Aded 266: Sirahoz mahallesi

Lazistan Sancağı’nın merkezi olan Rize kasabası mahallâtından Sirahoz mahallesinden Kokoğlu Mehmed bin Mehmed Ali meclis-i şer’-i şerif-i enverde Atina’nın Hemşin nahiyesinin Ortaköy karyesinden Seferoğlu Cemal Efendi ibn Ahmed mahzarında takrir-i kelâm ve tabir-i ani’l-merâm idub üçyüzelli kuruş mehr-i müeccel ve üçyüzelli kuruş mehr-i muaccel tesmiyesiyle zevce-i menkuhe-i ğayr-i medhul-i bihâm olan Ardeşîn nahiyesinin Funçarari(?) karyesinde sakin Kürd Hüseyinoğlu kerimesi Hanife’nin hukuk-i zevciyete itaatını aid olduğu mehâkim-i şer’iyede taleb ve dava ile aleyhime nikâh iddiasına kıyam eden Hemşin nahiyesinin Aşağı Köy karyesinden Dolaroğlu Musa bin Hurşid vesair icab edenlerle aid olduğu mehâkim-i şer’iye ve cezaiyenin her derecesinde müddeî ve müddeâ aleyh ve müştekî ve müştekâ aleyh sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve irae-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâya ve muhâkeme ve devâir-i cezaiyede takib-i davaya ve nafaka ve mukadderesinin feshi ve emin bir mahalde muhafazasını talebe ve ber vech-i muharrer ahari tevkil ve azle ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile muma ileyh Cemal Efendi’yi vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’t-tasi aşer min Zi’l-kaadeti’ş-şerife li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Tatzâde Osman Efendi, Kavalzâde İsmail Efendi.

Aded 267: Kozandinoz
Lazistan Sancağı’nın merkezi olan Rize kazası kurâsından Kozandinoz karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Yavaşoğlu kerimesi Ayşe bint Abdulmelik meclis-i şer’-i şerif-i enverde takrir-i kelâm ve tabir-i ani’l-merâm idub halen zevc-i dahilim olan Askoros karyesinden Kaboğlu Receb bin İzzet bundan akdem benimle firaşından hasıl ve benden mütevellid ve halen bi hakki’l-hidâne hacr ve terbiyemde olan sulbîye-i sağire kızı Asiye’yi bila nafaka vela munfek-i şer’i terk idub müddet-i sefer-i baid olan Rusya memalikine gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf nafaka farz u takdir olunmak matlubumdur dedikte hakikat-ı hal mezbûrenin takrir-i meşruhi üzere olduğu karye-i merkume muhtar-ı sanisi ve heyet-i ihtiyariyesinden mevrud ilmuhaberden müstebân ve Zikr-i âtî meblağ dahi kadr-i marûf idugi zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olmağın mezbûre bade’t-tahlifi’ş şer’i mucebince nafaka ve kisve ve bahâ vesair levazım-ı zaruriyeleri içun zevc-i gaib-i mezbûr üzerine işbu tarihten itibaren sağire-i mezbûre içun yirmi ve mezbûre Ayşe’ye içun de otuz ki ceman beher şehrî elli kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyelerine harc u sarfa ve lede’l-hâce istidaneye ve inde’z-zafer zevc-i gaib-i mezbûr üzerine rucua mezbûre Ayşe’ye izin verilmegin ma vekaa bi’t-taleb ketb olundu. Fi’l-yevmi’r-râbi ve’l-ışrin min şehr-i Ramazani’l-mübarek li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Molla Ahmedoğlu Memiş Efendi ibn Hacı Ahmed, Koçaloğlu Osman bin Ali, Boşnakoğlu Tevfik.

Aded 268: Umma Tuğlu
Lazistan Sancağı’nın merkezi olan Rize kazası kurâsından Umma Tuğlu karyesinden iken bundan akdem vefat eden Mutaoğlu Cafer bin Ali’nin sulbîye-i sağire kızları Hamdiye ve Fatıma’nın pederleri müteveffa-yi mezbûrdan mevrus mallarını hıfz ve umurlarını tesviye ve ru’yete vasileri bulunan Mutanınoğlu Ömer’in vuku-i istifasına mebni diğer bir vasinin nasbı ehem ve elzem olmağın emaneti ile marûfe ve istikamet ile mevsûfe olub her vecihle vesâyet uhdesinden gelmeğe kadire idugi karye-i merkume imam ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika marifetu’z-zat anaları Zeliha bint Gül Ali sağiretan-ı mezbûretanın pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’r-râbi aşer min Zi’l-kaadeti’ş-şerife li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Mahioğlu Refik bin Osman, Mahioğlu Ruşen bin Yusuf.

Aded 269: Kamaşnoz
Lazistan Sancağı’nın merkezi olan Rize kasabası mahallâtından Kamaşnoz mahallesinden Sarı Ahmedzâde Rıza Efendi ibn Osman Efendi meclis-i şer’-i şerif-i enverde Eytâm müdürü Hafız Harun Efendi mahzarında ikrar-ı tam ve takrir-i kelâm idub Alemdarzâde müteveffa Hacı Receb Efendi’nin sağir oğulları Şaban ve Ramazan ve Muharrem’in mallarından lira-i Osmanî yüziki kuruş yirmidört para hesabıyla müdir-i muma ileyh yedinden istidane ve kabz ve umuruma sarfla istihlâk eylediğim binbeşyüzotuzdokuz kuruş ile semeni işbu tarihten iki sene-i kamile müeccel olmak üzere yine eytâm-ı mezbûrunun mallarından ve müdir-i muma ileyh yedinden iştira eylediğim bir cild Ali Efendi fetvası semeninden ikiyüzyetmiş yedi kuruş ki ceman binsekizyüzonaltı kuruş zimmetimde vacibu’l-eda ve lazımu’l-kada deynim ve borcum olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbe’t-tasdiki’ş-şer’i kefalet-i vakıaları meclis-i eytâmca musaddak olan esnaftan ve mahalle-i mezkûreden Hacı Ömerzâde Mahmud Efendi ibn Hacı Zekeriyya ile Sarı Ahmedzâde Mahmud Reis bin Hacı Kamil ve Sarı Ahmedzâde Hasan Efendi ibn Süleyman Efendi tekrar meclis-i makud-i mezkûrde ve müdir-i muma ileyh mahzarında her biri kezalik ikrar-ı tam ve tabir-i ani’l-merâm idub medyun-i muma ileyhin ceman zimmetinde edası vacib olan binsekizyüzonaltı kuruş ile terk ve teberru eylediği meblağın edasına bizler dahi tarafımdan bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharin zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’s-samin ve’l-ışrin min şehr-i Rebii’l-ahir li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Muhzır Sadık Efendi, Muhzır İbrahim Efendi.

Aded 270: Sevelos
Lazistan Sancağı’nın merkezi olan Rize kazası kurâsından Sevelos karyesinden Sentenaloğlu Osman Reis bin Mustafa meclis-i şer’-i şerif-i enverde Eytâm müdürü Hafız Harun Efendi mahzarında takrir-i kelâm ve tabir-i ani’l-merâm idub Alemdarzâde müteveffa Hacı Receb Efendi’nin sağir oğulları Şaban ve Ramazan ve Muharrem’in mallarından lira-i Osmanî yüziki kuruş yirmidört para hesabıyla müdir-i muma ileyhden istidane ve kabz ve umur-i sarfla istihlâk eylediğim binyirmialtı kuruş ile semeni işbu tarihten iki sene-i kamile müeccel olmak üzere kezalik eytâm-ı mezbûrunun mallarından ve müdir-i muma ileyh yedinden iştira eylediğim bir cild Ali Efendi semeninden yüzseksenbeş kuruş ki ceman binikiyüzonbir kuruş zimmetimde vacibu’l-eda ve lazımu’l-kada deynim ve borcum olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbe’t-tasdiki’ş-şer’i kefalet-i vakıaları meclis-i eytâmca musaddak olan tüccardan Lazzâde Ahmed Efendi ibn Hacı Mustafa ile Sevelos karyesinden Sentenaloğlu Mehmed Reis bin Mustafa ve Molla Ahmedoğlu Hacı Ali Efendi ibn Yunus tekrar meclis-i makud-i mezkûrde her biri ikrar-ı tam ve takrir-i kelâm idub medyun-i merkum Osman Reis’in ceman zimmetinde edası vacib olan binikiyüzonbir kuruş ile terk ve teberru eylediği meblağın edasına bizler dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharin zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’s-sadis min Cemaziye’l evvel ahir li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Muhzır İbrahim Efendi, Hacı Mehmedoğlu Ahmed.

Aded 271: Kale mahallesi
Lazistan Sancağı’nın merkezi olan Rize kasabası mahallâtından Kale mahallesi sakinlerinden iken bundan akdem vefat eden Ayvazoğlu Ruşen bin Osman’ın sulbî sağir oğulları İlyas ve Asım ve Sefer’in pederleri müteveffa-yi mezbûrdan mevrus mallarını hıfz ve umurlarını tesviye ve ru’yete kıbel-i şer’iden nasbı ehem ve elzem olmağın emanet ile marûfe ve istikamet ile mevsûfe olub her vecihle vesâyet uhdesinden gelmeğe kadire idügi mahalle-i merkume imam ve muhtarı tarafından mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika marifetu’z-zat valideleri Ümmühan bint Hacı Mustafa siğar-ı mezbûrunun pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’r-râbia aşer min Zi’l-kaadeti’ş-şerife li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Narmanlıoğlu Ataullah bin Enes Efendi, Babuşcioğlu Abdullah bin Ahmed Efendi.

Aded 272: Atina kazasının Buleb-i Ulyâ karyesi
Lazistan Sancağı’na tabi Atina kazasının Buleb-i Ulyâ karyesi sakinelerinden zatları zeyl-i vesikada muharreru’l-esâmî müslimîn tarifleriyle muarrefe olan ve tezkire-i osmaniyeleri görülen Terzioğlu müteveffa Mustafa’nın zevce-i metrukesi ve Sarıoğlu kerimesi Fatıma bint müteveffa İbrahim mezbûre Fatıma’nın sadriye-i kebire kızı Zeliha bint mezbûre Mustafa meclis-i şer’-i şerif-i enverde her biri takrir-i kelâm ve tabir-i ani’l-merâm idub murisimiz mezbûr Mustafa bin Mehmed’in katili olan mezkûr Buleb-i Ulyâ karyesinden Memenoğulları Tahir ve Hasan ve Şükrü benun-i Tahir aleyhlerinde aid olduğu mehâkim-i şer’iye ve cezaiyenin her derecesinde müddeî ve müddeâ aleyh ve müştekî ve müştekâ aleyh sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame ve irae-i şuhûd ve tahlîf ve teblîğ ve tebellüğa ve imzasıyla her nevi lâyıha ve istid’â tanzîm ve takdîmine ve ru’yet-i kısas talebine ve’l-hâsıl her türlü hukuk-i şahsiye ve kanuniyemizi muhafaza ve müdafaya ve mütevakkıf olduğu umûrun küllîsine tarafımızdan vekâlet-i mutlaka-i sahiha-i şer’iye ile dava vekîllerinden Abdulvahid Efendi ibn Abdulhalim Efendi’yi kabulune mevkûfe vekîl ve naib-i menab nasb u tayin eyledik dedikte ma vekaa bi’t-taleb ketb olundu. Fi’l-yevmi’s-sani ve’l-ışrin min Zi’l-kaadeti’ş-şerife li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Muhzır İbrahim Efendi, Dervişzâde Emin Efendi.

Aded 273: Romanoz-i İslâm
Lazistan Sancağı’nın merkezi olan Rize kasabası mahallâtından Romanoz-i İslâm mahallesinden Kavaloğlu İsmail Efendi ibn Hacı Hüseyin Efendi meclis-i şer’-i şerif-i enverde takrir-i kelâm ve tabir-i ani’l-merâm idub Reji idaresi canibinden aleyhime ikame olunan tütün ciramı nakdisi davasından dolayı idare-i mezkûre namına icab edenlerle aid olduğu mehâkimin her derecesinde muhâkeme ve muhâsama ve mucâvebeye ve irae-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve lede’l-hâce istinaf-ı davaya ve’l-hâsıl hukuk-i şahsiye ve kanuniyemi muhafaza ve müdafaya ve mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile dava vekîllerinden Hafız Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’s-sani ve’l-ışrin min Zi’l-kaadeti’ş-şerife li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Muhzır İbrahim Efendi, Rakıcızâde Mustafa Efendi.

Aded 274: Kohser-i Ulyâ
Lazistan Sancağı’nın merkezi olan Rize kazası nevâhîsinden Kura-i Seba nahiyesinin Kohser-i Ulyâ karyesi ahalisinden iken bundan akdem vefat eden Köseninoğlu Dursun bin Ahmed’in sulbîye-i sağire kızı Halime’nin pederi müteveffa-yi mezbûrdan mevrus malını hıfz ve umurunu tesviye ve ru’yete kıbel-i şer’iden bir vasi nasbı ehem ve elzem olmağın emanet ile marûf ve istikamet ile mevsûf olub her vecihle vesâyet uhdesinden gelmeğe kadir idugi mezkûr Kohser-i Ulyâ karyesi muhtar-ı evvel ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika li ebeveyn amucesi Mehmed bin mezbûr Ahmed sağire-i mezbûrenin pederi müteveffa-yi mezbûrdan mevrus malını hıfz ve vakt-i rüşd-i sedadına değin umurunu tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-samin ve’l-ışrin min Zi’l-kaadeti’ş-şerife li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Ahmedoğlu Osman bin Yusuf Çavuş, Hacı İbrahimoğlu Ömer Efendi ibn İbrahim Efendi.

Aded 275: Asbet
Lazistan Sancağı’nın merkezi olan Rize kazası kurâsından Asbet karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Araboğlu kerimesi Haculi bint Hasan meclis-i şer’-i şerif-i enverde sadriy kebir oğlu Bağdadlıoğlu Mustafa bin Cafer mahzarında takrir-i kelâm ve tabir-i ani’l-merâm idub Asbet karyesinde vâki pederim müteveffa-yi mezbûr Hasan ile karındaşım müteveffa Mansur’dan intikal eden mahallinde beynel ahali ve’l-cîrân malûm ve müteârefu’l-hudud bi’l-cümle arazilerdeki hisse-i müntakile-i malûmemi bedel-i malûm ve makbuzum mukabelesinde yeğenim Ali Osman bin Mansur’a memurin-i lazımesi huzurunda ferağ ve tefviz ve teslime ve muamele-i saire-i lazımesi icrâ ve takririni i’tâya ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile oğlum mezbûr Mustafa’yı vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûre kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sabi min şehr-i Şevvali’l-mükerrem li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Elhazoğlu Abdullah, Hantaloğlu İsmail Efendi.

Aded 276: Romanoz-i İslâm
Lazistan Sancağı’nın merkezi olan Rize kasabası mahallâtından Romanoz-i İslâm mahallesinden Tatzâde Osman Efendi ibn Bayram meclis-i şer’-i şerif-i enverde Eytâm müdürü Hafız Harun Efendi mahzarında takrir-i kelâm ve tabir-i ani’l-merâm idub Alemdarzâde müteveffa Hacı Receb Efendi’nin eytâmı mallarından lira-i Osmanî yüziki kuruş yirmidört para hesabıyla müdir-i muma ileyh yedinden istidane ve kabz ve umuruma sarfla istihlâk eylediğim ikibinbeşyüz kuruş ile semeni işbu tarihten iki sene-i kamile müeccel olmak üzere iştira eylediğim bir cild Ali Efendi fetvası semeninden dörtyüzelli kuruş ki ceman ikibindokuzyüzelli kuruş zimmetimde vacibu’l-eda ve lazımu’l-kada deynim ve borcum olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbe’t-tasdiki’ş-şer’i kefalet-i vakıaları meclis-i eytâmca musaddak olan esnaftan Kakşioğlu Şaban bin Ali ve Hacı Hasanoğlu Süleyman bin Hüseyin ve Memişoğlu Rıza Efendi ibn İbrahim Efendi ve Kukuoğlu Hüseyin bin Yusuf tekrar meclis-i makud-i mezkûrde müdir-i muma ileyh mahzarında her biri ikrar-ı tam ve takrir-i kelâm idub medyun-i muma ileyh Osman Efendi’nin ceman zimmetinde vacibu’l-eda ve lazımu’l-kada deyni ve borcu olan ikibindokuzyüzelli kuruş ile terk ve teberru eylediği meblağın edasına bizler dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharin zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’s-sâlis min şehr-i Recebi’l-ferd li sene ihdâ selâsîne ve selâsemie ve elf.

Mukabele olmuştur. Baş kâtib, kadı. Muhzır Sadık Efendi, Nevruzoğlu Mehmed Efendi.

Aded 277: Arkotil mahallesi
Lazistan Sancağı’nın merkezi olan Rize kasabası mahallâtından Arkotil mahallesinden Hasan Efendizâde Osman Efendi ibn Salih Efendi meclis-i şer’-i şerif-i enverde Eytâm müdürü Hafız Harun Efendi Efendi mahzarında ikrar-ı tam ve tabir-i ani’l-merâm idub Alay müftüsü müteveffa Receb Efendi’nin eytâmı Şaban ve Ramazan ve Muharrem’in mallarından lira-i Osmanî yüz kuruş hesabıyla müdir-i muma ileyh yedinden istidane ve kabz ve umuruma sarfla istihlâk eylediğim sekizyüz kuruş ile semeni işbu tarihten iki sene-i kamile müeccel olmak üzere iştira eylediğim bir cild Ali Efendi fetvası semeninden yüzsekiz kuruş ki ceman zimmetinde vacibu’l-eda ve lazımu’l-kada dokuzyüzsekiz kuruş deyn ve borcum olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbe’t-tasdiki’ş-şer’i kefalet-i vakıaları eytâm meclisince musaddak olan tüccardan Tatzâde Hafız Osman Efendi ibn Hasan Efendi ile Lazzâde Ahmed Efendi ibn Hacı Mehmed ve Kuvelzâde Emin Efendi ibn Hacı Şaban Efendi tekrar meclis-i makud-i mezkûrde müdir-i muma ileyh mahzarında her biri ikrar-ı tam ve takrir-i kelâm idub medyun-i muma ileyh’in ceman zimmetinde edası vacib olan dokuzyüzsekiz kuruş ile terk ve teberru eylediği meblağın edasına bizler dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharin zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’s-samine aşer min Cemaziye’l-ahir li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Muhzır İbrahim Efendi, Nevruzzâde Mehmed Efendi.

Aded 278: Hacinoz
Lazistan Sancağı’nın merkezi olan Rize kasabası mahallâtından Hacinoz mahallesinden Emir Ahmedzâde Hüsnü Efendi ibn Abdulhamid Efendi meclis-i şer’-i şerif-i enverde Eytâm müdürü Hafız Harun Efendi mahzarında ikrar-ı tam ve takrir-i kelâm idub Dervişzâde müteveffa Hacı Lütfü Efendi’nin sulbî sağir oğulları Mustafa ve Süleyman ve Abdulvehhab ve Hasan ve sulbîye-i sağire kızları Emine ve Hatice’nin mallarından sîm mecîdi ve yirmi kuruş hesabıyla müdir-i muma ileyh yedinden istidane ve kabz ve umuruma sarfla istihlâk eylediğim bin kuruş ile semeni işbu tarihten bir sene-i kamile müeccel olmak üzere eytâm-ı mezbûrunun mallarından ve müdir-i muma ileyh yedinden iştira eylediğim bir cild Ali Efendi fetvası semeninden doksan kuruş ki ceman bindoksan kuruş zimmetimde vacibu’l-eda ve lazımu’l-kada deynim ve borcum olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbe’t-tasdiki’ş-şer’i kefalet-i vakıaları meclis-i eytâmca musaddak olan tüccardan Mataracızâde Hakkı Efendi ibn Hacı Abdurrauf Efendi ile Emir Ahmedzâde Abdulhamid Efendi ibn Hacı Ruşen ve Hacinoz mahallesinden Kethüdaoğlu Emin Efendi ibn İzzet tekrar meclis-i makud-i mezkûrde her biri ikrar-ı tam ve tabir-i ani’l-merâm idub medyun-i muma ileyh’in ceman zimmetinde edası vacib olan bindoksan kuruş ile terk ve teberru eylediği meblağın edasına bizler dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharin zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’l-hamise aşer min Cemaziye’l evvel li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Muhzır İbrahim Efendi, Tatzâde Osman Efendi.

Aded 279: Vonit-i Rum
Lazistan Sancağı’nın merkezi olan Rize kasabası mahallâtından Vonit-i Rum mahallesinden ve teba-i devlet-i aliyyenin rum milletinden iken bundan mukaddem vefat eden Ğorğoroğlu İstavri bin Hristo’nun sulbî sağir oğlu Ğorğor ve sulbîy-i sağire kızı Sofye’nin pederleri müteveffa-yi merkumdan mevrus mallarını hıfz ve umurlarını tesviye ve ru’yete kıbel-i şer’iden bir vasi nasbı ehem olmağın emaneti ile marûfe olub her vecihle vesâyet uhdesinden gelmeğe kadire idugi mahalle-i merkume reis-i ruhanisi Yapanikola ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika marifetu’z-zat valideleri Anti bint Papayano sağiretan-ı mezbûretanın pederleri müteveffa-yi merkumdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sadis ve’l-ışrin min Zi’l-kaadeti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Bayrakdaroğlu Vasil Efendi ibn Yani, Bıyıkoğlu İstavri bin Yanika.

Aded 280: Vonit-i Rum
Lazistan Sancağı’nın merkezi olan Rize kasabası mahallâtından Vonit-i Rum mahallesinden ve teba-i devlet-i aliyyenin rum milletinden müteveffa Ğorğoroğlu İstavri bin Hristo’nun sulbî sağir oğlu Ğorğor ile sulbîye-i sağire kızı Sofye’nin kıbel-i şer’iden mensube vasileri müteveffa-yi merkumun zevcesi zatı zeyl-i vesikada muharreru’l-esâmî kesan tarifleriyle muarrefe olan Anti bint Papayano meclis-i şer’-i şerif-i enverde dava vekîllerinden Vasil Efendi ibn Yani mahzarında bi’l-âsale ve bi’l-visale takrir-i kelâm ve tabir-i ani’l-merâm idub zevcim müteveffa-yi merkumdan mevrus ve müntakil bi’l-cümle emlak ve arazi ve eşya ve nükud ve bezzaziyeye müteallık emval-i ticariye ve alacak ve’l-hâsıl bi’l-cümle emval-i metrukesini vazıu’l-yed olan ve müdahale edenlerden aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis ve itirazu’l-ğayr-i tarik ve sıfatlarıyla bidayeten ve iâdeten ve itirazen ve istinafen ve temyizen taleb ve dava ve muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve usul-i mer’iye ve mesağ-i şer’iye vecihle icab edenleri semen ve bedel-i misilleriyle talibine bey’ ve temlik u teslime ve semen misillerini ahz u kabza ve ru’yet-i muhasebeye ve bizim her hakkımızı ashabından kezalik taleb ve dava ve ahz u kabza ve bi’l-cümle makbuzatını bana i’tâ ve teslime ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâ ve hacz vaz’ u fekkine ve tefrik u taksime ve isbat-ı verâset iddiasına ve’l-hâsıl leh ve aleyhimde tahaddüs eden ve edecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımdan vekâlet-i âmme-i mutlaka-i sahiha-i şer’iye ile bi’l-âsale ve bi’l-visaye muma ileyh Vasil Efendi’yi vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sadis ve’l-ışrin min Zi’l-kaadeti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Şalvaroğlu Tanaş bin Sava, Uzunoğlu İstavri bin Yanika.

Aded 281: Satoz
Lazistan Sancağı’nın merkezi olan Rize kazası kurâsından Satoz karyesi ahalisinden olub tezkire-i osmaniyeleri görülen Manioğulları Yakub ve Rıdvan benan-i Ahmed meclis-i şerif-i enverde her biri takrir-i kelâm ve tabir-i ani’l-merâm idub Bandırma kazasının Paşa mescid mahallesinde vâki mahallinde beyne’l-ahâlî ve’l-cîrân malûm ve müteârefu’l-hudud müştereken ba tapu mutasarrıf olduğumuz binüçyirmibeş zira bir kıta arsamızı Sürmene kazasından olub mezkûr Bandırma kasabasında sakin Mustafa Çavuş’a semeni misli olan otuz lira mukabelesinde bey’ u ferağ ve temlik u teslime ve muamele-i lazımesini icrâ ve takririni i’tâya ve’l-hâsıl mütevakkıf olduğu umûrun küllîsine tarafımızdan vekâlet-i mutlaka-i sahiha-i şeri’ye ile mezkûr Bandırma kazası daire-i hükümet imamı Hacı İsmail Hakkı Efendi ibn Abdullah’ı kabulune mevkûfe vekîl ve naib-i menab nasb u tayin eyledik dediklerinde ma vekaa bi’t-taleb ketb olundu. Fi’l-yevmi’s-sabi ve’l-ışrin min Zi’l-kaadeti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Molla Ahmedoğlu Hacı Ali Efendi, Manioğlu Mustafa Efendi.

Aded 282: Of kazasının Gelir(Kiler) karyesi
Of kazasının Gelir(Kiler) karyesinden Hacı Fazlıoğlu Salih bin Mustafa meclis-i şer’-i şerif-i enverde dava vekîllerinden Arif Efendi ibn Tevfik Efendi mahzarında takrir-i kelâm ve tabir-i ani’l-merâm idub kaza-i mezkûrun Yolit(?) karyesinden Çakıroğulları Süleyman ve Mehmed ve Rüstem ve Hasan ve kız karındaşları Ayşe benun-i İsmail ile beynimizde mütehaddis arazi ve emlak ve hark ve tecavüz-i hudud ve mesil ve mecra davalarından dolayı mezbûrun ile aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve taleb-i keşf ve mümeyyiz ve hâkim ve ehl-i vukuf tayin ve azline ve tefrik u taksime ve isbat-ı verâset iddiasına ve lede’l-hâce isbat-ı verâset iddiasına ve lede’l-hâce sulh ve ibraya ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile muma ileyh Arif Efendi’yi ve kabulune mevkûfe dava vekîllerinden Kaşif Efendi ibn Ömer Ağa’yı gerek münferiden ve gerek müctemian icra-i vekâlete mezun olmak üzere vekîl ve naib-i menab nasb u tayin eyledim dedikte muma ileyh Arif Efendi dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sâlis min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Muhzır Sadık Efendi, Hacı Ahmedoğlu Receb.

Aded 283: Viçe nahiyesinin Yaçeva Yeniköy
Lazistan Sancağı’na tabi Hopa kazasının Viçe nahiyesinin Yaçeva Yeniköy karyesinden Hacı Ahmedoğlu Ahmed Ragıb Efendi ibn Hasan meclis-i şer’-i şerif-i enverde takrir-i kelâm ve tabir-i ani’i meram idub aleyhime ikame edilen ve edilecek olan her nevi deâvîden dolayı icab edenlerle aid olduğu mehâkim-i şer’iye ve hukukiye ve ticariyenin her derecesinde müddeî ve müddeâ aleyh ve müştekî ve müştekâ aleyh ve sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve benim her hakkımı lazım gelenlerden taleb ve dava ve ahz u kabz ile bi’l-cümle makbuzatını bana i’tâ ve teslime ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâ ve hacz vaz’ u fekkine ve lede’l-hâce sulh ve ibraya ve’l-hâsıl her türlü hukuk-i şahsiye ve kanuniyemi muhafaza ve müdafa ile leh ve aleyhimde tahaddüs eden ve edecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımdan vekâlet-i mutlaka-i âmme-i mutlaka-i sahiha-i şer’iye ile dava vekîllerinden Hafız Hulusi Efendi ibn Salih Efendi ile Hopa’da mukim Mustafa Efendi ibn Dursun Ağa’yı gerek münferiden ve gerek müctemian icra-i vekâlete mezun olmak üzere kabullerine mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’t-tasi min Zi’l-kaadeti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Satıroğlu Mehmed Efendi, Hantal İsmail Efendi.

Aded 284: Hazavit karyesi
Hazavit karyesinden olub hizmet-i askeriyede iken vefat eden karye-i mezkûreden Mamatioğlu Mehmed bin Memiş’in verâsetinin subutuna dair tanzîm olunan ilamdır.
Müteveffa-yi mezbûr Mehmed bin Memiş’in verâseti zevce-i menkuhe-i metrukesi Emine ile babası mezbûr Memiş ve sağir oğlu Muhiddin ve sağire kızı Seyare(?)’ye munhasıra olduğu mahzar-ı hasım-ı cahidde bi’l muhâkeme sabit ve sübut-i verâsetlerine hükm-i şer’i lâhik olduğu ve mesele-i mirasları bi hükmi’l feraiz yetmişiki sehmden olub siham-ı mezkûrenin dokuz sehmi zevce-i mezbûreye ve oniki sehmi ebu’l mezbûr Memiş’e ve otuzdört sehmi sağir-i mezbûr Muhiddinle ve onyedi sehmi sağire-i mezbûre Seyare’ye isabet eylediği arz ve i’lâm olundu. Fi’l-yevmi’l-hamis min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı.

Aded 285: Ğotoz karyesi
Ğotoz karyesinden olub hizmet-i askeriyede iken vefat eden karye-i mezkûreden Deli Hasanoğlu Mustafa bin Memiş’in verâsetinin subutuna dair tanzîm olunan ilamdır.
Müteveffa-yi mezbûr Mustafa bin Memiş’in verâseti babası mezbûr Memiş ile zevce-i menkuhe-i metrukeleri Ayşe ve Hatice ve sağiroğulları İbrahim ve Hamza ve Mustafa ve sağire kızları Zehra ve Zühre ve Ayşe ve Pupuze’ye munhasıra olduğu mahzar-ı hasım-ı cahidde bi’l muhâkeme sabit ve sübut-i verâsetlerine hükm-i şer’i lâhik olduğu ve mesele-i mirasları bi hükmi’l feraiz ikiyüzkırk sehmden olub siham-ı mezkûreden onbeş sehmden otuz sehmi zevcat-i mezbûr etana ve kırk sehmi mezbûr Memiş’e ve otuzdörder sehmden ceman yüziki sehmi mezbûrun İbrahim ve Hamza ve Mustafa’ya ve onyedişer sehmden ceman altmışsekiz sehmi mezbûrât Zehra ve Zühre ve Ayşe ve Pupuze’ye isabet eylediği arz ve i’lâm olundu. Fi’l-yevmi’l-hamis min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı.

Aded 286: Sanduk
Lazistan Sancağı’nın merkezi olan Rize kazası kurâsından Sanduk karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Mahmudoğlu kerimesi Fatıma bint Arif meclis-i şer’-i şerif-i enverde takrir-i kelâm ve tabir-i ani’l-merâm idub halen zevc-i dahilim olan Sakrık karyesinden Çavuşoğlu Mehmed Ali bin Mahmud bundan akdem beni bila nafaka vela munfek-i şer’i terk idub müddet-i sefer-i baid olan diyar-ı ahara gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf nafaka farz u takdir olunmak matlubumdur dedikte hakikat-i hal mezbûrenin takrir-i meşruhi üzere olduğu karye-i merkume imam ve heyet-i ihtiyariyesinden mevrud ilmuhaberden müstebân Zikr-i âtî meblağ dahi kadr-i marûf idugi müslimin-i mezbûrun ihbarlarıyla lede’ş-şer’il enver zâhir ve nümâyân olmağın mezbûre bade’t-tahlîf mucebince nafaka ve kisve bahâ vesair levazım-ı zaruriye içun zevci gaib-i mezbûr üzerine işbu tarihten itibaren beher şehrî otuzbeş kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer zevci gaib-i mezbûr üzerine rucua mezbûre Fatıma’ya kıbel-i şer’iden izin verilmegin ma vekaa bi’t-taleb ketb olundu. Fi’l yevmi’s-sâlise aşer min Recebi’l-ferd li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Mahalleden Dilonunoğlu Hasan bin Mahmud, Çancol mahallesinden Dilonunoğlu Emin bin Mehmed.

Aded 287: Emineddin mahallesi
Lazistan Sancağı’nın merkezi olan Rize kazası mahallâtından Emineddin mahallesinden iken bundan akdem vefat eden Müftüzâde Rıfat Çavuş bin Osman Efendi’nin sulbî kebir oğlu yirmi yaşını mütecaviz ve halen akil ve baliğ ve büluğuna rüşd-i muntazam olduğu ve ber vechi ati rüşdünü iddia eden Hüseyin Efendi meclis-i şer’-i şerif-i enverde hal-i sağirinde tesviye-i umuruna ba hüccet-i şer’iye kıbel-i şer’iden mensube vasisi bulunan validesi marifetu’z-zat Zinet bint Hasan mahzarında Eytâm müdürü Hafız Harun Efendi ibn Hacı Dursun Efendi hazır olduğu halde üzerine dava ve takrir-i kelâm idub halen yirmi yaşını mütecaviz akıl ve baliğ ve büluğuma rüşdüm muntazam olub bi’n nefs umurumu ru’yet ve tesviyeye kadir ve ianet-i vasiden müstağni olmamla babam müteveffa-yi mezbûrdan mevrus ba defter-i kassam malım olub vasim validem mezbûre yediyle eytâm sandığına tevri edilub bindoksan kuruş validem mezbûre Zinet hasbe’l vesâye vazıu’l-yed olmağla meblağ-ı mezkûri bana i’tâ ve teslime vasim mezbûreye tenbih olunmak matlubumdur deyu dava ve lede’s-sual ol dahi cevabında fi’l-hakika müddeî muma ileyhin mal-i mevrusi olan ol mikdar kuruşa hasbe’l vesâye vaz’ı yedini ikrar maada rüşd-i müddeâsını inkar etmekle müddeî muma ileyh ber vech-i muharrer rüşd-i müddeâsını evvelen ba veraka-i mesture mensub oldukları Romanoz-i İslâm mahallesi muhtar-ı evveli Hacıoğlu Hüseyin bin Süleyman ve azadan Süleyman Şevket Efendi ve Emineddin mahallesi imamı Zırhzâde Hacı Şaban Efendi ibn Hacı Hasan ve azadan Hacı Mollazâde Ali Efendi’den sirren ve badehu müterâfian hazır oldukları halde Tüfenkcioğlu Mehmed Efendi ibn Mahmud Efendi ile Kadızâde Mustafa Efendi ibn Şakir Efendi’den bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idugleri işar ve ihbar olunan ve müteveffa-yi mezbûr ile tarafeyn-i arifan olan Tatzâde Osman Efendi ibn Bayram ile Altıkulaçzâde Rıza Efendi ibn İsmail Efendi nam-i kimesnelerin bi’l-muvacehe ber nehc-i şer’i tafsil-i mezkûr üzere şahadetleriyle isbat itmegin mucebince müddeî muma ileyhin reşid olduğuna bade’l-hükm müddeâya meblağ-ı müddeî muma ileyhe eda ve teslime müdir-i muma ileyh huzuruyla vasi-i mezbûreye tenbih olunmağın ma vekaa bi’t-taleb ketb olundu. Fi’l-yevmi’l-hamis min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Altıkulaçzâde Rıza Efendi, Tatzâde Osman Efendi.

Aded 288:
Binüçyüzotuzbir sene-i hicrisi ıyd-i said-i edha ilamıdır.
İşbu binüçyüzotuzbir senesi Zi’l hiccetu’ş şerifesinin ğurresi Erzurum’da celb olunan i’lâm mucebince tekmil-i selasin ile Cumaertesi gününden sabit ve subutuna hükm-i şer’i lâhik olduğuna binaen bi’l hisab dokuzuncu Pazar günü arefe-i ğufran ihtiva ve ferdası yani teşrin-i evvelin yirmisekizinci gününe müsadif Pazarertesi günü ıyd-i said-i edha olmak iktiza eylediğinden bera-i ilan-ı belediyeye havale buyurulması babında emr ve ferman hazret-i men lehu’l emrindir.
Fi 6 Zi’l-hicceti’ş-şerife sene 1331 ve Fi 24 Teşrin-i evvel 1329
Mukabele olmuştur. Baş kâtib, kadı.

Aded 289: Sanduk
Lazistan Sancağı’nın merkezi olan Rize kasabası mahallâtından Samri mahallesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Kotiloğlu kerimesi Ayşe bint Arif meclis-i şer’-i şerif-i enverde takrir-i kelâm ve tabir-i ani’l-merâm idub halen zevc-i dahilim olan Sanduk karyesinden Mahmudoğlu Hüseyin bin Arif benimle firaşından hasıl ve benden mütevellid ve halen bi hakki’l-hidâne hacr ve terbiyemde bulunan sulbî sağir oğlu Mehmed’i bila nafaka vela munfek-i şer’i terk idub müddet-i sefer-i baid olan Rusya memalikine gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden benimle sağir-i mezbûr içun gaib-i mezbûr Hüseyin üzerine kadr-i kifaye meblağ farz u takdir olunmak matlubumdur dedikte hakikat-i hal mezbûre Ayşe’nin takrir-i meşruhi üzere olduğu karye-i merkume imam ve heyet-i ihtiyariyesi tarafından mevrud ilmuhaberden müstebân ve zikri ati meblağ dahi kadr-i marûf idugi müslimin-i mezbûrun ihbarlarıyla lede’ş-şer’il enver zâhir ve nümâyân olmağın mezbûre bade’t-tahlîf mucebince nafaka ve kisve bahâ vesair levazım-ı zaruriyesi içun işbu tarihten itibaren sağir-i mezbûr içun otuz ve mezbûre içun kırk ki ceman her ikisine beher şehrî yetmiş kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyelerine harc u sarfa ve lede’l-hâce istidaneye ve inde’z-zafer zevci gaib-i mezbûr üzerine rucua mezbûre Ayşe’ye kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’s-samin min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Kürd Hasanoğlu Hasan bin Ali, Kör Hasanoğlu Yusuf bin Receb.

Aded 290: Kandeva
Lazistan Sancağı’nın merkezi olan Rize kazası kurâsından Kandeva karyesinden Hacı Bayrakdaroğlu Arslan bin Memiş meclis-i şer’-i şerif-i enverde takrir-i kelâm ve tabir-i ani’l-merâm idub Hacı Bayrakdaroğlu Adem bin Yunus ile beynimizde mütehaddis arazi ve şerik ve halît davalarından dolayı mezbûr Adem ile vesairleri tarafından aleyhime ikame edilecek her nevi davadan dolayı icab edenlerle aid olduğu mehâkim-i şer’iye ve nizamiyenin hukuk ve ticaret-i devâir-i sulhiye ve cezaiye kısımlarında müddeî ve müddeâ aleyh ve müştekî ve müştekâ aleyh ve şahs-ı sâlis ve itirazu’l-ğayr-i tarik ve sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve benim her hakkımı lazım gelenlerden taleb ve dava ve ahz u kabza ve tefrik u taksime ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve mümeyyiz ve hâkim ve ehl-i vukuf tayin ve azline ve taleb-i icrâ ve hacz vaz’ u fekkine ve bi’l-cümle makbuzatını bana i’tâ ve teslime ve’l-hâsıl her türlü hukuk-i şahsiye ve kanuniyemi muhafaza ve müdafa ile leh ve aleyhimde tahaddüs eden ve edecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımdan vekâlet-i âmme-i mutlaka-i sahiha-i şer’iye ile ehibbamdan dava vekîllerinden Hafız Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’s-sabi min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Satıroğlu Mehmed Efendi, Alioğlu Abdulmecid Efendi.

Aded 291:
Salarha Holitoz karyesinden Civelekoğlu İbrahim Efendi’ye
Karyenizde kâin cami-i şerifin emanet ve hitabet cihetlerinin bi’n niyabe uhdenize tevcihine dair iktiza eden i’lâm ve mazbatası fi 7 Teşrin-i sanî sene 1329 tarih ve 4400 numara ile murakkam olduğu halde merciine takdîm kılındığı lede’l-havale evrak memurluğundan ba derkenar beyan edilmiş olmağla gerekdir ki berat-ı şerif-i âlîşânın şeref vuruduna değin ikame-i salât-i Cuma ve ideyn olunmak üzere kıbel-i şer’iden izin ve ruhsatı hâvî işbu mürasele bi’t tanzîm i’tâ kılındı. Fi 21 Zi’l hicce sene 1331 ve fi 7 Teşrin-i sanî sene 1329
Mukabele olmuştur. Baş kâtib, kadı.

Aded 292: Haldoz
Lazistan Sancağı’nın merkezi olan Rize kasabası mahallâtından Diğer Haldoz mahallesi sakinelerinden zatı zeyl-i vesikada muharreru’l-esâmî müslimîn tarifleriyle muarefe olan Osman Habiboğlu zevcesi Hediye bint Ahmed meclis-i şer’-i şerif-i enverde ikrar-ı tam ve tabir-i ani’l-merâm idub Kura-i Seba nahiyesinin Kafkame karyesinden iken bundan akdem vefat eden pederim Osman Habiboğlu mezbûr Ahmed’den müntakil mezkûr Kafkame karyesinde vâki malûm ve müteârefu’l-hudud iki kıta tarladan benim hisse-i müntakile-i şayiamı veya muğrizemi bedel-i misilleriyle talibine memuri huzurunda ferağ ve tefviz ve teslime ve takririni i’tâ ve muamele-i saire-i lazımesini icrâ ve icabında tefrik ve taksim ve evrak-ı mukteziye-i imzasıyla tahtîme ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile mezkûr Kafkame karyesinden Buberoğlu Kahraman Ağa bin Ali Ağa’yı kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l yevmi’t tasia aşer min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Ali Habiboğlu Ruşen bin Memiş, Faiszâde Hacı Hamza Efendi ibn Hacı Yusuf.

Aded 293: Kavaroz
Lazistan Sancağı’nın merkezi olan Rize kasabası mahallâtından Kavaroz mahallesi sakinelerinden zatı zeyl-i vesikada muharreru’l-esâmî müslimîn tarifleriyle muarefe olan Akmehmedoğlu kerimesi Meryem bint Hacı Ömer meclis-i şer’-i şerif-i enverde takrir-i kelâm ve tabir-i ani’l-merâm idub bundan akdem vefat eden Mirekaloz karyesinden Hutoğlu Hamza bin Hacı Osman zevc-i dahilim olub beynimizde zevciyet kaim iken firaşından hasıla ve benden mütevellide ve halen bi hakki’l-hidâne hacr ve terbiyemde bulunan sulbîye-i sağire kızı kızım Şükriye’nin aslen malı olmayıb nafaka ve kisveye eşed ihtiyac ile muhtace olmağla min kıbeli’l ebb cedd-i gaib ani’l beled-i mezbûr Hacı Osman üzerine kadr-i marûf nafaka farz u takdir olunmak bi’l hidâne matlubumdur dedikte hakikat-i hal mezbûrenin takrir-i meşruhi üzere olduğu mahalle-i merkume imam ve muhtarı tarafından mevrud ilmuhaberden müstebân ve Zikr-i âtî meblağ dahi kadr-i marûf idugi müslimin-i mezbûrunun ihbarlarıyla lede’ş şeri’l enver zâhir ve nümâyân olmağın mucebince sağire-i mezbûrenin nafaka ve kisve bahâ vesair levazım-ı zaruriyesi içun cedd-i gaib-i mezbûr üzerine işbu tarihten itibaren beher şehrî altmış kuruş farz u takdir olunub meblağ-ı mefruz-i mezkûri sağire-i mezbûrenin nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer cedd-i mezbûr Hacı Osman üzerine mezbûre Meryem’e kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’s-sâlise aşer min Zi’l kaade li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Mahalle-i mezkûreden Köse Ömeroğlu Hasan bin Ömer, Kavaroz mahallesinden Abadoğlu(?) Ali Efendi ibn Hacı Hurşid.

Aded 294: Kandeva
Lazistan Sancağı’nın merkezi olan Rize kazası kurâsından Kandeva karyesinden iken bundan akdem vefat eden Alacoğlu Memiş bin Hacı Hüseyin’in sulbî sağir oğulları Kazım ve Beşe Ali ve sulbîye-i sağire kızları Rahime ve Has Hatun’un pederleri müteveffa-yi mezbûrdan mevrus mallarını hıfz ve umurlarını tesviye ve ru’yete ber vechi nasbı ehem ve elzem olmağın emanet ile marûfe ve istikamet ile mevsûfe olub her vechiyle vesâyet uhdesinden gelmeğe kadire idügi karye-i merkume muhtar ve muhtar-ı sani ve heyet-i ihtiyariyesi tarafından mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika marifetu’z-zat valideleri Yeter bint Dursun siğar-ı mezbûrunun pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’t-tasi aşer min şehr-i Zi’l-hicceti’ş-şerife li sene ihdâ ve selâsîne ve selasemie ve elf.
Mukabele olmuştur. Baş kâtib, kadı. Alemdaroğlu Mustafa bin Hacı Memiş, Mehmedoğlu Süleyman bin Ali.

Aded 295: Varda
Lazistan Sancağı’nın merkezi olan Rize kazası kurâsından Kura-i Seba nahiyesinin Varda karyesinden iken bundan akdem vefat eden Esiroğlu Süleyman bin Mustafa’nın sulbî sağir oğulları Sadık ve Hasan’ın pederleri müteveffa-yi mezbûrdan mevrus mallarını hıfz ve umurlarını tesviye ve ru’yete kıbel-i şer’iden mukaddemen vasi tayin olunan li ebeveyn erkarındaşı İsmail’in silah altında bulunmasına binaen diğer bir vasi daha nasbı ehem ve elzem olmağın emanet ile marûfe ve istikamet ile mevsûfe olub her vecihle vesâyet uhdesinden gelmeğe kadire idugi karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika marifetu’z-zat anaları Kâkûle bint Mustafa dahi sağiran-ı mezbûranın pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’l-hadi aşer min şehr-i Rebii’l-ahir li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Sipahioğlu Hafız Osman bin Hafız Yusuf, Timürcioğlu Ahmed bin Habib.

Aded 296: Ğaliçoz
Lazistan Sancağı’nın merkezi olan Rize kazası kurâsından Ğaliçoz karyesinden İskitoğulları İslâm ve Hafız Mehmed Efendi ibnan-i Hacı Ali meclis-i şer’-i şerif-i enverde her biri ikrar-ı tam ve tabir-i ani’l-merâm idub bizim hakkımızı icab edenlerden aid olduğu mehâkim-i şer’iye ve nizamiye’nin ve hukuk ve ticaret ve ceza dairelerinde müddeî ve müddeâ aleyh ve şahs-ı sâlis ve itirazu’l-ğayr-i tarik ve sıfatlarıyla bidayeten ve iâdeten ve itirazen ve istinafen ve temyizen taleb ve dava ve ahz u kabza ve aleyhimize her nevi dava ikame eden olur ise onlarla da muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve hacz vaz’ u fekkine ve lede’l-hâce sulh ve ibraya ve taleb-i icrâya ve bi’l-cümle makbuzatını bize i’tâ ve teslime ve’l-hâsıl her türlü hukuk-i şahsiye ve kanuniyemi muhafaza ve müdafa ile leh ve aleyhimde tahaddüs eden ve edecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımızdan vekâlet-i âmme-i mutlaka-i sahiha-i şer’iye ile dava vekîllerinden Mustafa Efendi ibn İzzet Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’r-râbi min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı.

Aded 297: Hanzi
Lazistan Sancağı’nın merkezi olan Rize kazası kurâsından Hanzi karyesinden şahs-ı zeyl-i vesikada muharreru’l-esâmî müslimîn tarifleriyle muarefe olan ve tezkire-i osmaniyesi görülen Sinekoğlu Yusuf bin Ahmed meclis-i şer’-i şerif-i enverde sulbî kebir oğlu Veysel bin Yusuf mahzarında takrir-i kelâm ve tabir-i ani’l-merâm idub Samsun’un Hançerli mahallesinde kâin Sadıkoğlu Mustafa Efendi ile basened-i hakani şayıan malik ve mutasarrıf olduğum mahallinde beyne’l-ahâlî ve’l-cîrân malûm ve müteârefu’l-hudud müştemilat-ı malûmeyi hâvî bir bab mülk-i menzilde olan dört hisse itibarıyla üç hisse-i şayiamı semen misliyle talibine memuri huzurunda bey’ ve temlik u teslime ve muamele-i lazımesini icrâ ve takririni i’tâya ve evrak-ı mukteziyeyi imza ve tahtîme ve semeni ahz u kabz ile makbuzunu bana irsal ve isal ve teslime ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile oğlum mezbûr Veysel’i vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-samine aşer min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Rakıcızâde Kaşif Efendi ibn Hacı Ömer, Sarı Ahmedoğlu Zelkifl bin Osman.

Aded 298: Roş mahallesi
Zikr-i âtî hususun mahallinde ketb u tahrir içun canib-i şeriat-i ğarradan mezunen bil hükm irsal olunan umenadan mahkeme-i şer’iye baş kâtibi Osman Zeki Efendi bin Salih Efendi Lazistan Sancağı’nın merkezi olan Rize kasabası mahallâtından Roş mahallesinde vâki Hacı Ömerzâde müteveffa Hacı Zekeriyya Efendi’nin menziline varıb zeyl-i vesikada muharreru’l-esâmî müslimîn huzurlarında akd-i meclis-i şer’i âli ettikte menzil-i mezkûrde sakine kezalik zeyl-i vesikada muharreru’l-esâmî müslimîn tarifleriyle muarrefe olan müteveffa-yi mezbûrun zevce-i metrukesi Ulviye bint Hacı Osman ile sulbîye-i kebire kızları Zehra ve Lezize bintan-i mezbûr Hacı Zekeriyya meclis-i makud-i mezkûrde her biri takrir-i kelâm ve tabir-i ani’l-merâm idub murisimiz müteveffa-yi mezbûr Hacı Zekeriyya’dan mevrus ve müntakil gerek Rize ve gerek Batum kasabalarında kâin bi’l-cümle emlak ve arazi ve akarat ile zımem-i nasda olan kaffe-i alacağından bizim hisse-i irsîyemizi icab edenlerden aid olduğu mehâkimin her derecesinde bidayeten ve iâdeten ve itirazen ve istinafen ve temyizen taleb ve dava ve tefrik ve taksim ve ahz u kabza ve lazım gelenlerle muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve mümeyyiz ve hâkim ve ehl-i vukuf tayin ve azline ve isbat-ı verâset iddiasına ve akarat-ı mezkûreyi icar-ı misliyle talibine icar ve teslime ve icar-ı müterakimelerini kezalik ahz u kabz ile bi’l-cümle makbuzatını bize i’tâ ve teslime ve lede’l-hâce sulh ve ibraya ve ber vech-i muharrer ahari tevkil ve azle ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile vereseden Mahmud Efendi ibn mezbûr Hacı Zekeriyya’yı kabullerine mevkûfe vekîl ve naib-i menab nasb u tayin eyledik dediklerini kâtib-i muma ileyh mahallinde ketb u tahrir ve mea mürsel umena-i şeri’le meclis-i şer’e gelub ala vukuihi inha ve takrir itmegin ma vekaa bi’t-taleb ketb olundu. Fi’l yevmi’s-sâlis ve’l-ışrin min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Sarı Ahmedoğlu Dursun, Deli Hüseyinoğlu Hüseyin Efendi ibn Tufan.

Aded 299: Arğaloz
Lazistan Sancağı’nın merkezi olan Rize kazası kurâsından Arğaloz karyesinden iken bundan akdem vefat eden Kebapçıoğlu Hüseyin bin Ahmed’in sulbî sağir oğlu Hakkı’nın pederi müteveffa-yi mezbûrdan mevrus malını hıfz ve umurunu tesviye ve ru’yete bir vasi nasbı ehem ve elzem olmağın emanet ile marûfe ve istikamet ile mevsûfe olub her vecihle vesâyet uhdesinden gelmeğe kadire idugi karye-i merkume imam ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika marifetu’z-zat teyzesi Feride bint Ahmed sağir-i mezbûrun pederi müteveffa-yi mezbûrdan mevrus malını hıfz ve vakt-i rüşd-i sedadlarına değin umurunu tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sabi aşer min Zi’l-hicceti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Hohorininoğlu Mehmed bin Ali, Topcuoğlu Dursun bin Osman.

Aded 300: Çiklenar
Lazistan Sancağı’nın merkezi olan Rize kazası kurâsından Çiklenar karyesi sakinelerinden zatı zeyl-i vesikada muharreru’l-esâmî müslimîn tarifleriyle muarefe olan Gürusoğlu kerimesi Emine bint Ruşen Kaptan meclis-i şer’-i şerif-i enverde babası mezbûr Ruşen Kaptan mahzarında takrir-i kelâm ve tabir-i ani’l-merâm idub karyeden Süleymanoğlu Hüseyin Kaptan bin Hasan ile beynimizde mütehaddis tereke ve alacak ve nafaka ve eşya davalarından dolayı mezbûr Hüseyin Kaptan ile aid olduğu mehâkimin her derecesinde müddeî ve müddeâ aleyh sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve sağire kızım Hüsniye’nin nafaka-i müterakimesini taleb ve davaya ve taleb-i keşf ve mümeyyiz ve hâkim ve ehl-i vukuf tayin ve azline ve lede’l-hâce sulh ve ibraya ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile pederim mezbûr Ruşeni vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’s-sadis min Zi’l-kaadeti’ş-şerife li sene ihdâ selâsîne ve selâsemie ve elf.
Mukabele olmuştur. Baş kâtib, kadı. Kakavanzâde Tahsin Efendi, Kakavanzâde Abdulvahid Efendi.