bedel-i malûmum ve makbuzum mukabelesinde memuru huzurunda ferağ ve tefvize ve muamele-i saire-i lazımesini icrâ ve takririni i’tâya ve evrak-ı mukteziyeyi tarafından imza ve tahtîme ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile mezbûr Murad Efendi’yi vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l yevmi’r-râbi min Muharremi’l-haram li sene isna selâsîne ve selâsemie ve elf.

Mukabele olmuştur. Baş kâtib, kadı. Nuroğlu Hacı Sadullah, Sandıkçıoğlu İsmail Efendi, Durmuşoğlu Mesud bin Ömer.

Aded 331: Salarha Kaçıran
Vefeyat-ı askeriyeden Salarha Kaçıran karyesinden Topaloğlu Abdullah bin Mehmed’in verâset ilamıdır.
Müteveffa-yi merkum Abdullah bin Mehmed Tahir’in verâseti zevce-i menkuhe-i metrukesi Fatıma bint Abdulaziz ile sulbî sağir oğlu Kaşif Tahir ve sulbîye-i sağire kızı Ayşe’ye munhasıra olduğu bi’l muhâkeme sabit ve sübut-i verâsetlerine hükm-i şer’i lâhik olarak mesele-i mirasları bi hükmi’l feraiz yirmidört sehmden olub siham-ı mezkûreden üç sehmi zevce-i mezbûreye ve ondört sehmi ibn sağir-i mezbûre ve yedi sehmi dahi sağire Ayşe’ye isabet eylediği arz ve i’lâm olundu. Fi 19 Muharremi’l-haram sene 1332
Mukabele olmuştur. Baş kâtib, kadı.

Aded 332: Anzer-i Ulyâ
Lazistan Sancağı’nın merkezi olan Rize kazası nevâhîsinden Anzer-i Ulyâ karyesinden Gürcioğlu Tufan bin Sadullah meclis-i şer’-i şerif-i enverde Anzer-i Süfla karyesinden Alamanoğlu Emin bin Abdulfettah mahzarında takrir-i kelâm ve tabir-i ani’l-merâm idub şehrî yüz kuruş muhassas olan tekaud maaşımdan müterakim etmiş ve edecek olan mikdarın Lazistan mal sandığından ahz u kabz ile makbuzunu bana i’tâ ve teslime ve sened ve evrak-i saireyi mukteziyeyi tarafından imza ve tahtîme ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile mezbûr Emin’i vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi ğurre-i Muharremi’l-haram li sene isna ve selâsîne ve selâsemie ve elf.
Mukabele olmuştur. Baş kâtib, kadı. Mübaşir Sadık Efendi, Satıroğlu Mehmed Efendi.

Aded 333: Vonit-i Rum
Lazistan Sancağı’nın merkezi olan Rize kasabası mahallâtından Vonit-i Rum mahallesinden ve teba-i devlet-i aliyyenin rum milletinden Keşişoğlu Petro veledi Dimitri meclis-i şer’-i şerif-i enverde takrir-i kelâm ve tabir-i ani’l-merâm idub mahalle-i mezkûreden ve teba-i müşar-ı ileyhadan Yemanidoğlu Yorika veledi Anesti ile beynimizde mütehaddis hedm ve tahrib ve zarar ve ziyan davalarından dolayı mezbûr ile aid olduğu mehâkim-i hukukiye ve cezaiyenin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâ ve hacz vaz’ u fekkine ve lede’l-hâce sulh ve ibraya ve isbat-ı verâset iddiasına ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile dava vekîllerinden Hafız Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l yevmi’s sabia aşer min Muharremi’l-haram li sene isna selâsîne ve selâsemie ve elf.
Mukabele olmuştur. Baş kâtib, kadı. Likoğlu Hasan Efendi ibn Receb Efendi, Hantaloğlu İsmail Efendi.

Aded 334: Andre
Lazistan Sancağı’nın merkezi olan Rize kazası nevâhîsinden Kura-i Seba nahiyesinin Andre karyesi ahalisinden İsmailoğlu İsmail bin Hüseyin’in Zikr-i âtî dava ve muhakemeye ba hüccet-i şer’i vekîli dava vekîllerinden Hafız Hulusi Efendi ibn Salih Efendi meclis-i şer’i münîrde vekîl-i muma ileyhin Komes karyesinden Taşcıoğlu Mehmed bin Hasan ile Zehir Alioğlu kerimesi Sabire bint Ali aleyhlerinde bi’l-vekâle ikame eylediği nikâh davasından dolayı usulen davet olunub icabet etmeyen ve ihzaren celbleri içun jandarmaya müzekkire tastir edildiği halde bir müddet iktiza etmeleriyle ahiren canib hükümetten bi’t takib der dest ve tevkif olunan merkum Mehmed hazır olduğu halde zatı muarrefe mezbûre Sabire dahi hazıre ve tarafından işbu muhakemeye müseccelen vekîl-i şer’i tayin eylediği Mustafa Efendi ibn İzzet Efendi muvacehesinde müvekkile-i hazıre-i mezbûre Sabire on seneden mütecaviz bir zamandan beri mahzar-ı şuhudda münakid nikâh vecihle ve yüzkırkbir kuruş mehr-i muaccel müstevfi ve dörtyüz kuruş mehr-i müeccel tesmiyeleriyle müvekkilem İsmail’in zevce-i menkuhe-i medhul-i bihâsı olduğu halde ahiren hilaf-ı şer’-i şerif nefsini hazır merkum Mehmed’e teslim ve tezvic eylediğinden beyyinlerinin tefrikiyle müvekkilem İsmail’in mesken-i şer’îsine gelerek kelevvel zevc-i müvekkil-i mezbûr İsmail’e itaat ve inkiyadına tenbih olunmak matlubumdur deyu dava ve lede’s-sual mezbûr Mehmed dahi cevabında mezbûre Sabire ber vechi iddia müddeî ve müvekkil-i mezbûr İsmail’in zevce-i menkuhe-i medhul-i bihâsı olduğunu ikrar ve itiraf idub lakin mezbûr İsmail zevcesi mezbûre Sabire’yi üçyüzyirmisekiz senesi mayıs evailinde ve mahzar-ı şuhudda üç talak ile bade’t tatlik sene-i merkume teşrin-i evveli evailinde mezbûre inkıza-i iddetini ikrar ile nefsini kezalik mahzar-ı şuhudda bi’l-âsale bana tezvic ve tenkih ve ben dahi yine bi’l isale tezvic ve tenkih ve kabul idub ol vechile mezbûre Sabire zevce-i menkuhe-i medhul-i bihâmdır deyu müvekkile-i hazıre-i mezbûre Sabire ve vekîl-i muma ileyh Mustafa Efendi’nin tasdikleriyle dava ve tekrar lede’s-sual müddeî vekîli Hafız Hulusi Efendi mezbûre zevc-i müvekkilim İsmail’in hanesinden babası Ali’nin hanesine gittiğinde iki gün sonra nefsini merkum Mehmed’e teslim ile kaçdığını ve müteakiben müracaatla ikame-i dava eylediğini ve talak-i vukuu iddia olunan tarihte müvekkilim İsmail Dersaadet’de bulunduğunu ve mezbûreyi zevc-i müvekkilim mezbûr İsmail asla tatlik etmeyib el-yevm zevce-i menkuhe-i medhul-i bihâsı idugini ve vekîl-i muma ileyh Mustafa Efendi dahi ber vech-i muharrer mezbûre Sabire müddeî müvekkil-i mezbûr İsmail’den talak-ı selase ile mutallaka olarak hazır mezbûr Mehmed’in zevce-i menkuhe-i medhul-i bihâsı bulunduğunu müdafaa ve dermiyan vahdehuma müdafaa-i vakıalarını beniyye-i tevatür ile ispat edeceklerini taleb ve ityan etmeleriyle ber mucib taleb-i tarafeynden tevatür beyyine taleb olundukta müddeî vekîli muma ileyh Hafız Hulusi Efendi ihzar eylediği mezkûr Andre karyesinden Bıyıklıoğlu Süleyman bin Ömer ve Çorbacıoğlu Dursun bin Halid ve Mahmud Yahyaoğlu Osman bin Salih ve Erdaloğlu Habib bin Hasan ve Erdaloğlu Mustafa bin Memiş ve Kenanoğlu Mustafa Efendi ibn Dursun ve Timürcioğlu Mehmed bin Durmuş ve Fondoğlu Hüseyin bin Yunus ve Mehmed Receboğlu Cafer bin Arif ve Çorbacıoğlu Yusuf bin Hüseyin ve Çorbacıoğlu İslâm bin Hüseyin ve Öksüzoğlu Osman bin Hüseyin ve Şeyhoğlu Mehmed bin Ali ve Hacıoğlu Cafer bin Mustafa ve Öksüzoğlu Süleyman bin Temel ve Mehmed Receboğlu Mustafa bin Mustafa ve Erdaloğlu Tahir bin Mehmed ve Çorbacıoğlu Memiş bin Kasım ve Hacıoğlu Mikdad bin Ali ve Şerifoğlu Şakir bin Ömer ve Molla Mehmedoğlu Hüseyin bin Ahmed ve Şerifoğlu Hurşid bin Ali ve Kenanoğlu Mustafa bin Hurşid ve Hacıoğlu Numan bin Ali ve Şerifoğlu Tahir bin Osman ve Erdaloğlu Teyfur bin Memiş ve Civelekoğlu Hasan bin Memiş ve Molla Hüseyinoğlu Abdullah bin Mehmed ve Komes karyesinden Molla Mehmedoğlu Cafer bin Ömer ve Andre karyesinden Kenanoğlu Yusuf bin İbrahim ve Komes karyesinden Mollanınoğlu Yusuf bin Mustafa ve Molla Mehmedoğlu Mustafa bin Harun ve Andre karyesinden Çorbacıoğlu Mehmed bin Mahmud ve Molla Mehmedoğlu Ahmed Efendi ibn Mustafa ve Komes karyesinden Molla Mehmedoğlu Mustafa bin Dursun ve Andre karyesinden Mehmed Receboğlu Hafız Said Efendi ibn Osman ve Mehmed Receboğlu Ahmed bin Yusuf ve Köselioğlu Ahmed bin Osman ve Öksüzoğlu Habib bin Süleyman ve Humbaracıoğlu Hüseyin bin Edhem ve Erdaloğlu Yusuf bin Mehmed ve Komes karyesinden Molla Mehmedoğlu Haşim bin Hüseyin ve Andre karyesinden Molla Mehmedoğlu Mahmud bin Mustafa ve Erdaloğlu Kibar bin Mehmed ve Komes karyesinden Molla Mehmedoğlu Hacı Davud bin Ahmed nâm kırkbeş nefer müslimin-i mezbûre Sabire mezbûr İsmail’in zevce-i menkuhe-i medhul-i bihâsı olduğunu ve zevciyet beyinlerinde kaim bulunduğu sırada babası Ali’nin hanesine gittikten üç gün sonra merkum Mehmed ile beraber ikrar eylediklerini ve’l yevm mezbûre Sabire mezbûr İsmail’in zevce-i menkuhe-i medhul-i bihâsı bulunduğunu ber tafsil dava her biri ala tariki’ş şehade haber verildikleri vekîl-i muma ileyh Mustafa Efendi tarafından ihzar olunan Varda karyesinden Araboğlu İdris bin İsmail ve Komes karyesinden Taşcıoğlu Mevlud bin Osman ve Varda karyesinden Evcioğlu Şükrü bin Mehmed ve Komes karyesinden Taşcıoğlu Osman bin Ali ve Küçük Mehmedoğlu Ali Osman bin İsmail ve Araboğlu Şaban bin Hasan ve Kapse karyesinden Usta Hüseyinoğlu Bilal binMustafa ve Molla Mehmedoğlu Halil bin Mehmed ve Taşcıoğlu Hasan bin Hüseyin nâm dokuz nefer müdafa-i vakıaya muvafık surette ihbaratta bulunamayıp lede’s-sual mezbûr Mehmed mezbûre Sabire’den her biri diğer kimesne ikamesinden izhar-ı acz eylediklerini ve mezbûr İsmail’in tahlifine dahi talib olmadıklarını ifade etmelerine mebni müddeî vekîli Hafız Hulusi Efendi dava-i vakıasını yani mezbûre Sabire ile mezbûr İsmail’in zevciyet beyinlerinde cari ve kaim olduğu sırada mezbûre babası Ali’nin hanesine azimet ve azimetten üç gün sonra merkum Mehmed’le firar ve o suretle gezib dolaşmaktayken canib-i hükümetten der dest ve tevkif eylediklerini ve’l yevm mezbûre Sabire mezbûr İsmail’in zevce-i menkuhe-i medhul-i bihâsı olduğunu vechi meşruh üzere tevatüren ber nehc-i şer’i isbat itmegin ve müddeâ aleyha mezbûre Sabire ile merkum Mehmed müdafalarını isbat edemedikleri gibi diğer kimesne ikamesinden izhar-ı acz ile mezbûr İsmail’in tahlifine dahi talib olmamalarıyla mucebince mezbûre Sabire ile merkum Mehmed’in beyinlerinin tefrik ve bade inkıdai’l idde nefsini mezbûr İsmail’e teslim ile itaat ve inkiyadına mezbûre Sabire’ye ve merkum Mehmed hazır olduğu halde her birine ayrı ayrı tenbih olunduğu tescîl ve i’lâm olundu. Fi’l yevmi’t tasi min Muharremi’l-haram li sene isna selâsîne ve selâsemie ve elf.
Mukabele olmuştur. Baş kâtib, kadı.

Aded 335: Kavaroz
Lazistan Sancağı’nın merkezi olan Rize kasabası mahallâtından Kavaroz mahallesinden iken bundan akdem vefat eden Kör Abdullahoğlu Sadık Efendi bin Ali bin Abdullah’ın zevce-i menkuhe-i metrukesi ve sağir oğulları Memiş ve Ali ve Mustafa ve sulbîye-i sağire kızı Talia’nın fi 3 Rebii’l-ahir sene 1329 tarihli ve 845 numaralı hüccet-i şer’iye mucebince vasileri ve valideleri zatı zeyl-i vesikada muharreru’l-esâmî müslimîn tarifleriyle muarrefe olan Kadire bint Receb Efendi ile müteveffa-yi mezbûrun sulbî kebir oğlu Abdulkadir meclis-i şer’-i şerif-i enverde bi’l-vesâye ve bi’l-âsale takrir-i kelâm ve tabir-i ani’l-merâm idub İksenit mahallesinden Öksüzoğlu Ruşen ve Samri mahallesinden Çaloğlu Osman ve şureka-i sairesi ile beynimizde mütehaddis halît ve şerik ve arazi ve emlak ve alacak ve tecavüz-i hudud davalarından dolayı mezbûrun vesairleri tarafından aleyhime ikame olunacak her nevi deâvîden dolayı icab edenlerle aid olduğu mehâkim-i şer’iye ve hukukiye ve ticariye ve cezaiyenin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis ve itirazu’l-ğayr-i tarik ve sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve tefrik u taksime ve taleb-i keşf ve mümeyyiz ve hâkim ve ehl-i vukuf tayin ve azline ve lede’l-hâce isbat-ı verâset iddiasına ve bizim her hakkımızı ashabından taleb ve dava ve ahz u kabz ile bi’l-cümle makbuzatını bize i’tâ ve teslime ve’l-hâsıl leh ve aleyhimizde tahaddüs eden ve edecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımdan vekâlet-i âmme-i mutlaka-i sahiha-i şer’iye ile dava vekîllerinden Hafız Hulusi Efendi ibn Salih Efendi’yi kabulune mevkûfe bi’l-âsale ve bi’l-vesâye vekîl ve naib-i menab nasb u tayin eyledik dediklerinde ma vekaa bi’t-taleb ketb olundu. Fi’l yevmi’s-sani min Muharremi’l-haram li sene isna selâsîne ve selâsemie ve elf.
Mukabele olmuştur. Baş kâtib, kadı. Uzun Ömeroğlu Hafız Şaban Efendi ibn Hasan Efendi, Velioğlu Osman Efendi ibn Muharrem Efendi.

Aded 336: Mapavri’nin Murciva
Lazistan Sancağı’nın merkezi olan Rize kazası nevâhîsinden Mapavri nahiyesinin Murciva karyesinden Sipahizâde Salih Efendi meclis-i şer’-i şerif-i enverde takrir-i kelâm ve tabir-i ani’l-merâm idub benim her hakkımı ashabından aid olduğu mehâkim-i şer’iye ve nizamiye ve hukukiye ve ticariyenin ve cezaiyenin her derecesinde müddeî ve müddeâ aleyh ve şahs-ı sâlis ve itirazu’l-ğayr-i tarik sıfatlarıyla bidayeten ve iâdeten ve itirazen ve istinafen ve temyizen taleb ve dava ve ahz u kabza ve aleyhime her nevi dava ikame olur ise onlarla da ber vech-i muharrer muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve tefrik u taksime ve mümeyyiz ve hâkim ve ehl-i vukuf tayin ve azline ve taleb-i keşf ve icrâ ve hacz vaz’ u fekkine ve bi’l-cümle makbuzatını bana i’tâ ve teslime ve lede’l-hâce isbat-ı verâset iddiasına ve’l-hâsıl leh ve aleyhimde tahaddüs eden ve edecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımdan vekâlet-i âmme-i mutlaka-i sahiha-i şer’iye ile dava vekîllerinden Abdulhamid Efendi ibn Abdulkerim’i kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l yevmi’s-sani ve’l-ışrin min Muharremi’l-haram li sene isna selâsîne ve selâsemie ve elf.
Mukabele olunmuştur. Baş kâtib, kadı. Satıroğlu Mehmed Efendi, Dava vekîli Kaşif Efendi.

Aded 33(6): Peşeyan mahallesi
Lazistan Sancağı’nın merkezi olan Rize kasabası mahallâtından Peşeyan mahallesinden Vardalıoğlu Tahir Usta ibn Ömer meclis-i şer’-i şerif-i enverde takrir-i kelâm ve tabir-i ani’l-merâm idub benim her hakkımı ashabından aid olduğu mehâkim-i şer’iye ve nizamiye ve hukukiye ve ticariyenin ve cezaiyenin her derecesinde müddeî ve müddeâ aleyh ve şahs-ı sâlis ve itirazu’l-ğayr-i tarik sıfatlarıyla bidayeten ve iâdeten ve itirazen ve istinafen ve temyizen taleb ve dava ve ahz u kabza ve aleyhime her nevi dava ikame eden olur ise onlarla da ber vech-i muharrer muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve tefrik u taksime ve mümeyyiz ve hâkim ve ehl-i vukuf tayin ve azline ve taleb-i keşf ve icrâ ve hacz vaz’ u fekkine ve bi’l-cümle makbuzatını bana i’tâ ve teslime ve’l hasıl leh ve aleyhimde tahaddüs eden ve edecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımdan vekâlet-i âmme-i mutlaka-i sahiha-i şer’iye ile dava vekîllerinden Arif Efendi ibn Tevfik Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l yevmi’l ışrin min Muharremi’l-haram li sene isna ve selâsîne ve selâsemie ve elf.
Mukabele olmuştur. Baş kâtib, kadı. Mübaşir Faik Efendi, Satıroğlu Mehmed Efendi.

Aded 337: Kalamoz
Lazistan Sancağı’nın merkezi olan Rize kazası kurâsından Kalamoz karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Küçük Mehmedoğlu kerimesi Hatice bint Mustafa meclis-i şer’-i şerif-i enverde takrir-i kelâm ve tabir-i ani’l-merâm idub halen zevc-i dahilim olan Ğodri karyesinden Kotiloğlu Nazım bin Sadullah beni bila nafaka vela munfek-i şer’i terk idub bir müddet sefer-i baid olan Rusya memalikine gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf nafaka farz u takdir olunmak matlubumdur dedikte hakikat-i hal mezbûrenin takrir-i meşruhi üzere olduğu karye-i merkume imam ve muhtar ve heyet-i ihtiyariyesi tarafından mevrud ilmuhaberden müstebân ve Zikr-i âtî meblağ dahi kadr-i marûf idugi müslimin-i mezbûrun ihbarlarıyla lede’ş-şer’il enver zâhir ve nümâyân olmağın mezbûre bade’t-tahlifi’ş şer’i mucebince nafaka ve kisve bahâ vesair levazım-ı zaruriyesi içun zevc-i gaib-i mezbûr üzerine işbu tarihten itibaren beher şehrî kırk kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer zevc-i gaib-i mezbûr üzerine rucua mezbûre Hatice’ye izin verilmegin ma vekaa bi’t-taleb ketb olundu. Fi’l yevmi’s-sani ve’l-ışrin min Muharremi’l-haram li sene isna ve selâsîne ve selâsemie ve elf.
Mukabele olmuştur. Baş kâtib, kadı. Karyeden Şişmanoğlu İlyas bin Musa, Kalamoz karyesinden Kara Hasanoğlu Muharrem Efendi bin Ömer.

Aded 338: Asbet
Lazistan Sancağı’nın merkezi olan Rize kazası kurâsından Asbet karyesi sakinelerinden zatı zeyl-i vesikada muharrer’ul esami müslimîn tarifleriyle muarrefe olan Arnabudoğlu kerimesi Fatıma bint Mustafa meclis-i şer’-i şerif-i enverde takrir-i kelâm ve tabir-i ani’l-merâm idub halen zevc-i dahilim olan Varankoz karyesinden Deli İsmailoğlu Hüseyin bin Kamil beni bila nafaka vela munfek-i şer’i terk idub bir müddet-i sefer-i baid olan Samsun’a gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf nafaka farz u takdir olunmak matlubumdur dedikte hakikat-i hal mezbûrenin takrir-i meşruhi üzere olduğu karye-i merkume imam ve muhtar ve heyet-i ihtiyariyesi tarafından mevrud ilmuhaberden müstebân ve Zikr-i âtî meblağ dahi kadr-i marûf idugi müslimin-i mezbûrun ihbarlarıyla lede’ş-şer’il enver zâhir ve nümâyân olmağın mezbûre bade’t-tahlifi’ş şer’i mucebince nafaka ve kisve bahâ vesair levazım-ı zaruriyesi içun zevc-i gaib-i mezbûr üzerine işbu tarihten itibaren beher şehrî otuz kuruş farz u takdir olunub meblağ-ı mefruz-i mezkûri nafaka ve kisve-i baha vesair levazım-ı zaruriyesine harc u sarfa ve lede’l-hâce istidaneye ve inde’z-zafer zevc-i gaib-i mezbûr üzerine rucua mezbûre Fatıma kıbel-i şer’iden izin verilmegin bi’t-taleb ketb olundu. Fi’l yevmi’t tasia aşer min Muharremi’l-haram li sene isna ve selâsîne ve selâsemie ve elf.
Mukabele olmuştur. Baş kâtib, kadı. Rakıcızâde Mustafa Efendi, Asbet karyesinden Hantaloğlu İsmail Efendi.

Aded 339: Petroz
Lazistan Sancağı’nın merkezi olan Rize kazası kurâsından Petroz karyesi sakinelerinden zatı hıyn-i tevkilde muarrefe olan ve henüz onbeş yaşına dahile olduğu ve akile ve baliğa olarak ber vech-i ati fesh-i nikâhını iddia eden Hacer bint İshak’ın Zikr-i âtî muhâkeme ve muhasemeye vekîl-i müseccel-i şer’isi Abdulhamid Efendi ibn Abdulkerim meclis-i şer’i münîrde karye-i merkûmeden Hacı Hasan Efendioğlu hazır bi’l-meclis tahminen onüç yaşında sağir Yusuf bin müteveffa Hakkı Efendi’nin veli-i mücbiri ve taraf-ı şeri’den vasi-i mensubi olmayıb husus-i mezkûrde li ecli’l-husume vesayasını taraf-ı şeri’den re’y olunan li ebeveyn erkarındaşı Hüseyin bin mezbûr Hakkı Efendi muvacehesinde müvekkilem mezbûre Hacere’in veli-i mücbiri olmadığı halde veli-i akrabi bulunan amucesi ve sağir-i mezbûr Yusuf’un babası Hakkı Efendi hayatında müvekkilem mezbûreyi hal-i sağirinde tarih-i ilamdan iki sene evvel oğlu sağir-i mezbûr Yusuf’a mahzar-ı şuhudda bi’l-velâye akd ve tezvic ve sağir-i mezbûr içun kendisi kezalik ve bi’l-velâye tezevvüc ve tenkih ve kabul eylediğini müvekkilem mezbûre Hacere alime olduğu vakitten beru hıyn-ı büluğunda hıyar-ı büluğla akd-i mezkûri fesh mülahazasında iken üçyüzyirmidokuz senesi teşrin-i evvelin yirmialtıncı Cumaertesi günü ru’yet-i dem-i hayzla akile ve baliğa olduğu anda akd-i mezkûrdan i’râz ve işhar etmekle akd-i mezkûrun feshiyle hükm olunmak bi’l-vekâle matlubumdur deyu dava ve lede’s-sual mezbûr Hüseyin dahi cevabında mezbûre el-yevm onyedi yaşında olub iki sene evvel hıyn-i akidde akile ve baliğa olarak akd-i mezkûr rızasıyla icrâ olunduğu ve hatta zevci veli ve vasisi olduğum mezbûr Yusuf’un hanesine geldiğini ve işbu ibraz eylediğim nüfus-i tezkire-i osmaniyesinde dahi onyedi yaşındadır deyu müddeîye vekîlinin inkarına mukarin dermiyan eylediği tamamiha müdafasını evvelen ba veraka-i mesture mezkûr Petroz karyesi imamı Mustafa Efendi ve muhtar-ı evveli Cafer bin İdris ve muhtar-ı sanisi Abdullah bin Süleyman’dan(?) sirren ve badehu müterâfian hazır oldukları halde Rakıcıoğlu Arif Efendi ibn Yakub Efendi ve Hantaloğlu İsmail Efendi ibn Kamil’den alenen lede’t-tezkiye adl ve makbulu’ş-şehade idukleri işar ve ihbar olunan ve mezbûreyi arifan olan Petroz karyesinden Metooğlu Sefer Efendi ibn İsmail ve Bataroğlu Mehmed Reis ibn İdris’in bi’l-muvacehe tafsil-i mezkûr üzere ber nehc-i şer’i şahadetleriyle isbat itmegin mucebince vekîl-i muma ileyhin müvekkileme isabetle ber vechi meşruh ikame eylediği davası meşrua ve iltifata şayan olmadığı müvekkile-i mezbûr Hacer’e izafetle vekîl-i muma ileyh Abdulhamid Efendi’ye tenbih ve dava-i mezkûresiyle sağir-i mezbûre izafetle mezbûr Hüseyin’den bi vechi şer’i muarazadan men olunduğu tescîl ve i’lâm olundu. Fi’l yevmi’s-sâlis ve’l-ışrin min Muharremi’l-haram li sene isna ve selâsîne ve selâsemie ve elf.
Mukabele olmuştur. Baş kâtib, kadı.

Aded 340: Peşeyan
Lazistan Sancağı’nın merkezi olan Rize kasabası mahallâtından Peşeyan mahallesinden ve teba-i devlet-i aliyyenin rum milletinden Keşişoğlu Pancu bin Dimitri meclis-i şer’i münîrde merkum Pancu tarafından aleyhine ikame olunan alacak davasından dolayı Samri mahallesinden Hacı Şükrüoğlu zevcesi Hamide bint Ömer ayrı ayrı günlerde gönderilib teblîğ ettirilen üç defa davetiye verakası üzerine mezbûre Hamide mahkemeye gelmekten ve tarafından vekîl-i şer’i göndermekten imtina eylediğine ve müddeî merkum gıyaben ru’yet-i muhâkeme talebinde bulunduğuna binaen mezbûre Hamide’ye vekîl-i musahhar tayin olunan Abdulhamid Efendi ibn Abdulkerim muvacehesinde müvekkile-i mezbûrenin zevci Mehmed bin Yusuf’a bey’ ve teslim ol dahi tesellüm ve kabul eylediği eşya-i müterakime-i malûme esmanından oniki lira-i Osmanî altmışbeş kuruş zimmetinde bana deyni olub hatta meblağ-ı mezkûr sahihan zimmetinde deyni olduğuna hâvî üçyirmibeş senesi mayısının yirmiikinci günü tarihiyle müerreh ve mührüyle mahtum bir kıta deyn senedi bana i’tâ etmiş iken meblağ-ı mezkûri kable’l-ahz ve’l-istifa vefat etmekle verâseti zevce-i menkuhe-i metrukesi müvekkile-i mezbûre Hamide ile sulbî sağir oğulları Şaban ve Şevki ve sulbîye-i sağire kızı Fatıma’ya munhasıra olub müteveffa-yi mezbûrun tereke-i vafiyesine müvekkile-i mezbûre Hamide vazıu’l-yed olmağla meblağ-ı mezkûri tereke-i vafiyesinden bana eda ve îfâya mezbûreye izafetle vekîl-i musahhar-i mezbûr Abdulhamid Efendi’ye tenbih olunmak matlubumdur deyu meali-i takririne mutabık ve tarih-i mezkûrla müerreh senedi mezkûri ibraz ve iraesiyle bade’d-dava ve’s-sual vekîl-i musahhar-i mezbûr Abdulhamid Efendi dahi cevabında müddeî merkum Pancu’nun ber vechi meşruh müddeâsı malûmum değildir deyu bade’l-inkar müddeî merkum Pancu ber vech-i muharrer bitamamiha müddeâsını evvelen ba veraka-i mesture mensub oldukları mezkûr Peşeyan mahallesi imamı Hacı Eşref Efendi ibn Hüseyin Efendi ve muhtar-ı evveli Hasan Efendi ibn Hacı Mehmed Efendi ve Vonit mahallesi imamı Hafız Muharrem Efendi ile muhtar-ı evveli Abdulhalim ve azasından Hasan Efendi’den sirren ve badehu müterâfian hazır oldukları halde Ali Reisoğlu Derviş İlyas Efendi ibn Mahmud ve Ayvazoğlu İsmail bin Ali’den alenen lede’t-tezkiye adl ve makbulu’ş-şehade idukleri işar ve ihbar olunan ve zatı mezbûr eyle arifan olan mezkûr Peşeyan mahallesinden Faiszâde Hacı Ömer Efendi ibn Hacı Yusuf Efendi ve Şadzâde Ali Efendi ibn Hacı Genç Ağa’nın ber tafsil-i mezkûr şahadetleriyle vechi şer’i üzere isbat itmegin ve vekîl-i musahhar-i mezbûrun bulunamamasına mebni Mehmed Efendi ibn Ahmed Efendi vekîl-i musahhar tayin olunmağla mucebince müddeâ bih oniki lira-i Osmanî altmışbeş kuruş vazıatu’l yed olduğu zevc-i müteveffa-yi mezbûrun tereke-i vafiyesinden müddeî merkum Pancu’ya eda ve teslime müvekkile-i mezbûre Hamide izafetle vekîl-i musahhar-i mezbûr Mehmed Efendi’ye tenbih olunduğu tescîl ve i’lâm olundu. Fi’l-yevmi’s-sadis ve’l-ışrin min Zi’l-hicceti’ş-şerife li sene ihdâ ve selâsîne ve selasemie ve elf.

Mukabele olmuştur. Baş kâtib, kadı.

Aded 341: Seftar
Lazistan Sancağı’nın merkezi olan Rize kazası nevâhîsinden Karadere nahiyesinin Seftar karyesinden Vardalıoğlu nâm-ı diğeri Uzun Alioğlu Şaban bin Ali ve Yehuza bin Ömer meclis-i şer’-i şerif-i enverde her biri takrir-i kelâm ve tabir-i ani’l-merâm idub karye-i merkûmeden Kuru Mahmudoğlu Hasan bin Ali ile beynimizde mütehaddis arazi ve hakk-ı şurb ve saki ve mecra ve mesil davalarından dolayı mezbûr Hasan ile aid olduğu mehâkimin her derecesinde müddeî ve müddeâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve mümeyyiz ve hâkim ve ehl-i vukuf tayinine ve taleb-i keşf ve icrâ ve lede’l-hâce sulh ve ibraya ve isbat-ı verâset iddiasına ve’l-hâsıl mütevakkıf olduğu umûrun küllîsine tarafımızdan vekâlet-i mutlaka-i sahiha-i şer’iye ile dava vekîllerinden Hafız Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledik dediklerinde ma vekaa bi’t-taleb ketb olundu. Fi’l-yevmi’s-sâlise aşer min Muharremi’l-haram li sene isna selâsîne ve selâsemie ve elf.
Mukabele olmuştur. Baş kâtib, kadı. Satıroğlu Mehmed Efendi, Sofoğlu Yahya Efendi.

Aded 342: Sakrık karyesi
Lazistan Sancağı’nın merkezi olan Rize kazası kurâsından Sakrık karyesi sakinelerinden zatı zey-i vesikada muharreru’l-esâmî müslimîn tarifleriyle muarrefe olan Bakıroğlu kerimesi Alime bint Süleyman meclis-i şer’-i şerif-i enverde takrir-i kelâm ve tabir-i ani’l-merâm idub halen zevc-i dahilim olan karye-i mezkûreden Kotiloğlu Hüseyin bin Mehmed benimle firaşından hasıla ve benden mütevellide ve halen bi hakki’l-hidâne hacr ve terbiyemde bulunan sulbîye-i sağire kızı kızım Hacere’yi bila nafaka vela munfek-i şer’i terk idub bir müddet-i sefer-i baid olan Rusya memalikine gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf nafaka farz u takdir olunmak matlubumdur dedikte hakikat-i hal mezbûrenin takrir-i meşruhi üzere olduğu karye-i merkume imam ve muhtar ve heyet-i ihtiyariyesi tarafından mevrud ilmuhaberden müstebân ve Zikr-i âtî meblağ dahi kadr-i marûf idugi müslimin-i mezbûrun ihbarlarıyla lede’ş-şer’il enver zâhir ve nümâyân olmağın mezbûre bade’t-tahlifi’ş şer’i mucebince nafaka ve kisve bahâ vesair levazım-ı zaruriyesi içun zevc-i gaib-i mezbûr üzerine işbu tarihten itibaren beher şehrî otuzar kuruştan ceman ikisine altmış kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer zevc-i gaib-i mezbûr üzerine rucua mezbûre Alime’ye kıbel-i şer’iden izin verilmegin ma vekaa bi’t-taleb ketb olundu. Fi’l yevmi’l-hamis ve’l-ışrin min Muharremi’l-haram li sene isna ve selâsîne ve selâsemie ve elf.

Mukabele olmuştur. Baş kâtib, kadı. Karyeden Bakıroğlu Kaşif bin Ali, Sakrık karyesinden Ömeroğlu Halil bin İbrahim.

Aded 343: Kavaroz mahallesi
Lazistan Sancağı’nın merkezi olan Rize kasabası mahallâtından Kavaroz mahallesinden zatı zeyl-i vesikada muharreru’l-esâmî müslimîn tarifleriyle muarefe olan Gül Hanım bint Rıfat Efendi meclis-i şer’-i şerif-i enverde Mapavri nahiyesinin Yaka karyesinden Sofoğlu Hacı Mahmud Efendi ibn Ömer Efendi mahzarında ikrar-ı tam ve takrir-i kelâm idub onyedi aded Osmanlı lirası mehr-i müeccel tesmiyesiyle mezbûr Hacı Mahmud Efendi’nin zevce-i menkuhe-i medhul-i bihâsı iken zevcim mezbûr beni talak-ı bayin ile tatlik ettikten sonra tekrar beni tezvice talib ve rağıb olmağla ben dahi rızamla mehr-i müsemma-i sabıkım olan onyedi aded lira-i Osmanî zimmetinde alacağım kalmamak üzere mehr-i mezkûrun nısfı olan sekiz buçuk Osmanlı lirası mehr-i müeccel tesmiyesiyle işbu meclis-i şeri’de ve mahzar-ı şuhudda nefsimi mezbûr Hacı Mahmud Efendi’ye akd ve tezvic ve tenkih eylediğimde ol dahi ber vech-i muharrer tezevvüc ve kabul eyledi dedikte mezbûr Gül Hanım’ı sadıre olan kelimat-ı meşruhesinde mezbûr Hacı Mahmud Efendi vicahen ve şifahen kabul ve tasdik itmegin ma vekaa bi’t-taleb ketb olundu. Fi’l yevmi’s-samin min Muharremi’l-haram li sene isna selâsîne ve selâsemie ve elf.
Mukabele olmuştur. Baş kâtib, kadı. Gül Ahmedoğlu Sadık bin Ahmed, Dava vekîli Abdulhamid Efendi, Hasan Efendizâde Osman Zeki Efendi.

Aded 344: Piri Çelebi mahallesi
Lazistan Sancağı’nın merkezi olan Rize kasabası mahallâtından Piri Çelebi mahallesinden Lazoğlu Hacı Kemal Efendi ibn Hacı Ahmed meclis-i şer’i münîrde Arğaloz karyesinden Keçelioğlu Ali bin Hızır muvacehesinde işbu ibraz eylediğim deyn-i sened-i natık olduğu üzere müddeî aleyh Ali’nin babası Hızır’dan cihet-i karzdan alacağım olan beş aded lira-i Osmanî altı kuruş kable’l-ahz ve’l-istifa vefat etmekle verâseti zevce-i menkuhe-i metrukesi Şişe bint Hüseyin ile sulbî kebir oğulları müddeî aleyh Ali ve Salih ve sulbî sağir oğlu Kazım ve sulbîye-i sağire kızı Hacer ve sulbîye-i sağire kızları Fatıma ve Rukiye’ye munhasıra olub müteveffa-yi mezbûrun tereke-i vafiyesine oğlu müddeâ aleyh mezbûr Ali vazıu’l-yed olmağla tereke-i vafiyesinden meblağ-ı mezkûri bana eda ve îfâya mezbûr Ali’ye tenbih olunmak matlubumdur deyu meali takririne mutabık üçyüzyirmiüç senesi Haziran’ının birinci günü tarihli sened-i mezkûri ibraz ve iraesiyle bade’d-dava ve’s-sual müddeâ aleyh Ali dahi cevabında babası müteveffa-yi mezbûrun tereke-i vafiyesine vazı’u yedini ve müddeâya beş lira-i Osmanî altı kuruş müddeiye-i mezbûre borcu olduğunu taven ve kendi malından tamamen eda ve îfâya müteahhid ve kefil-i mutlak olub ancak bir sene istimhal etmekle müddeî mezbûr Hacı Kemal Efendi dahi bi’l-muvafaka ol vechile meblağ-ı mezkûrun taht-ı hükme alınmasını taleb etmekle ifraz ve kefalet-i vakıası mucebince meblağ-ı mezkûr beş lira-i Osmanî altı kuruş bir sene-i kamile hitamında müddeâ aleyh mezbûr Hacı Kemal Efendi’ye eda ve teslime mezbûr Ali’ye tenbih olunduğu tescîl ve i’lâm olundu. Fi’l yevmi’s-sadise aşer min Muharremi’l-haram li sene isna selâsîne ve selâsemie ve elf.

Mukabele olmuştur. Baş kâtib, kadı.

Aded 345: Haldoz mahallesi
Lazistan Sancağı’nın merkezi olan Rize kasabası mahallâtından Haldoz mahallesinden zatı zeyl-i vesikada muharreru’l-esâmî müslimîn tarifleriyle muarefe olan Nezaket bint Kamil meclis-i şer’-i şerif-i enverde Muskas karyesinden Süleymanoğlu Vehbi Genç Ağa bin Şükrü muvacehesinde ben mezbûr Vehbi Genç Ağa’nın sulbî kebir oğlu İsmail’in zevce-i menkuhe-i medhul-i bihâsı olub zevcim mezbûr İsmail’in babası kaim pederim mezbûr Vehbi Genç Ağa’yı bana muin ittihad(?) ederek zevcim mezbûr İsmail asker edildikten sonra diyar-ı ecnebiyyeye azimet ve gaybubet edildiği halde(?) nafaka ve kisveye muhtace olmamla zevcim gaib-i mezbûrun babası Vehbi Genç Ağa üzerine kadr-i marûf meblağ farz u takdir olunmak matlubumdur dedikte ğıbbe’t-tasdiki’ş-şer’i Zikr-i âtî meblağ kadr-i marûf idugi müslimin-i mezbûrun ihbarlarıyla lede’ş-şer’il enver zâhir ve nümâyân olmağla mucebince oğlu gaib İsmail’e müracaat etmek üzere mezbûr Nezaket’in nafaka ve kisve bahâ vesair levazım-ı zaruriyesi içun mezbûr Vehbi Genç Ağa üzerine işbu tarih-i vesikadan itibaren beher yevm bir kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer mezbûr Vehbi Genç Ağa üzerine rucua mezbûre Nezaket’e kıbel-i şer’iden izin verilmegin ma vekaa bi’t-taleb ketb olundu. Fi’l yevmi’t tasi ve’l-ışrin min Şevvali’l-mükerrem li sene isna selâsîne ve selâsemie ve elf.
Mukabele olmuştur. Baş kâtib, kadı. İbrahim Reisoğlu Mustafa bin Mahmud, Nevruzoğlu Ali Efendi ibn Hacı Memiş.

Aded 346: Emineddin mahallesi
Zikr-i âtî hususun mahallinde ketb u tahrir içun canib-i şeriat-i ğarradan mezunen irsal olunan umenadan mahkeme-i şer’iye baş kâtibi Osman Zeki Efendi bin Salih Efendi Lazistan Sancağı’nın merkezi olan Rize kasabası mahallâtından Emineddin mahallesinde Zırhzâde Şaban Efendi ibn Hacı Hasan’ın menziline varub zeyl-i vesikada muharreru’l-esâmî müslimîn huzurlarında akd-i meclis-i şer’i âli ettikde menzil-i mezkûrda sakine muma ileyh Hacı Şaban Efendi’nin zevce-i menkuhesi zatı müslimin-i mezbûrun tarifleriyle muarrefe olan Hace Dürriye Hanım bint Hacı Ali Efendi meclis-i makud-i mezkûrde sadriy kebir oğlu Necmeddin Efendi ibn muma ileyh Hacı Şaban Efendi mahzarında takrir-i kelâm ve tabir-i ani’l-merâm idub bundan akdem vefat eden pederim muma ileyh Hacı Ali Efendi’nin bi’l-cümle emlak ve arazi ve akaratından hisse-i irsîye ve müntakılemi ve pederim müteveffa muma ileyh zimmetinde olan meblağ-ı malûme alacağımı vazıu’l-yed olan ve icab edenlerden aid olduğu mehâkim-i şer’iye ve nizamiyenin her derecesinde bidayeten ve iâdeten ve itirazen ve istinafen ve temyizen taleb ve dava ve tefrik u taksime ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve hisse-i müfreze ve şayiamı icar-ı misliyle talibine icar ve teslime ve icar-ı mezkûr ile şimdiye kadar teraküm eden ve edecek olan icaratını ahz u kabza ve makbuzatını bana i’tâ ve teslime ve mümeyyiz ve hâkim ve ehl-i vukuf tayinine ve taleb-i icrâ ve hacz vaz’ u fekkine ve lede’l-hâce isbat-ı verâset iddiasına ve ber vech-i muharrer ahari tevkil ve azle ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile oğlum Necmeddin Efendi’yi vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sabi min şehr-i Rebii’l-evvel li sene isna selâsîne ve selâsemie ve elf.
Mukabele olmuştur. Baş kâtib, kadı. Hasan Efendizâde Ahmed Efendi ibn Mahmud, Tüfenkcizâde Mehmed Şevket Efendi ibn Mahmud Efendi.

Aded 347: Fatla karyesi
Lazistan Sancağı’nın merkezi olan Rize kazası kurâsından Fatla karyesinde vâki camii-i şerifin kıbel-i şer’iden ba hüccet-i şer’iye mütevellisi bulunan Alioğlu Ali Efendi ibn Memiş meclis-i şer’i münîrde karye-i merkûmeden Çakıroğlu Memiş bin Ali muvacehesinde işbu ibraz eylediğim üçyirmisekiz senesi eylülünün birinci günü tarihli bir kıta deyn-i sened mucebince mütevellisi olduğum camii-i şerif-i mezkûrun nukûd-i mevkûfesinden yekdeğerine kefalet-i mutlaka ile kefil bi’l-mal olmak üzere mezbûr Memiş ile oğlu gaib ani’l-meclis Haşim’in onyedi aded Osmanlı lirası ve lira-i Osmanî yüz kuruş hesabıyla kırk kuruş zimmetlerinde borcu olmağla meblağ-ı mezkûri asalet ve kefalet-i vakıası hasebiyle vakf içun bana eda ve teslime mezbûr Memiş’e tenbih olunmak bi’t tevliye matlubumdur deyu meali takririne mutabık ve tarih-i mezkûrla müerreh ve mezbûr Memiş ile mezbûr Haşim’in imza ve hatimleriyle mahtum mezkûr senedi ibraz ve iraesiyle bade’d-dava ve’s-sual mezbûr Memiş dahi cevabında müddeî mütevelli-i mezbûr Ali Efendi’nin ber vech-i muharrer bitamamiha müddeâsını ikrar ve zimmetinde nukûd-i mevkûfeden onyedi aded Osmanlı lirası kırk kuruş borcu olduğunu itiraf itmegin mucebince meblağ-ı mezkûr onyedi aded Osmanlı lirası kırk kuruş ? vakf içun mütevelli-i mezbûr Ali Efendi’ye eda ve teslime mezbûr Memiş’e tenbih olunduğu tescîl ve i’lâm olundu. Fi’l yevmi’r-râbi ve’l-ışrin min Zi’l-kaadeti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı.
Aded 348: Aron Mağloz karyesi
Lazistan Sancağı’nın merkezi olan Rize kazası kurâsından Aron Mağloz karyesinden zatı isimleri zabt-ı ceridesinde muharreru’l-esâmî tarifleriyle muarrefe olan Sadıkoğlu kerimesi Elmas bint İsmail meclis-i şer’-i şerif-i enverde karye-i merkume ahalisinden Sadıkoğlu Abdulhalim ibn İbrahim muvacehesinde beş seneden beri yedi aded Osmanlı lirası mehr-i müeccel tesmiyesiyle mezbûr Abdulhalim’in zevce-i menkuhe-i medhul-i bihâsı iken zevcim mezbûr Abdulhalim üçyüzyirmidokuz senesi haziranı ibtidasında bir talak-ı bayin ile beni tatlik etmekle zimmetinde mutekarrer ve makud aleyh mehr-i müeccel hakkım olan mezkûr yedi aded Osmanlı lirasını bana eda ve îfâya mezbûr Abdulhalim’e tenbih olunmak matlubumdur deyu dava ve lede’s-sual mezbûr Abdulhalim dahi cevabında müddeiye-i mezbûre Elmas ber vech-i muharrer yedi aded lira-i Osmanî mehr-i müeccel tesmiyesiyle zevce-i menkuhe-i medhul-i bihâsı olduğunu taven ikrar ve itiraf idub maada talak-i müddeasını bade’l-inkar müddeiye-i mezbûre Elmas ber vech-i muharrer bitamamiha müddeâsını evvelen ba veraka-i mesture mezkûr Mağloz karyesi imamı Mehmedoğlu İsmail Efendi ibn Ali ve muhtar-ı evveli Kamil bin Mustafa’dan sirren ve badehu müterâfian hazır oldukları halde Sofioğlu Hamza bin Ahmed ve Sadıkoğlu Mustafa bin Yusuf’dan alenen lede’t-tezkiye adl ve makbulu’ş-şehade idugleri işar ve ihbar olunan ve zatı mezbûreyi arifan olan karye-i mezkûreden Sadıkoğlu Abdulkerim bin Memiş ve Sadıkoğlu Hüseyin bin Şakir’in bi’l-muvacehe ber nehc-i şer’i tafsil-i mezkûr üzere şahadetleriyle isbat itmegin mucebince meblağ-ı müddeâ bih mezkûr yedi aded lira-i Osmanîyi müddeiye-i mezbûre Elmasa eda ve teslime mezbûr Abdulhalim’e tenbih olunduğu tescîl ve i’lâm olundu. Fi’l yevmi’t tasi ve’l-ışrin min Muharremi’l-haram li sene isna selâsîne ve selâsemie ve elf.
Mukabele olmuştur. Baş kâtib, kadı.

Aded 349: Kavaroz mahallesi
Lazistan Sancağı’nın merkezi olan Rize kasabası mahallâtından Kavaroz mahallesinden Nevruzoğlu Ali bin Hacı Memiş meclis-i şer’i münîrde Filandoz karyesinden Kara Hasanoğlu Şevki bin Yusuf aleyhine ikame edildiği alacak davasından dolayı mezbûr Şevki’ye ayrı ayrı günlerde gönderilib teblîğ ettirilen üç defa davetiye verakası üzerine mezbûr Şevki mahkeme-i şer’iyeye gelmekten ve tarafından vekîl-i şer’i göndermekten imtina idub müddeî mezbûr Ali’nin gıyaben ru’yet-i muhâkeme talebine mebni müddeâ aleyh mezbûr Şevki’nin hukukunu muhafaza ve müdafaya vekîl-i musahhar tayin olunan Abdulhamid Efendi ibn Abdulkerim muvacehesinde nizam-i mahsus vecihle taraf-ı hükümetten müzayedeye vaz’ olunan Rize kazasının üçyüzyirmidört senesi hayvan ve zebhiye rüsûmi ile munzami uhdeme ihale olunduktan sonra kaza-i mezkûrun garben Kalapotomoz(?) ve cenuben Karadere nahiyesi şarken Arğaloz deresi hududu dâhilinde olan mevakide alınıb satılacak ve zebh olunacak hayvan-i rüsûmi munzami yirmiiki aded Osmanlı lirası bedel ile müvekkil-i mezbûr Şevki’nin pederi mezbûr Yusuf bin Ömer’e bey’ ve ilzam ol dahi ber vech-i muharrer kabul ve iltizam idub meblağ-ı mezkûrun yedi aded tam yüzlük mecîdi altınını bana i’tâ ve teslim ederek mütebaki onbeş aded tam yüzlük mecîdi altınını üç taksidde ve senesi tarafında tediye etmek üzere bir kıta deyn senedi i’tâ etmiş iken meblağ-ı mezkûri kable’l-ahz ve’l-istifa vefat etmekle verâseti zevce-i menkuhe-i metrukesi Nadire bint Abdullah ve sulbî kebir oğlu müvekkil-i mezbûr Şevki ve sulbî sağir Ömer’e munhasıra olub müteveffa-yi mezbûrun tereke-i vafiyesine oğlu müvekkil-i mezbûr Şevki bi’l-verâse vazıu’l-yed olduğundan meblağ-ı mezkûri vazıu’l-yed olduğu babası müteveffa-yi mezbûrun tereke-i vafiyesinden olmak üzere bana eda ve teslime müvekkil-i mezbûr Şevki’ye izafetle vekîl-i musahhar muma ileyh Abdulhamid Efendi’ye tenbih olunmak matlubumdur deyu meali takririne mutabık üçyüzyirmidört senesi martının otuzbirinci günü tarihiyle müerreh ve müteveffa-yi mezbûr Yusuf’un mührüyle mahtum sened-i mezkûri ibraz ve iraesiyle bade’d-dava ve’s-sual vekîl-i musahhar muma ileyh Abdulhamid Efendi dahi cevabında müddeî mezbûrun ber vech-i muharrer müddeâsını inkarına mukarin müddeî mezbûr Ali ber vech-i muharrer bitamamiha müddeâsını ve verâset ve vazıu yedini evvelen ba veraka-i mesture Vila karyesi muhtar-ı evveli Mustafa ve azasından Molla Ahmedoğlu Maksud bin Mehmed ve Beledî Reisi Hacı Hasan Efendi ibn Hacı Şakir ve azasından Hasan Efendi ibn Hacı Mehmed’den sirren ve badehu müterâfian hazır oldukları halde Kozandinoz karyesinden Sakanınoğlu Hüseyin bin Osman ve Vila karyesinden Kopuzoğlu Akif bin Hasan’dan alenen lede’t-tezkiye adl ve makbulu’ş-şehade idugleri işar ve ihbar olunan Vila karyesinden Kopuzoğlu Hacı Arif ibn Mehmed ile Piri Çelebi mahallesinden Beledî Sanduk Emini Kolçakoğlu Sabri Efendi ibn Ruşen Efendi nâm kimesnelerin tafsil-i mezkûr üzere ber nehc-i şer’i şahadetleriyle bi’l-muvacehe isbat itmegin müddeâ aleyh bade’t-tahlifi’ş şer’i mucebince müddeâ bih mezkûr onbeş aded lira-i Osmanîyi vazıu’l-yed olduğu babası ve murisi müteveffa-yi mezbûr Yusuf’un tereke-i vafiyesinden müddeî mezbûr Ali’ye eda ve teslime müvekkil-i mezbûr Şevki’ye izafetle vekîl-i musahhar muma ileyh Abdulhamid Efendi’ye tenbih olunduğu tescîl ve i’lâm olundu. Fi’l yevmi’s sabi min şehr-i Rebii’l-evvel li sene selâsîne ve selasemie ve elf.
Mukabele olmuştur. Baş kâtib, kadı.

Aded 350: İksenit mahallesi
Lazistan Sancağı’nın merkezi olan Rize kasabası mahallâtından İksenit mahallesinden iken bundan akdem vefat eden Bekiroğlu Mehmed Kaptan bin Mustafa’nın ber vechi ati varisi olduğunu iddia eden sulbîye-i kebire kızı Rukiye bint mezbûr Mehmed Kaptan meclis-i şer’i münîrde müteveffa-yi mezbûrun medyuni Hamrik mahallesinden Mercanoğlu Cafer bin Mustafa mahzarında üzerine dava ve takrir-i kelâm idub pederim müteveffa-yi mezbûrun verâseti sadriye-i kebire kızı olduğum cihetle benimle sulbî oğulları Salih ve Ali ve sulbîye-i kebire kızı Şuşuka’ya munhasıra ve badehu mezbûr Ali vefat idub verâseti zevce-i menkuhe-i metrukesi Hafize bint Hacı Ali ile sulbî kebir oğlu Mustafa’ya munhasıra ve badehu ibnu’l-mezbûr Salih vefat idub verâseti zevce-i menkuhe-i metrukesi Rukiye bint Hacı Ahmed ile sadriye-i kebire kızı Hamdiye ve li ebevyn emucesi oğlu İbrahim bin Hacı Ahmed’e munhasıra ve badehu zevce-i mezbûre Hafize vefat idub verâseti sadriy kebir oğlu Mustafa’ya munhasıra ve tashih-i mesele-i mirasları bi’l-munasahiti’ş şer’iye yirmidört sehmden olub siham-ı mezkûrdan dört sehmi mezbûre Rukiye’ye ve dört sehmi bintu’l-mezbûre Şuşuka’ya ve bir sehmi zevce-i mezbûre Rukiye’ye ve dört sehmi bintu’l-mezbûre Hamdiye’ye ve üç sehmi mezbûr İbrahim’e ve sekiz sehmi ibnu’l-mezbûr Mustafa’ya isabet idub başka varisi ve terekesine mustahık-i ahar kimesnesi olmamağla pederim müteveffa-yi mezbûrun hayatında mezbûr Cafer zimmetinde cihet-i karzdan alacak hakkı olan yirmidört kuruş kable’l-ahz ve’l-istifa vefat etmekle meblağ-ı mezkûrdan ber mûceb-i mesele-i miras hisse-i irsîyem olan dört kuruş bana eda ve teslime mezbûr Cafer’e tenbih olunmak bi’l-verâse matlubumdur deyu dava ve lede’s-sual ol dahi cevabında fi’l-hakika müteveffa-yi mezbûre ol mikdar kuruş zimmetinde halen deyni olduğunu taven ikrar ve itiraf idub maada müddeiye-i mezbûrenin ber vech-i muharrer verâset müddeâsı malûmum değildir deyu inkâr etmekle müddeiye-i mezbûre verâset müddeâsını evvelen ba veraka-i mesture mensub oldukları mezkûr Diğer İksenit mahallesi muhtarı Reşid bin Hacı Abdullah ve azadan Şakir bin Mehmed’den sirren ve badehu müterâfian hazır oldukları halde Yazıcıoğlu Ömer bin Yusuf ve Gürcioğlu Şakir bin Hacı Ahmed’den bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idugleri işar ve ihbar olunan ve tarafeyn ve müteveffa-yi mezbûr uni arifan olan mezkûr Diğer İksenit mahallesinden Zaimoğlu Hacı Hasan bin Ahmed ile Zaimoğlu Mahmud Efendi ibn Hasan nâm kimesne gerek kezalik bi’l-muvacehe ve tafsil-i mezkûr üzere ber nehc-i şer’i şahadetleriyle isbat itmegin mucebince verâsetlerine bade’l-hükm müddeâ bih meblağdan müddeiye-i mezbûrenin hisse-i irsîyesine isabet eden dört kuruş müddeiye-i mezbûreye eda ve teslime müddeâ aleyh mezbûr Cafer’e tenbih olunduğu tescîl ve i’lâm olundu. Fi’l yevmi’s-sani min Saferi’l-hayr li sene isna ve selâsîne ve selâsemie ve elf.
Mukabele olmuştur. Baş kâtib, kadı.

Aded 351: Asbet karyesi
Der-i devlet mekine arz-ı dai kemineleridir Lazistan Sancağı’nın merkezi olan Rize kazası kurâsından Asbet mevkiinde kâin Petroz karyesi ahalisinden Hotoroğlu Ahmed bin Yusuf ve Kirişoğlu Tufan bin Memiş ve Memikaoğlu Salih bin Mustafa ve Metooğlu Sefer Efendi ? ve Akreboğlu Hüsni bin Salih ve Kirişoğlu Beşir bin Mehmed ve Hortoroğlu Durali bin Yusuf ve Elhazoğlu Abdullah bin Süleyman ve Memikaoğlu Yakub bin Mustafa nâm müslimin bi ecmaihim meclis-i şer’i meali makudda her biri takrir-i kelâm ve tabir-i ani’l-merâm idub karyemiz olan mezkûr Petroz karyesinde vâki camii-i şerifin ba berat-ı âlîşân hatibi bulunan Kirişoğlu İsmail Efendi ibn Mahmud’un bundan akdem vukuu vefatına mebni cihet-i mezkûre münhal kalub ikame-i salât-i Cuma ve ideyn olunmağa eşed ihtiyac ile muhtac olduğumuzdan müteveffa-yi muma ileyhin henüz cihet-i mezkûreyi imtihanen taleb etmek sinnine vasıl olmayan oğulları Mahmud ve Hasan ve Hüseyin ve Muharrem’e niyabete mezkûr hitabet cihetinin cümlemizin muhtar ve müntehabı olan işbu hazır bi’l-meclis karyemiz ahalisinden Tarakçıoğlu Mehmed Celal Efendi ibn Hacı Hüseyin’e tevcih ve izin ve icazeti hâvî ferman-ı âli suduru niyazında olduğumuz der-i devlet medara arz olunmak matlubumdur dediklerinde hakikat-i hal ahali-i mezbûrunun takrir-i meşruhları üzere bulunduğu lede’t tahkik zâhir ve nümâyân olduğu gibi karye-i merkumenin yirminci hanesinin ikinci numarasında mukayyed ve binikiyüzdoksanaltı senesinde tevellüd idub kura ve bakaya ve firarisi olmadığı cihet-i askeriyeden mevrud mazbata ve nüfus künye pusulası mealinden müstebân olan ve cedid nizamname vecihle bi’l ilan başka talib zuhur etmemesi üzerine mezkûr hitabet cihetinin ekber evladı olan mezbûr Mahmud’a niyabet suretiyle teşekkül eden heyet ve eimme-i ilmiye huzurunda imtihan icrasıyla ehliyeti sabit olan işbu baisu’l-arz muma ileyh Mehmed Celal Efendi dailerine tevcihe ve yedine berat-ı şerif-i âlîşân sadaka ve ihsan buyurulmak ricası paye-i serir-i âlâya arz ve i’lâm olundu el emr li meni’l hazreti veliyi’l emr fi’l yevmi’s-samine aşer min Muharremi’l-haram li sene isna ve selâsîne ve selâsemie ve elf.
Mukabele olmuştur. Baş kâtib, kadı.

Aded 352: Umma Tuğlu karyesi
Lazistan Sancağı’nın merkezi olan Rize kazası kurâsından Umma Tuğlu karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Bıçakçıoğlu kerimesi Emine bint Zekeriyya meclis-i şer’-i şerif-i enverde takrir-i kelâm ve tabir-i ani’l-merâm idub halen zevc-i dahilim olan karye-i mezkûreden Bıçakçıoğlu Şaban bin Hüseyin bundan akdem beni bila nafaka vela munfek-i şer’i terk idub müddet-i sefer-i baid olan Rusya memalikine gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf meblağ farz u takdir olunmak matlubumdur dedikte hakikat-i hal mezbûrenin takrir-i meşruhi üzere olduğu karye-i merkume imam ve muhtarı tarafından mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olub Zikr-i âtî meblağ dahi kadr-i marûf idugi ihbar ve işar olunmağın mezbûre bade’t-tahlifi’ş şer’i mucebince nafaka ve kisve bahâ vesair levazım-ı zaruriyesi içun zevci gaib-i mezbûr üzerine işbu tarihten itibaren beher şehrî kırkbeş kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer zevci gaib-i mezbûr üzerine rucua mezbûre izin verilmegin ma vekaa bi’t-taleb ketb olundu. Fi’l-yevmi’s-sabi min Saferi’l-hayr li sene isna ve selâsîne ve selâsemie ve elf.
Mukabele olmuştur. Baş kâtib, kadı. İsmailoğlu Memiş bin İsmail, Berberoğlu Mehmed bin Hacı Hasan

Aded 353: Çoncik karyesi
Lazistan Sancağı’nın merkezi olan Rize kazası kurâsından Çoncik karyesinden iken bundan akdem vefat eden Küçük İslâmoğlu Zekeriyya Efendi ibn Hacı Cevahir’in sulbî sağir oğlu Zulkarneyn’in pederi müteveffa-yi mezbûrdan mevrus malını hıfz ve umurunu tesviye ve ru’yete kıbel-i şer’iden bir vasi nasbı ehem ve elzem olmağın emanet ile marûf ve istikamet ile mevsûf olub her vecihle vesâyet uhdesinden gelmeğe kadir idugi karye-i merkume imam ve heyet-i ihtiyariyesinden mevrud ilmuhaberden müstebân ve müslimin-i mezbûrun ihbarlarıyla lede’ş-şer’il enver zâhir ve nümâyân olan işbu baisu’l-vesika sağir-i mezbûrun li ebeveyn amucesi Mehmed bin mezbûr Hacı Cevahir sağir-i mezbûrun pederi müteveffa-yi mezbûrdan mevrus malını hıfz ve vakt-i rüşd-i sedadlarına değin umurunu tesviye ve ru’yete vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sabi min Saferi’l-hayr li sene isna ve selâsîne ve selâsemie ve elf.
Mukabele olmuştur. Baş kâtib, kadı. Çavuşoğlu Zekeriyya bin Mehmed, Molla Ahmedoğlu Cemal Efendi ibn Hacı Mehmed Efendi.

Aded 354: Lazistan Muhasebecisi
Lazistan Sancağı Muhasebecisi Hasan Tahsin Efendi ibn Mehmed Emin Efendi meclis-i şer’-i şerif-i enverde Eytâm müdürü Hafız Harun Efendi mahzarında takrir-i kelâm ve tabir-i ani’l-merâm idub Tenekeci müteveffa İbrahim Efendi kerimesi Emine’nin malından lira-i Osmanî yüz kuruş hesabıyla müdir-i muma ileyh yedinden istidane ve kabz ve umuruma sarfla istihlâk eylediğim binsekizyüzdoksan kuruş otuz para ile semeni işbu tarihten bir sene-i kamile müeccel olmak üzere eytâm-ı mezbûrenin malından ve müdir-i muma ileyh yedinden iştira eylediğim bir cild Ali Efendi fetvası semeninden yüzyetmişbir kuruş ki ceman ikibinaltmışbir kuruş otuz para zimmetimde vacibu’l-eda ve lazımu’l-kada deynim ve borcum olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbet’t tasdiki’ş-şer’i kefalet-i vakıaları meclis-i eytâmca musaddak olan Peşeyan mahallesinden Ahmed Ağazâde Emrullah Efendi ibn Hasan Yazıcı(?) ile Emineddin mahallesinden Tüfenkcizâde Mehmed Efendi ibn Mahmud Efendi ve muhasebe-i liva baş kâtibi Muhsin Efendi ibn Tufan Efendi tekrar meclis-i makud-i mezkûrde her biri ikrar-ı tam ve takrir-i kelâm idub medyun-i muma ileyh Hasan Tahsin Efendi’nin ceman zimmetinde edası vacib olan ikibinaltmışbir kuruş otuz para ile terk ve teberru eylediği meblağın edasına bizler dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharin zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’r-râbi ve’l-ışrin min Muharremi’l-haram li sene isna ve selâsîne ve selâsemie ve elf.
Mukabele olmuştur. Baş kâtib, kadı. Muhzır Sadık Efendi, Molla Ahmedoğlu Cemal Efendi.

Aded 355: Emineddin mahallesi
Lazistan Sancağı’nın merkezi olan Rize kasabası mahallâtından Emineddin mahallesinden Tüfenkcioğlu Asım bin Ali Efendi zatı zeyl-i vesikada muharreru’l-esâmî müslimîn tarifleriyle muarrefe olan Tüfenkcioğlu kerimesi Şuşu bint Ahmed meclis-i şer’-i şerif-i enverde her biri takrir-i kelâm ve tabir-i ani’l-merâm idub murisimiz Tüfenkcioğlu müteveffa Memiş Ağa’dan bi tariki’l-münasaha bizimle verese-i saireye mevrus ve müntakil olan Emineddin mahallesinde vâki malûm ve müteârefu’l-hudud bir babhane ve arsa ve araziden bizim hisse-i irsîye ve müntakilemizi vazıu’l-yed olan Sarı Ahmedoğlu Hasan Kaptan ibn Hurşid ile sair icab edenlerden aid olduğu mehâkim-i şer’iye ve nizamiyenin her derecesinde bidayeten ve iâdeten ve itirazen ve istinafen ve temyizen müddeî ve müddeâ aleyh ve mu’teriz ve mu’teraz aleyh ve şahs-ı sâlis ve itiraz-u ale’l ğayr-i tarik ve sıfatlarıyla taleb ve dava ve tefrik u taksime ve ikame-i şuhûd ve teblîğ ve tahlîf ve tebellüğa ve imzasıyla istid’â ve lâyıha tanzîm ve takdîmine ve mümeyyiz ve hâkim ve ehl-i vukuf tayin ve azline ve hisse-i mefruğeyi halît ve şerik veya sair suretle iştira ve ? ve taleb-i icrâ ve hacz vaz’ u fekkine ve isbat-ı verâset iddiasına ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile dava vekîllerinden Hafız Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledim dedikta ma vekaa bi’t-taleb ketb olundu. Fi’l-yevmi’r-râbi min Zi’l-kaadeti’ş-şerife li sene ihdâ ve selâsîne ve selasemie ve elf.
Mukabele olmuştur. Baş kâtib, kadı. Sarı Ahmedzâde Hakkı Efendi bin Süleyman Efendi, Sarı Ahmedzâde Dursun bin Mahmud.

Aded 356: Peşeyan mahallesi
Lazistan Sancağı’nın merkezi olan Rize kasabası mahallâtından Peşeyan mahallesinden Çorbacıoğlu Murad bin Mehmed Ağa meclis-i şer’-i şerif-i enverde Eytâm müdürü Hafız Harun Efendi ibn Hacı Dursun Efendi mahzarında Tenekeci müteveffa İbrahim Efendi mahdumi Ahmed’in malından lira-i Osmanî yüz kuruş hesabıyla dörtyüzotuzdört ve tenekeci müteveffa İbrahim Efendi kerimesi Emine’nin malından binbeşyüzaltmışaltı kuruş ki ceman müdir-i muma ileyhden istidane ve kabza ve umruma sarfla istihlâk eylediğim ikibin kuruş ile semeni işbu tarihten iki sene-i kamile müeccel olmak üzere eytâm-ı merkumanın mallarından ve müdir-i muma ileyh yedinden iştira eylediğim bir cild Ali Efendi fetvası semeninden üçyüzaltmış kuruş ki ceman ikibinüçyüzaltmış kuruş zimmetimde edası vacib ve lazımu’l-kada deynim ve borcum olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbet’t tasdiki’ş-şer’i kefalet-i vakıaları meclis-i eytâmca musaddak olan mahalleden Seğmenzâde Salih Reis bin Esad ile Vonit-i İslâm mahallesinden Kör Alizâde Mustafa Efendi ibn Hacı Osman Efendi ve Peripol mahallesinden Erdaloğlu Emin bin Mehmed tekrar meclis-i makud-i mezkûrde ve müdir-i muma ileyh mahzarında her biri ikrar-ı tam ve tabir-i ani’l-merâm idub medyun-i mezbûr Murad’ın ceman zimmetinde edası vacib olan ikibinüçyüzaltmış kuruş ile terk ve teberru eylediği meblağın edasına bizler dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharin zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’s-sâlis ve’l-ışrin min Muharremi’l-haram li sene isna ve selâsîne ve selâsemie ve elf.
Mukabele olmuştur. Baş kâtib, kadı. Muhzır Sadık Efendi, Rakıcızâde Arif Efendi.

Aded 357: Asbet karyesi
Lazistan Sancağı’nın merkezi olan Rize kazası kurâsından Asbet karyesi sakinelerinden zatı isimleri zabt-ı ceridesinde muharreru’l-esâmî müslimîn tarifleriyle muarrefe olan Fatıma bint Mustafa meclis-i şer’i münîrde Varankoz karyesinden Deli İsmailoğlu Hüseyin bin Kamil mahzarında merkum Hüseyin’in zevce-i menkuhe-i medhul-i bihâsı iken zevcim merkum yedi ay evvel beni bayinen tatlik ettikten sonra zimmetinde mutekarrer ve makud aleyh mehr-i müeccel hakkım olan binyüz kuruştan ale’l inkâr inkar-i muslihun tavassutuyla altıyüz kuruş bana vermek üzere merkum Hüseyin’den sulh olarak her birimiz sulh-i mezkûri kabul etmişdik lakin henüz bedel-i sulh olan meblağ-ı mezkûr altıyüz kuruş tediye ve îfâ etmekten edasına tenbih olunmak matlubumdur deyu dava ve lede’s-sual merkum dahi cevabında müddeiye-i mezbûrenin ber vech-i muharrer kelimatını tamamen ikrar ve ber vech-i muharrer altıyüz kuruş borcu olduğunu itiraf etmekle mucebince müddeâ bih altıyüz kuruş müddeiye-i mezbûre Fatıma’ya eda ve teslime merkum Hüseyin’e tenbih olunduğu tescîl ve i’lâm olundu. Fi’l-yevmi’s-samine aşer min şehr-i Ramazani’l-mübarek li sene ihdâ ve selâsîne ve selasemie ve elf.
Mukabele olmuştur. Baş kâtib, kadı.

Aded 358: Petroz karyesi
Lazistan Sancağı’nın merkezi olan Rize kazası kurâsından Petroz karyesinden Tarakcıoğulları Celal Efendi ibn Hacı Hüseyin yeğeni Hasan bin Mehmed meclis-i şer’-i şerif-i enverde her biri takrir-i kelâm ve tabir-i ani’l-merâm idub leh ve aleyhimize tahaddüs eden ve edecek olan her nevi deâvîden dolayı icab edenlerle aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis ve itiraz’ul ğayr-i tarik ve sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve tefrik u taksime ve bizim her hakkımızı ashabından taleb ve dava ve ahz u kabza ve bi’l-cümle makbuzatını bize i’tâ ve teslime ve lede’l-hâce isbat-ı verâset iddiasına ve’l-hâsıl leh ve aleyhimize tahaddüs eden ve edecek olan her nevi dava ve munazaatta salahiyet-i meşrua ve kanuniye dairesinde icra-i muhakemeye ve mütevakkıf olduğu umûrun küllîsine tarafımızdan vekâlet-i âmme-i mutlaka-ı sahiha-i şer’iye ile dava vekîllerinden Hafız Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledik dediklerinde ma vekaa bi’t-taleb ketb olundu. Fi’l-yevmi’s-samin min Saferi’l-hayr li sene isna selâsîne ve selâsemie ve elf.
Mukabele olmuştur. Baş kâtib, kadı. Muhzır İbrahim Efendi Likzâde Hafız İlyas Efendi.

Aded 359: Mağloz karyesi
Lazistan Sancağı’nın merkezi olan Rize kazası kurâsından Mağloz karyesinden iken bundan akdem vefat eden Kara Ahmedoğlu Ahmed bin Ali’nin sulbî sağir oğulları Sultan ve Hüseyin ve Harun’un pederleri müteveffa-yi mezbûrdan mevrus mallarını hıfz ve umurlarını tesviye ve ru’yete kıbel-i şer’iden bir vasi nasbı ehem ve elzem olmağın emanet ile marûfe ve istikamet ile mevsûfe olub her vecihle vesâyet uhdesinden gelmeğe kadire idugi karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve müslimin-i mezbûrun ihbarlarıyla lede’ş-şer’il enver zâhir ve nümâyân olan işbu baisetu’l-vesika marifetu’z-zat valideleri Fatıma bint Hacı Ahmed siğar-i mezbûrunun pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sani min Saferi’l-hayr li sene isna ve selâsîne ve selâsemie ve elf.
Mukabele olmuştur. Baş kâtib, kadı. Kara Ahmedoğlu Hafız Mehmed bin Hacı Ahmed Efendi, Koyuncuoğlu Mesud bin Halid.

Aded 360: Mağloz karyesi
Lazistan Sancağı’nın merkezi olan Rize kazası kurâsından Mağloz karyesinden iken bundan bir mâh-ı mukaddem Rusya’nın Katrandar şehrinde vefat eden Kara Ahmedoğlu Ahmed bin Ali’nin ber vechi ati varisi olduğunu iddia eden zevce-i menkuhe-i metrukesi Fatıma bint Hacı Ahmed meclis-i şer’-i şerif-i enverde müteveffa-yi mezbûrun medyuni Suyabatmazoğlu Harun bin Ali mahzarında üzerine dava ve takrir-i kelâm ve tabir-i ani’l-merâm idub zevcim müteveffa-yi mezbûrun verâseti benimle sulbî sağir oğulları Sultan ve Hüseyin ve Harun’a munhasıra olub bizden başka varisi ve terekesine mustahik-i ahari olmamağla zevcim müteveffa-yi mezbûrun hayatında mezbûr Harun zimmetinde cihet-i karzdan alacak hakkı olan oniki kuruş kable’l-ahz ve’l-istifa vefat etmekle meblağ-ı mezkûrdan hisse-i irsîyemi bana eda ve teslime mezbûr Harun Efendi’ye tenbih olunmak bi’l-verâse matlubumdur deyu dava ve lede’s-sual ol dahi cevabında fi’l-hakika müteveffa-yi mezbûre ol mikdar kuruş zimmetinde halen deyni olduğunu taven ikrar ve itiraf idub maada müddeiye-i mezbûrenin ber vech-i muharrer verâset-i müddeâsı malûmum değildir deyu inkar etmekle müddeiye-i mezbûre ber vech-i muharrer verâset müddeâsını evvelen ba veraka-i mesture mensub oldukları mezkûr Mağloz karyesi imamı Mehmedoğlu İsmail bin Ali Efendi ile muhtar-ı evveli Sadıkoğlu Kamil’den sirren ve badehu müterâfian hazır oldukları halde İsmailoğlu Ali bin Hasan ve Kart Osmanoğlu Hüseyin bin Ali’den bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idugleri işar ve ihbar olunan ve müteveffa-yi mezbûr ile verese-i mezbûr uni arifan olan mezkûr Mağloz karyesinden Kara Ahmedoğlu Hafız Mehmed Efendi ibn Hacı Ahmed Efendi ile Davudoğlu Halil bin Mustafa nâm kimesnelerin kezalik bi’l-muvacehe ber nehc-i şer’i tafsil-i mezkûr üzere şahadetleriyle isbat itmegin mucebince sübut-i verâsetlerine bade’l-hükm ve’t-tenbih verese-i mezbûrundan siğar-ı mezbûrunun valideleri ve tesviye-i umurlarına kıbel-i şer’iden mensube vasileri marifetu’z-zat zevce-i mezbûre Fatıma tekrar meclis-i makud-i mezkûrde bi’l-vesâye ve bi’l-âsale takrir-i kelâm ve tabir-i ani’l-merâm idub zevcim müteveffa-yi mezbûrun hıyn-i vefatında nezdinde mevcud bi’l-cümle tereke ve eşya ve nukûdu ve zimem-i nasda bi’l-cümle matlubatını ve malik olduğu bir bab tütün damını vazıu’l-yed olan ve ashabından taleb ve dava ve ahz u kabz ve mesa’-ı şer’i vecihle bi’l bey’ ve bi’l-cümle makbuzatını bana irsal ve isal ve teslime ve imzasıyla istid’â ve lâyıha tanzîm ve takdîmine ve ikame-i şuhûd ve tahlîf ve teblîğ ve tebellüğa ve zevcim müteveffa-yi mezbûrun katili olan Asbet karyeli Receboğlu Hüseyin ve rufeka-i saireleri aleyhlerinde Rusya devleti fehimesi kanun mucebince takib-i davaya ve taleb-i icrâ ve hacz vaz’ u fekkine ve’l-hâsıl her türlü hukuk-i şahsiye ve kanuniyemi muhafaza ve müdafaya ve mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile mezkûr Katrandar(Katurandar) şehrinde fırıncı esnafından karındaşım Kara Ahmedoğlu Hüseyin bin mezbûr Hacı Ahmed’i kabulune mevkûfe bi’l-âsale ve bi’l-vesâye vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l yevmi’s-samin min Saferi’l-hayr li sene isna ve selâsîne ve selâsemie ve elf.
Mukabele olmuştur. Baş kâtib, kadı. Kara Ahmedoğlu Hafız Mehmed bin Hacı Ahmed, Koyuncuoğlu Mesud bin Halid.

Aded 361: Peşeyan mahallesi
Lazistan Sancağı’nın merkezi olan Rize kasabası mahallâtından Peşeyan mahallesinden Zırhzâde Mehmed Efendi ibn Hacı Şakir Efendi meclis-i şer’-i şerif-i münîrde Arkolikoz mahallesinden iken bundan beş sene mukaddem vefat eden Feyizoğlu Dursun Ali bin İsmail’in sulbî sağir oğulları Mevlud ve Abdulhamid ve Hamza ve Cemil ve sulbîye-i sağire kızı Lütfiye’nin işbu mahkemeden sadır olan üçyirmidokuz sene-i hicrisi rebiu’l ahirinin onüçüncü günü tarihiyle müerreh bir kıta cihet-i şer’iye mucebince kıbel-i şer’iden mensub vasileri bulunan mahalle-i mezkûreden li ebeveyn amuceleri Feyizoğlu Zekeriyya bin mezbûr İsmail muvacehesinde vasi-i mezbûre nazır olan diğer amuceleri Mehmed Usta bin mezbûr İsmail hazır olduğu halde müteveffa-yi evvel mezbûr Dursun Ali’nin vefatından bir buçuk sene mukaddem hayatında ve kemal-i akl ve sıhhatinde malımdan ve yedimden iştira ve teslim ve kabz eylediği dakik-i esmanından gayr-i ez teslimat mütebakı dörtbinbeşyüz kuruş zimmetinde alacak hakkım olub hatta meblağ-ı mezkûr sahihen bana deyni olduğunu hâvî üçyüzyirmibir senesi martının beşinci günü tarihiyle müerreh ve mührüyle mahtum bir kıta deyn senedi dahi i’tâ etmiş olduğu halde meblağ-ı mezkûri kable’l-ahz ve’l-istifa vefat etmekle verâseti zevce-i menkuhe-i metrukesi Fatıma bint Hacı Ömer ve sulbî sağir oğulları mezbûrun Mevlud ve Abdulhamid ve Hamza ve Cemil ve sulbîye-i sağire kızı mezbûre Lütfiye’ye munhasıra ve badehu kable’l-kısmet zevce-i mezbûre Fatıma dahi vefat idub verâseti anası Hafize bint Hacı Ömer ve sadriy sağir oğulları mezbûrun ile sadriye-i sağire kızı mezbûre Lütfiye’ye munhasıra olub başka varisi olmadığı ve müteveffa-yi mezbûrun terekesine vasi-i mezbûr Zekeriyya hasbe’l vesâye vazıu’l-yed olduğu cihetle meblağ-ı mezkûri vazıu’l-yed olduğu tereke müteveffa-yi mezbûrun bana eda ve teslime vasi-i mezbûr Zekeriyya’ya tenbih olunmak matlubumdur deyu meali takririne mütabık tarih-i mezkûrla müerreh ve müteveffa-yi mezbûrun imza ve tahtîmiyle mahtum bir kıta sened ibraz ve iraesiyle bade’d-dava ve’s-sual vasi-i mezbûr dahi cevabında müteveffa-yi mezbûr da tereke-i vafiyesine siğar-i mezbûrun içun bi’l-vesâye vaz-ı yedini ikrar ancak müddeî muma ileyhin ber vech-i muharrer maada müddeâsını inkar etmesiyle müddeî muma ileyh ber vech-i muharrer müddeâsını evvelen ba veraka-i mesture mensub oldukları Kankalinoz mahallesi imamı Faiszâde Salih bin Sadullah ve muhtarı Caferoğlu Hüseyin’den sirren ve badehu müterâfian hazır oldukları halde Türüdizâde Hasan Efendi ibn Hacı Mehmed Efendi ile Dervişoğlu Hacı İbrahim bin Hacı Ahmed’den bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idugleri işar ve ihbar olunan ve müteveffa-yi mezbûran ile verese-i mezbûr uni arifan olan mezkûr Kankalinoz mahallesinden Mollaoğlu Said bin Memiş ile yine mahalleden Ayvazoğlu Salih bin Yusuf nâm kimesnelerin kezalik ber nehc-i şer’i bi’l-muvacehe tafsil-i mezkûr üzere şahadetleriyle isbat itmegin müddeî muma ileyh Mehmed Efendi istizharen bade’t-tahlifi’ş şer’i mucebince müteveffa-yi mezbûrun tereke-i vafiyesinden müddeâ bih dörtbinbeşyüz kuruşu müddeî muma ileyh Mehmed Efendi’ye eda ve teslime nazır mazbur hazır olduğu halde vasi-i mezbûr Zekeriyya’ya tenbih olunduğu tescîl ve i’lâm olundu. Fi’l-yevmi’s-sâlis ve’l-ışrin min şehr-i Rebii’l-evvel li sene ihdâ ve selâsîne ve selasemie ve elf.
Mukabele olmuştur. Baş kâtib, kadı.

Aded 362: Kandeva karyesi
Lazistan Sancağı’nın merkezi olan Rize kazası kurâsından Kandeva karyesinden iken bundan yirmidört sene akdem vefat eden Hacı Bayrakdaroğlu Hacı Memiş bin Mustafa’nın ber vechi ati bi tariki’l-münasaha varisi olduğunu iddia eden Edhem bin Yunus meclis-i şer’i münîrde müteveffa-yi mezbûrun medyuni Mehmed Efendi ibn Ahmed Efendi muvacehesinde üzerine dava ve takrir-i kelâm idub müteveffa-yi mezbûr Hacı Memiş’in verâseti sulbî kebir oğulları Yunus ve Mustafa ve Arslan’a ve sulbîye-i kebire kızları Hicabe ve Fatıma ve Hatice’ye munhasıra ve badehu mezbûre Hicabe vefat idub verâseti zevci Osman bin İbrahim ile sadriy kebir oğulları Ahmed ve Abdulhamid ve sulbîye-i kebire kızı Has Hatun’a munhasıra ve badehu mezbûr Yunus vefat idub verâseti zevce-i menkuhe-i metrukesi Hatice bint Yunus ve sulbî kebir oğulları benimle Kazım ve Memiş ve İdris ve sulbîye-i kebire kızı Fatıma’ya munhasıra ve tashih-i mesele-i mirasları bi’l-münasahati’ş-şer’iye binaltıyüzyirmi sehmden olub siham-ı mezkûrdan üçyüzaltmış sehmden yediyüzyirmi sehmi Mustafa ve Arslan’a ve yüzseksen sehmden üçyüzaltmış sehmi Fatıma ve Hatice’ye ve kırkbeş sehmi Osman’a ve ellidörder sehmden yüzsekiz sehmi Ahmed ve Abdulmecid’e ve yirmiyedi sehmi Has Hatun’a ve kırkbeş sehmi Hatice’ye ve yetmişer sehmden ikiyüzseksen sehmi Kazım ve Edhem ve Memiş ve İdris’e ve otuzbeş sehmi Fatıma’ya isabet idub başka varisi ve terekelerine mustahik-i ahar kimesneleri olmamağla müteveffa-yi ol mezbûrun hayatında mezbûr Mehmed Efendi zimmetinde cihet-i karzdan alacak hakkı olan kırksekiz kuruştan ber mûceb-i mesele-i miras hisse-i irsîyemi bana eda ve teslime mezbûr Mehmed Efendi’ye tenbih olunmak bi’l-verâse matlubumdur deyu dava ve lede’s-sual ol dahi cevabında fi’l-hakika müteveffa-yi ol mezbûre ol mikdar kuruş zimmetinde halen deyni olduğunu taven ikrar ve itiraf idub maada müddeî mezbûrun ber vech-i muharrer verâset müddeâsı malûmum değildir deyu inkar etmekle müddeî mezbûr ber vech-i muharrer verâset müddeâsı evvelen ba veraka-i mesture mensub oldukları mezkûr Kandeva karyesi muhtar-ı evveli Hacı Bayrakdaroğlu Mustafa ve azadan Molla Mehmedoğlu Hüseyin ile Mehmedoğlu Ömer’den sirren ve badehu müterâfian hazır oldukları halde Hacı Bayrakdaroğlu Mustafa ile Mehmedoğlu Cafer bin Ali’den bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idugleri işar ve ihbar olunan ve müteveffa-yi mezbûrun ile verese-i mezbûr uni arifan olan mezkûr Kandeva karyesinden Emir Ahmedoğlu Said bin İsmail ile yine karyeden Molla Osmanoğlu Dursun bin Hüseyin nâm kimesnelerin kezalik bi’l-muvacehe ber nehc-i şer’i şahadetleriyle isbat itmegin mucebince verâsetlerine bade’l-hükm müddeâ bih meblağdan müddeî merkumun hisse-i irsîyesini kendisine eda ve teslime müddeâ aleyh mezbûr Mehmed Efendi’ye tenbih olunduğu tescîl ve i’lâm olundu. Fi’l-yevmi’s-sabi min Saferi’l-hayr li sene isna ve selâsîne ve selâsemie ve elf.
Mukabele olmuştur. Baş kâtib, kadı.