Mukabele olmuştur. Baş kâtib, nâib. Aded 160: Hopa kazasının Kaledibi karyesi Lazistan Sancağı’na tabi Hopa kazasının Kaledibi karyesinden Mapavrilioğlu Şaban bin Ali meclis-i şer’-i şerif-i enverde takrir-i kelâm ve tabir-i ani’l-merâm idub mezkûr Kaledibi karyesinden vâki mahallinde beyne’l-ahâlî ve’l-cîrân malûm ve müteârefu’l-hudud şureka-i malûme ile basenedi hakani malik ve mutasarrıf olduğum mea bahçe bir bab mülk-i menzildeki üç hisse itibarıyla hissemi mahallinde semeni misliyle talibine memuri muzurunda bey’ ve temlik u teslime ve takririni i’tâya ve semen-i mislini ahz u kabz ile makbuzunu bana irsal ve isal ve teslim ve muamele-i saireyi lazımesini icrâya ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile kaza-i mezkûrun Sondere karyesinden Tokatlızâde Hacı Ahmed Efendi ibn Hüseyin Ağa’yı kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’s-sadis ve’l-ışrin min Cemaziye’l-ahir li sene ihdâ selâsîne ve selâsemie ve elf. Mukabele olmuştur. Baş kâtib, nâib. Civelekoğlu Mahmud bin İdris, Tavilzâde İlyas Efendi. Aded 161: Fatla karyesi Lazistan Sancağı’nın merkezi olan Rize kazası kurâsından Fatla karyesinden

Alioğlu Abdulmecid Efendi ibn Yusuf Efendi meclis-i şer’-i şerif-i enverde Eytâm müdürü Hafız Harun Efendi mahzarında takrir-i kelâm ve tabir-i ani’l-merâm idub deruni kasabada Orta Cami-i şerifin tamir ve termimine meşruta icarat-i vakfiyesinden lira-i Osmanî yüz kuruş hesabıyla binyüzbeş kuruş ve Bekiroğlu müteveffa Ali’nin eytâmı İbrahim ve İsmail’in mallarından kezalik lira-i Osmanî yüz kuruş hesabıyla üçyüzaltmışaltı kuruş yirmi para ki ceman bindörtyüzyetmişbir kuruş yirmi para müdir-i muma ileyhden istidane ve kabza ve umuruma sarfla istihlâk idub meblağ-ı mezkûr ile semeni işbu tarihten iki sene-i kamile müeccel olmak üzere yine nukûd-i mevkûfeden ve eytâm-ı mezbûranın mallarından ve müdir-i muma ileyhden iştira eylediğim bir cild Ali Efendi fetvası semeninden ikiyüzaltmışbeş kuruş ki ceman binyediyüzotuzaltı kuruş yirmi para zimmetimde vacibu’l-eda ve lazımu’l-kada deynim ve borcum olub murur edecek eyyamın güzeştesiyle mesarif-i saireyi dahi terk ve teberru eyledim dedikte ğıbbe’t-tasdiki’ş-şer’i kefalet-i vakıaları meclis-i eytâmca musaddak olan Kapnes karyesinden Mehmed Alioğlu Dursun Efendi ibn Hacı Mustafa ve Fosa karyesinden Kurdoğlu İslâm bin İsmail ve fırıncı esnafından ?oğlu Bahadır Usta ibn (?) tekrar meclis-i makud-i mezkûrde müdir-i muma ileyh mahzarında her biri ikrar-ı tam ve takrir-i kelâm idub medyun-i muma ileyh Abdulmecid Efendi’nin ceman zimmetinde edası vacib olan binyediyüzotuzaltı kuruş yirmi para ile terk ve teberru eylediği meblağın edasına biz dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub her birimiz aharın zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’r-râbia aşir min Cemaziye’l-ahir li sene ihdâ selâsîne ve selâsemie ve elf. Mukabele olmuştur. Baş kâtib, nâib. Mübaşir İbrahim Efendi, Lıkoğlu(?) Mahmud Ağa. Aded 162: Umma Tariklar Lazistan Sancağı’nın merkezi olan Rize kazası kurâsından Umma Tariklar karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Tavukçuoğlu kerimesi Zülfiye bint Ömer meclis-i şer’-i şerif-i enverde takrir-i kelâm ve tabir-i ani’l-merâm idub halen zevc-i dahilim olan Umma karyesinden Tavukçuoğlu İsmail bin İbrahim beni bila nafaka vela munfek-i şer’i terk idub müddet-i sefer-i baid olan Rusya memalikine gittikden sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf meblağ farz u takdir olunmak matlubumdur dedikte hakikat-i hal mezbûre Zülfiye’nin takrir-i meşruhi üzere olduğu karye-i merkume imam ve muhtar ve heyet-i ihtiyariyesi tarafından mevrud ilmuhaberden müstebân ve Zikr-i âtî meblağ dahi kadr-i marûf idugi müslimin-i mezbûrdan ihbarlarıyla lede’ş-şer’il enver zâhir ve nümâyân olmağın mezbûre bade’t-tahlifi’ş şer’i mucebince nafaka ve kisve bahâ vesair levazım-ı zaruriyesi içun zevci gaib-i mezbûr İsmail üzerine işbu tarihten itibaren beher şehrî altmış kuruş farz u takdir olunub mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer zevci gaib-i mezbûr İsmail üzerine rucua mezbûreye kıbel-i şer’iden izin verilmegin ma veka bi’t-taleb ketb olundu. Fi’l-yevmi’l-hadi ve’l-ışrin min Cemaziye’l-ahir li sene ihdâ selâsîne ve selâsemie ve elf. Mukabele olmuştur. Baş kâtib, nâib. Tavukçuoğlu Molla Salih bin Hasan, karyeden Tavukçuoğlu Murad Efendi bin Memiş Efendi. Aded 163: Trabzon vilayetinin Yomra nahiyesinin Şana karyesi Trabzon vilayetinin Yomra nahiyesinin Şana karyesinden Şatırzâde Tevfik Bey ibn Osman Bey Lazistan Sancağı mahkeme-i şer’iyesine makud-i meclis-i şer’-i şerif-i enverde takrir-i kelâm ve tabiri-i ani’l-merâm idub nahiye-i mezkûrenin Korki nâm-ı diğer Falkoz karyesinde vâki mahallinde beyne’l-ahâlî ve’l-cîrân malûm ve müteârefu’l-hudud bi’l-cümle arazi ve emlaktaki hisse-i şayiamı vilayet-i mezkûrenin Kasım Ağa mahallesinde Şatırzâde Subhi Bey Efendi’ye semen ve bedel-i misilleriyle bey’ u ferağ ve temlik u teslime ve muma ileyh Subhi Bey talib olmadığı suretde talib-i ahara kezalik semen ve bedel-i misilleriyle memuri huzurunda katiyen bey’ u ferağ ve temlik u teslime ve semen ve bedel-i misillerini ahz u kabz ile makbuzatını bana irsal ve isal ve teslime ve takririni i’tâya ve muamele-i saire-i lazımesini icrâ ve îfâya ve mucib-i muhâkeme bir hal vukuunda icab edenlerle aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâya ve hacz vaz’ u fekkine ve tefrik u taksime ve isbat-ı verâset iddiasına ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile Kasım Ağa mahallesinde sakin Şatırzâde ? Bey bin Hurşid Bey’i kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’r-râbi min Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, nâib. Muhzır İbrahim Efendi, Müstantik kâtibi Mehmed Efendi. Aded 164: Hacinoz mahallesi Lazistan Sancağı’nın merkezi olan Rize kasabası mahallâtından Hacinoz mahallesinden iken bundan mukaddem muhteriken vefat eden Topaloğlu Mustafa bin Abdullah’ın ber vechi ati varisi olduğunu iddia eden sulbî kebir oğlu Memiş meclis-i şer’i münîrde Zikr-i âtî hususa taraf-i şer’iden husumeti re’y olunan ve müteveffa-yi mezbûrun hıyn-i vefatında nezdimde bulunub Polis idaresi marifetiyle teslim olunan mikdaratı nakd-i mevcudine hasbe’l memuriye vazıu’l-yed bulunan Eytâm müdürü Hafız Harun Efendi ibn Hacı Dursun Efendi muvacehesinde bi’l-verâse üzerine dava ve takrir-i kelâm idub pederim müteveffa-yi mezbûr Mustafa’nın verâseti sulbî kebir oğlu olduğum cihetle hasren bana munhasıra olub başka varisi ve terekesine mustahik-i ahar kimesnesi olmamağla pederim müteveffa-yi mezbûrun hıyn-i vefatında nezdinde mevcud olub eytâm sandığında hıfz edilen seksen buçuk lira-i Osmanî nakd-i mevcuduna müdür muma ileyh hasbe’l memuriye vazıu’l-yed olduğundan meblağ-ı mezkûri bana eda ve teslime müdir-i muma ileyhe tenbih olunmak hasbe’l verâse matlubumdur deyu dava ve lede’s-sual ol dahi cevabında fi’l-hakika müteveffa-yi mezbûrun ol mikdar kuruşuna hasbe’l memuriye vazıu’l-yed bulunduğunu taven ikrar ancak müddeî mezbûrun ber vech-i muharrer verâseti müddeâsı malûmum değildir deyu inkarına mukarin müddeî mezbûr ber vech-i muharrer verâset-i müddeâsını evvelen ba veraka-i mesture mensub oldukları mezkûr Hacinoz mahallesi muhtar-ı sanisi Dursun Efendi ile azadan Receb ve Edhem Efendiler’den sirren ve badehu müterâfian hazır oldukları halde Çenbercioğlu Hacı Tahir bin Ahmed ile Çamurluoğlu Ali bin Yunus’dan bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idukleri işar ve ihbar olunan ve müteveffa-yi mezbûr ile verese-i mezbûr i arifan olan mezkûr Hacinoz mahallesinden Çenbercioğlu Hasan bin Abdurrahim ile Çenbercioğlu Said Ali bin İlyas nâm kimesnelerin kezalik bi’l-muvacehe ber nehc-i şer’i şahadetleriyle isbat itmegin mucebince verâsetine bade’l-hükm ve’t-tenbih müddeâya seksen buçuk lira-i Osmanîyi müddeî mezbûr Memiş’e eda ve teslime müdir-i muma ileyh Hafız Harun Efendi’ye tenbih olunduğu tescîl ve i’lâm olundu. Fi’l-yevmi’s-sâlis min şehr-i Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, nâib. Aded 165: Pendoz mahallesi Lazistan Sancağı’nın merkezi olan Rize kasabası mahallâtından Pendoz mahallesinden ?oğlu Mahmud Usta ibn Tahir meclis-i şer’-i şerif-i enverde Eytâm müdürü Hafız Harun Efendi mahzarında ikrar-ı tam ve tabir-i ani’l-merâm idub Tenekeci müteveffa İbrahim Efendi’nin sağir oğlu Mehmed’in malından lira-i Osmanî yüz kuruş hesabıyla müdir-i muma ileyhden istidane ve kabz ve umuruma sarfla istihlâk eylediğim binikiyüz kuruş ile semeni işbu tarihten iki sene-i kamile müeccel olmak üzere yine sağire-i mezbûrenin malından ve müdir-i muma ileyhden iştira eylediğim bir cild Ali Efendi fetvası semeninden ikiyüzonaltı kuruş ki ceman bindörtyüzonaltı kuruş zimmetimde vacibu’l-eda ve lazımu’l-kada deynim ve borcum olub murur edecek eyyamın güzeştesiyle mesarif-i saireyi dahi terk ve teberru eyledim dedikte ğıbbe’t-tasdiki’ş-şer’i kefalet-i vakıaları meclis-i idare-i eytâmınca musaddak olan Kale mahallesinden İslâmoğlu Hüseyin bin Yakub ile Roş mahallesinden Siracoğlu Mahmud Efendi ibn Abdulhamid Efendi’yi ve Hacinoz mahallesinden Çenbercioğlu Said Ali bin İlyas tekrar meclis-i makud-i mezkûrde müdir-i muma ileyh mahzarında her biri ikrar-ı tam ve tabir-i ani’l-merâm idub medyun-i mezbûr Mahmud Usta’nın ceman zimmetinde edası vacib olan bindörtyüzonaltı kuruş ile terk ve teberru eyledigi meblağın edasına biz dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz dahi kezalik bi’l-emr ve’l-kabul aharın zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’t-tasi min Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, nâib. Sofoğlu İbrahim, Lıkoğlu(?) Abdulkadir. Aded 166: Mapavri nahiyesinin Babik Lazistan Sancağı’nın merkezi olan Rize kazası nevâhîsinden Mapavri nahiyesinin Babik karyesinden Burduroğlu Mustafa bin Osman meclis-i şer’-i şerif-i enverde takrir-i kelâm ve tabir-i ani’l-merâm idub kız karındaşım Sâbire tarafından aleyhime ikame olunan gabn ve takrir ve arazi davasından dolayı mezbûre ile aid olduğu mehâkimin her derecesinde müddeî ve müddeâ aleyh sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâ ve tefrik u taksime ve lede’l-hâce sulh ve ibra ve isbat-ı verâset iddiasına ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile dava vekîllerinden Hafız Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’s-sâlis ve’l-ışrin min Şevvali’l-mükerrem li sene ihdâ selâsîne ve selâsemie ve elf. Mukabele olmuştur. Baş kâtib, nâib. Mübaşir Sadık Efendi, Fencioğlu Remzi Efendi. Aded 167: Müftü mahallesi Lazistan Sancağı’nın merkezi olan Rize kasabası mahallâtından Müftü mahallesinden Şamilzâde Memiş Efendi ibn müteveffa Muharrem Efendi meclis-i şer’i münîrde mahalle-i merkume ahalisinden Hacı Abdurrahmanoğlu Hasan Reis bin Abdullah muvacehesinde babam muma ileyh Muharrem Efendi hayatında mezbûr Hasan Reis altıyüzseksenaltı kuruş karz ve teslim ol dahi ahz ve’l istikraz ve umuruna sarfla istihlâk idub hatta meblağ-ı mezkûr zimmetinde sahihen deyni olduğunu hâvî üçyüzyirmi sene-i rumîsi temmuzunun onüçüncü günü tarihli bir kıta deyn senedi i’tâ eylediği halde babam muma ileyh Muharrem Efendi meblağ-ı mezkûri kable’l-ahz ve’l-istifa vefat etmekle verâseti benimle zevce-i menkuhe-i metrukesi Nazire bint Ali ve sulbî sağir oğlu Seyfullah’a munhasıra olub başka varisi ve terekesine mustahik-i aharı olmadığından meblağ-ı mezbûrdan mesele-i mirasımız vecihle hisse-i irsîyeme isabet eden üçyüz kuruş beş parayı bana eda ve teslime mezbûr Hasan Reis’e tenbih olunmak matlubumdur deyu meali takrir-i meşruhuna mutabık ve tarih-i mezkûrla müerreh sened-i mezkûri ibraz ve iraesiyle bade’t dava ve’s-sual ol dahi cevabında müteveffa-yi mezbûr Muharrem Efendi’ye cihet-i merkûmeden ber muceb-i sened ber vech-i muharrer altıyüzseksenaltı kuruş borcu olduğunu ve verâsetini vech-i muharrer üzere inhisar eylediğini taven ikrar ve itiraf idub lakin meblağ-ı mezkûre mukabil müteveffa-yi mezbûr Muharrem Efendi’ye hayatında elliiki kuruşla ceman ikiyüzaltmışiki kuruş onbeş paralık muhtelifu’l cins erzak i’tâ ve teslim ettiğim Polihozluoğlu Hasan Reis zimmetinde cihet-i karzdan alacağım olan beş lira-i Osmanîyi mezbûr Hasan Reis’den almak üzere deynime mukabil dayinim muma ileyh Muharrem Efendi’yi mezbûr Hasan Reis üzerine havale-i sahiha ile havale ve gerek muma ileyh Muharrem Efendi ve gerek mezbûr Hasan Reis’den her biri havale-i mezkûreyi kabul eylediklerinden ve şu halde muma ileyh Muharrem Efendi’den alcağım kaldığına binaen müddeî mezbûr Memiş Efendi’nin iddiasının reddini taleb ederim deyu bade’d def’ ve’s-sual mezbûr Memiş Efendi dahi cevabında müddeâ aleyhin def’i vakıını(?) ba’de’l inkar müddeâ aleyh mezbûr hasan Reis def’i mezkûrini isbat etmek üzere muhakemenin talik olunduğu günde mezbûr Hasan Reis’in adem-i vuruduna binaen kendisine teblîğ olunan son ihbarname üzerine icabet etmediğinden müddeî mezbûrun gıyaben ru’yet-i muhâkeme talebi üzerine hukukunu muhafaza ve müdafaya vekîl-i musahhar tayin olunan Mehmed Efendi ibn Ahmed Efendi muvacehesinde zabt-ı sabıkın kıraatından sonra müddeî mezbûr Memiş Efendi müvekkil-i mezbûr Hasan Reis’in ikrar-ı sabık-ı vech ile hisse-i irsîyenin taht-ı hükme alınmasını taleb etmesine binaen inde’l itiraz icab-ı şer’isi îfâ olunmak üzere vicahen ceryan eden muhakemede müddeî aleyh mezbûr Hasan Reis’in ikrar-ı mucebince müddeâ bih meblağdan müddeî mezbûr Memiş Efendi’nin hisse-i irsîyesine isabet eden üçyüz kuruş beş parayı müddeî mezbûr Memiş Efendi’ye eda ve teslime müvekkil-i mezbûr Hasan Reis’e izafetle vekîl-i musahhar muma ileyh Mehmed Efendi’ye tenbih olunduğu tescîl ve i’lâm olundu. Fi’l-yevmi’s-sani ve’l-ışrin min Muharremi’l-haram li sene ihdâ selâsîne ve selâsemie ve elf. Mukabele olmuştur. Baş kâtib, nâib. Aded 168: Bundan bir sicil evvelki sicilin yediyüzyetmişbir numara ve üçyüzellibeşinci sahifesinde mukayyed Pendoz mahallesinde Sarı Ahmedzâde Receb Efendi’nin irae-i hüccete yazılan zahiriye mukteziye ilamıdır İşbu idane hüccetinde muharrer olduğu üzere medyun-i mezbûr Receb Efendi’nin ğaraz(?) teslimat eytâm sandığına borcu olan binbeşyüzaltmışüç kuruş gerek kendisine ve gerek kefilleri muharreru’l-esâmî Hacı Mustafa ve Mehmed ve Mustafa Efendiler’e vâki olan ihbar üzerine tesviye etmedikleri eytâm müdürlüğünden beyanda meblağ-ı mezkûr hıyn-i te’diyesine değin teberru edilen eyyamın güzeştesiyle ve mea mesarif tahsil-i dermiyan edilmekle ol vechile medyun ve kefillerinden bi’t tahsil eytâm müdürlüğüne teslim-i intiza eylediği i’lâm olundu. Fi’l-yevmi’l aşir min şehr-i Recebi’l-ferd li seneti ihdâ selâsîne ve selâsemie ve elf. Aded 169: Filandoz Lazistan Sancağı’nın merkezi olan Rize kazası kurâsından Filandoz karyesinden iken bundan akdem vefat eden Hacı Tataroğlu Said bin Zekeriyya’nın sulbî sağir oğlu Zekeriyya ile sulbîye-i sağire kızı Sulbîye’nin pederleri müteveffa-yi mezbûrdan mevrus mallarını hıfz ve umurlarını tesviye ve ru’yete bir vasi nasbı ehem ve elzem olmağın emanet ile marûfe ve istikamet ile mevsûfe olub her vecihle vesâyet uhdesinden gelmeğe kadire idugi karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika marifetu’z-zat valideleri Karoğlu kerimesi Zeliha bint Sadık sağiran-i mezbûranın pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’l-hamis min şehr-i Recebi’l-ferd li sene ihdâ selâsîne ve selâsemie ve elf . Mukabele olmuştur. Baş kâtib, nâib. Hacıoğlu Rıfat bin Gül Ali, Hacı Tataroğlu Esad bin Yunus Efendi. Aded 170: Mavrant Lazistan Sancağı’nın merkezi olan Rize kazası kurâsından Mavrant karyesi ahalisinden iken bundan bir sene mukaddem vefat eden Hacı Hasanoğlu Hatib bin müteveffa Hasan’ın sulbî sağir oğlu Hasan ile sulbîye-i sağire kızı Fatıma’nın pederleri müteveffa-yi mezbûrdan mevrus mallarını hıfz ve umurlarını tesviye ve ru’yete bir vasi nasbı ehem ve elzem olmağın emanet ile marûfe ve istikamet ile mevsûfe olub her vecihle vesâyet uhdesinden gelmeğe kadire idugi karye-i merkume muhtar-ı evveli ve muhtar-ı sanisi ve heyet-i ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika marifetu’z-zat teyzeleri Cemile bint Hasan sağiran-ı mezbûranın pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’l-hamis ve’l-ışrin min Cemaziye’l-ahir li sene ihdâ selâsîne ve selâsemie ve elf. Mukabele olmuştur. Baş kâtib, kadı. Mahmudoğlu Ali bin Osman, Molla Hüseyinoğlu Ahmed bin Hasan, Karafazlıoğlu İlyas bin Durmuş, Memişoğlu İsmail bin Kibar. Aded 171: Potomya Kaçıran Lazistan Sancağı’nın merkezi olan Rize kazası kurâsından Potomya Kaçıran karyesinden Burnazoğlu İlyas bin Hurşid meclis-i şer’-i şerif-i enverde takrir-i kelâm ve tabir-i ani’l-merâm idub karye-i merkûmeden Çolakoğlu Mustafa Çavuş bin Hüseyin ile beynimizde mütehaddis arazi ve tecavüz-i hudud davalarından dolayı mezbûr Mustafa Çavuş ile aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve tefrik u taksime ve taleb-i keşf ve mümeyyiz ve hâkim ve ehl-i vukuf tayin ve azline ve lede’l-hâce isbat-ı verâset iddiasına ve sulh ve ibraya ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile dava vekîllerinden Mustafa Efendi ibn İzzet Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’s-sani ve’l-ışrin min Cumade’l ahir li sene ihdâ selâsîne ve selâsemie ve elf. Mukabele olmuştur. Baş kâtib, kadı. Muhzır Sadık Efendi, Safoğlu İbrahim Efendi. Aded 172: Kura-i Seba’nın Anzer-i Süfla Lazistan Sancağı’nın merkezi olan Rize kazası nevâhîsinden Kura-i Seba nahiyesinin Anzer-i Süfla karyesinden Huyluoğlu İdris bin Cevahir ile Katıroğlu nâm-ı diğeri Huyluoğlu Osman bin Süleyman meclis-i şer’i münîrde dava vekîllerinden Arif Efendi ibn Tevfik Efendi mahzarında her biri takrir-i kelâm ve tabir-i ani’l-merâm idub karyeden Beşaretlioğlu nâm-ı diğeri Cemadanoğlu(?) Genç Ali ile Alamanoğlu İlyas ve Mehmed ve Kanbozoğlu Arif’in zevcesi Esmaoğlu Kasım ve rufeka-i sairesi ile beynimizde mütehaddis sirkat davasından dolayı mezbûrun ile aid olduğu mehâkim-i hukukiye ve cezaiyede müddeî ve müddeâ aleyh ve müştekî ve müştekâ aleyh ve sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve’l-hâsıl hukuku şahsiyye ve kanuniyemizi muhafaza ve müdafaya ve mütevakkıf olduğu umûrun küllîsine tarafımızdan vekâlet-i mutlak-ı sahiha-i şer’iye ile muma ileyh Arif Efendi’yi vekîl ve naib-i menab nasb u tayin eyledik dediklerinde ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi selh min Cemaziye’l-ahir li sene ihdâ selâsîne ve selâsemie ve elf. Mukabele olmuştur. Baş kâtib, kadı. Muhzır İbrahim Efendi, Şeyhzâde Memiş Efendi. Aded 173: Küçük Samri Lazistan Sancağı’nın merkezi olan Rize kasabası mahallâtından Küçük Samri mahallesinden zatı zeyl-i vesikada muharreru’l-esâmî müslimîn tarifleriyle muarrefe olan Hanife bint Emin meclis-i şer’-i şerif-i enverde mahalleden Alevoğlu İsmail bin Ali mahzarında mezbûr İsmail’in bundan akdem vefat eden oğlu Rıza ile beynimizde zevciyet kaime iken firaşından hasıla ve benden mütevellide ve halen bi hakki’l-hidâne hacr ve terbiyemde olan altı aylık Naziye’nin aslen malı olmayıb nafakaya eşed ihtiyac ile muhtace olmağla min kıbeli’l eb ceddi mezbûr İsmail üzerine kadr-i marûf meblağ farz u takdir olunmak matlubumdur deyu dava ve lede’s-sual müddeâ aleyh mezbûr İsmail dahi cevabında müddeiye-i mezbûrenin ber vech-i muharrer müddeâsını taven ikrar lakin nafaka-i itasına kudretim yokdur dedikte Zikr-i âtî meblağ kadr-i marûf idugi zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olmağın mucebince sağire-i mezbûrenin nafaka ve kisve bahâ vesair levazım-ı zaruriyesi içun min kıbeli’l eb ceddi mezbûr İsmail üzerine işbu tarihten itibaren beher yevmî otuz para farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer mezbûr İsmail üzerine rucua mezbûre Hanife’ye izin verilmegin ma vekaa bi’t-taleb ketb olundu. Fi’l-yevmi’r-râbi aşer min Cumade’l ahir li sene ihdâ selâsîne ve selâsemie ve elf. Mukabele olmuştur. Baş kâtib, kadı. Tabakoğlu Tahir bin Mikdad, Yakuboğlu İsmail bin Osman. Aded 174: Filandoz Lazistan Sancağı’nın merkezi olan Rize kazası kurâsından Filandoz karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Hacı Tataroğlu kerimesi Naciye bint Zekeriyya meclis-i şer’-i şerif-i enverde takrir-i kelâm ve tabir-i ani’l-merâm hala zevci dahilim olan Muskas karyesinden Karoğlu Mehmed bin Sadık bundan akdem beni bila nafaka vela munfek-i şer’i terk idub müddet-i sefer-i baid olan Rusya memalikine gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf meblağı farz u takdir olunmak matlubumdur dedikte hakikat-ı hal mezbûrenin takrir-i meşruhi üzere olduğu karye-i merkume imam ve muhtar ve heyet-i ihtiyariyesinden mevrud ilmuhaberden müstebân ve Zikr-i âtî meblağ dahi meblağ dahi kadr-i marûf idugi müslimin-i mezbûrun ihbarlarıyla lede’ş şeri’l enver zâhir ve nümâyân olmağın mezbûre bade’t-tahlîf mucebince nafaka ve kisve bahâ vesair levazım-ı zaruriyesi içun zevc-i gaib-i mezbûr üzerine işbu tarihten itibaren beher şehrî kırkbeş kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer zevci gaib-i mezbûr üzerine rucua mezbûre Naciye’ye kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’s-sani min şehr-i Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, kadı. Hacı Alioğlu Hüseyin Efendi ibn Hacı Ali, Yıldırımoğlu Ahmed bin Ali, Kanburoğlu Mustafa Efendi ibn Hacı Mehmed, Baltacıoğlu Mehmed Reis bin Osman. Aded 175: Sandık karyesi Lazistan Sancağı’nın merkezi olan Rize kazası kurâsından Sandık karyesi sakinelerinden zatı zeyl-i vesikada muharreru’l-esâmî tarifleriyle muarrefe olan Pupuze(?) bint Kasım meclis-i şer’-i şerif-i enverde Hamrik mahallesinden Kasbaroğlu Rasim bin Ahmed mahzarında üzerine dava ve takrir-i kelâm idub merkum Rasim’in zevce-i menkuhe-i medhul-i bihâsı olduğum halde benimle firaşından hasıla ve benden mütevellide sulbîye-i sağire kızım Hamdiye içun mesken-i şer’î tedarikine kadar işbu mahkeme-i şer’iyeden sadır olan işbu binüçyüzoyuzbir sene-i hicrisi Saferu’l hayrının yirmisekizinci günü tarihli i’lâm mucebince üzerine yevmî dört kuruş nafaka takdir ettirmiştim ahiren zevcim mezbûr Rasim üç talak ile beni tatlik etmekle zimmetinde mutekarrer ve makud-i aleyh mehr-i müeccel hakkım olan ikiyüz kuruş ile nafaka-i iddetim içun dahi yüzelli ve nafaka-i müterakim içun de ikiyüz ki ceman min haysu’l mecmu beşyüzelli kuruş mezbûr içun işbu meclisde tamamen ve kamilen ahz u kabz ve istifa-i hak ile zimmetini ibra ve ıskat eylediğimden ancak bi hakki’l-hidâne hacr ve terbiyemde olan sağire-i mezbûre içun üzerine kadr-i marûf meblağ farz u takdir olunmak matlubumdur deyu dava ve lede’s-sual ol dahi cevabında müddeiye-i mezbûrenin ber vech-i muharrer kelimatını tamamen ve kamilen tasdik ve takrir ettikten sonra sağire-i mezbûre içun şehrî ancak kırkbeş kuruş verebilmek iktidarına olduğunu beyan ve müddeiye-i mezbûre de ol mikdar muvafakat etmekle mucebince sağire-i mezbûrenin nafaka ve kisve bahâ vesair levazım-ı zaruriyesi içun babası mezbûr üzerine rıza-i tarafeynle işbu tarihten itibaren beher şehrî kırkbeş kuruş farz u takdir olunub meblağ-ı mefruz-i mezkûri sağire-i mezbûrenin nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer babası mezbûr üzerine rucua mezbûre Pupuze’ye kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’l-hadi ve’l-ışrin min şehr-i Rebii’l-ahir li sene ihdâ selâsîne ve selâsemie ve elf. Mukabele olmuştur. Baş kâtib, kadı. Velikaoğlu(?) Tufan bin Yunus, Hutoğlu Tayyib bin Dursun, Karacaoğlu Hasan bin Ömer. Aded 176: Kanunlar Hükkâm-ı şer’i ve memurin-i şer’iye hakkında kanun-i muvakkat Mukaddime Birinci madde: mehâkim-i şer’iye ahkam-ı şer’iye ve usulu ve kavaid-i mer’iye dairesinde ru’yet ve fasl-i deâvî ve tesviye-i umuru mesalihle mükelleftir. İkinci madde: mehâkim-i şer’iye-i deâvîye müteallık her türlü hususat içun devâir-i resmiyeten müzekkire yazabilir ve işbu müzekkirelerin infaz ahkamı mecburidir. Üçüncü madde: mehâkim-i şer’iyede hâkim münferid usul-i cari ve istima ve ru’yet ettiği deâvîden dolayı hükm ve ilam-ı itası munhasıran kadılara aiddir ancak müşaviri olan mahkemelerde müşavirler canib-i kadıdan kendilerine havale olunacak hususatı hâkime mezun oldukları gibi müşaviri olmayan mahkemelerde lede’l-hâce kadılar istinabeye de mezundurlar. Dördüncü madde: mehâkim-i şer’iyeden sadır olan ilamat fetevahane-i âlî veya meclis-i tedkikat-ı şer’iyeden temyizen nakz edilmedikçe mer’i ve muteberdir. Fasl-ı Evvel Mehakim-i şer’iyenin teşkilatı Beşinci madde: Merakiz-i vilayat ve elviye ile kazaların cümlesinde bir mahkeme-i şer’iye bulunur ve merkez vilayet ve liva ve kazaya li’l ekal altı saat mesafesi olan veya mesalih-i şer’iyesi kesir bulunan nevâhîye birer nahiye naibi tayin olunabilir. Altıncı madde: Pây-i taht-ı saltanat-ı seniyyede Kadıaskerlik mahkemesi ünvanı altında iki mahkeme bulunduğu gibi İstanbul ve Muhallefat ve Evkaf kadılıkları ve birinci sınıf liva derecesinde olarak Galata ve Üsküdar kadılıkları ve birinci sınıf kaza derecesinde olarak Mahmudpaşa ve Davudpaşa ve Eyüb ve Kasımpaşa ve Yeniköy kadıları mehâkimi mevcud olub bunların vazife ve salahiyetleri ve hudud-i kazaları talimat-ı mahsusa ile muayyendir iktiza-i hale göre işbu mehâkim teksir ve tadil olunabilir. Yedinci madde: Kadıaskerlik mehâkiminin vazifesi pây-ı taht-ı mehâkiminde sadır olan ilamat temyizen nakz edilub yeniden ru’yet-i dava lazım geldiği veya vilayet ve elviye-i saire ile diğer kazalar mehâkiminden mu’ti ilamat inde’t temyiz nakz olunarak davanın pây-i tahtında ru’yetine fetevahane-i âlî veya meclis-i tedkikat-i şer’iyeden karar verildiği takdirde o davayı istinaf-i ru’yet ve fasl etmekten ibarettir. Sekizinci madde: mehâkim-i şer’iyenin cümlesinde bir baş kâtib ve luzumu kadar zabt kâtibi ve mukayyid ve muhzır ve hademe bulunacağı gibi Kadıaskerlikler ile İstanbul ve Muhellefat ve Evkaf ve Galata ve Üsküdar kadılıkları mehâkiminde ve merakiz-i vilayattan mesalih-i şer’iyede kesir olan mehâkim-i şer’iyede dahi lüzum ve ihtiyaca göre birer ve ikişer müşavir ve lüzum görülen mehâkimde tereke memurları ve eytâm müdürleri bulunur. Dokuzuncu madde: Bil umum mehâkim-i şer’iyeden sadır olan ilamatın temyizi vazifesi fetevahane-i âlî ile meclis-i tedkikat-ı şer’iye beyninde müşterek olub fetevahane-i âlî temyizi istid’â olunan ilamat ve hücec-i şer’iyenin mühürlerini tatbik ve sakk ve sebklerini yani metn-i ilama nazren verilen hükm-i şer’inin mesele-i şer’iyesine muvafık olub olmadığını ve meclis-i tedkikat-ı şer’iye dahi levayıh-i itiraziyyemin münderecatına nazaren ilam-ı mümeyyiz bihin zabta ve zabtın usul-i meşruasına muvafık olub olmadığını ve layıhada bir defa sahih-i dermiyan edilib edilmediğini tedkik ile netice-i mütebeyyineye göre izahat-ı kâfiyeyi hâvî karar i’tâ eyler. Onuncu madde: Bila lâyıha tedkik ve tasdiki taleb edilen senedat ve hucec ve ilamat-ı şer’iyenin tedkiki ve vuku bulacak istiftalar içun cevab-ı sevabı hâvî feteva-i şerif ihzarı munhasıran fetevahane-i âlîye aid olduğu gibi esbab-ı sahiha-i şer’iyeye mebni nakl-i dava değin merci-i salahiyetleri ve makam-ı Şeyhu’l İslâmi’den havale olunacak bazı hususat-ı mühimmenin müzakeresiyle o babda karar ittihazi meclis-i tedkikat-ı şer’iye aiddir. Onbirinci madde: Fetevahane-i âlîye muteallık umûr ve mesalih-i mütenevvianın hüsni temşiyet verdiği eminu’l fetva ile muavinine aid olub nev-i mesalih itibarıyla luzumu kadar memur ve mümeyyiz ve müsevvid ve mukayyid bulunur. Onikinci madde: Meclis-i tedkikat-ı şer’iye bir reis ve altı azadan ve azalık bir inzimamiye bir baş kâtibten mürekkeb olub meclis-i mezkûrun umur-i tahririye kaydiyesini îfâ etmekte olan kalemde dahi iki mümeyyiz ve ilamat-ı şer’iyenin telhisiyle mukarreratın tahrir vesair mesalihin tedviri içun lüzumu kadr-i ketebe bulunur. Onüçüncü madde: Murafaati’ş şer’iye ve muamelat-ı temyiziye usul-i muhakeme-i şer’iye tabidir. Fasl-ı Sani Mesratib ve silsile-i hükkâm Ondördüncü madde: Silsile-i hükkâm ber vechi ati derecat ve sunuf üzerine mürettebdir. 1- Kadıaskerlikler ve bazı eyalet-i mümtaze kadılıkları 2- İstanbul muhallefat-ı evkaf kadılıkları 3- Harameyn-i muhteremeyn ile birinci ve ikinci ve üçüncü sınıf vilayet kadılıkları 4- Birinci ve ikinci ve üçüncü sınıf elviye kadılıkları 5- Birinci ve ikinci ve üçüncü sınıf kaza kadılıkları Mesalih-i şer’iyenin kıllet ve kesreti ve mesafenin kurb ve bu’di mevkiğin ehemmiyet itibarıyla vilayat ve elviye ve kazalar sunuf-i nizamname ile muayyendir. Onbeşinci madde: Fetva emaneti ve meclis-i tedkikat-ı şer’iye riyaseti silsile-i hükkâmın fevkinde olub fetva emaneti muavinleri ve ilamat-ı şer’iye müdürlüğü ve fetva baş müsevvidliği ikinci derecedeki hükkâma ve meclis-i tedkikat-ı şer’iye azalıklarında fetvahanede ilamat-ı şer’iye mümeyyizliklerinde bulunanlar üçüncü derecedeki hükkâma ve fetvahanede bulunan mümeyyiz muavinleri ile meclis-i tedkikat-ı şer’iye mümeyyizleri dördüncü derecede hükkâma muadil müşaviri bulunan mehâkimdeki müşavirler maiyetinde bulundukları kadıların iki derece madununda itibar olunurlar. Onaltıncı madde: Kadılar ile bab-ı fetevaya merbut olan bi’l umum memurin-i ilmiyenin intihab ve tayinlerinde ruteb-i itibariye-i ilmiyenin dahl ve tesiri yoktur. Fasl-ı sâlis Kadıların evsaf ve suret-i intihab ve tayinleri Onyedinci madde: Bir kimesne kadılığa intihab ve tayin olunabilmek içun evvelen yirmibeş yaşını ikmal etmiş olmak saniyen bir sene ve daha ziyade habs cezası ve yahut daha ağır bir ceza ile mahkum olmamış bulunmak sâlisen mecellenin binyediyüzdoksaniki ve binyediyüzdoksandördüncü maddelerinde muharrer evsaf-ı kaza-i haiz olmak rabien medrese-i kudattan mezun olmak şarttır. Fıkra-i muvakkıta: Ancak 13 Muharrem 1290 tarihli hükkâm-ı şer’i nizamnamesi mucebince ve ahiren icrâ kılınan tensikat neticesinde bi’l imtihan sunuf-i kazadan birine kayıd ve kabul ve yedlerine tezkire i’tâ edilmiş veya tensik komisyonlarınca imtihana tabi tutulduğu cihetle işbu kanunun neşri tarihine kadar medresetu’l kudattan emsali mesellu bi’l imtihan isbat-ı ehliyet etmiş olan zevatın bulundukları sınıfdan kadılıkları istihdamları caiz olur. Onsekizinci madde: Medresetu’l kudattan aliyu’l âla derecede mezuniyet rüusi istihsal edenler kaza birinci sınıf kadılığına ve âla derecede rüus olanlar ikinci sınıf kadılığına ve karib-i âla derecede kalanlar üçüncü sınıf kadılığına ve merakiz-i vilayat ve elviye mehâkimi baş kitabetlerine mustahik olurlar. Ondokuzuncu madde: Silsile-i hükkâmın derecatında müstehak olduğu sınıfın madununda bir kadılığa veya aher bir memuriyete talib olanların istihkaklarına halel gelmemek üzere maduni sınıfında ve memuriyette istihdamları caiz olur. Yirminci madde: Fetevahane-i âlî ve meclis-i tedkikat-i şer’iye ile merkez saltanat-ı mehâkim-i şer’iyesi eklamına haricten kâtib alınmak lazım geldiği takdirde medresetu’l kudat mezunları sair taliblere tercih olunur ve bunlar arasında onsekizinci maddedeki hakk-ı rüchan nazar-ı itibara alınır medrese-i mezkûre mezunlarından muteaddid talib mevcud ve şahadetnamelerinin derecesi de müsavi ise mektebde kazandıkları numarayla tarih-i mezuniyet bais-i tercih olur ve medrese-i mezkûre mezunlarından talib zuhur etmez ve haricdan talib olanlar taaddüd ederse müsabaka imtihanı icrâ olunur. Yirmibirinci madde: Silsile-i hükkâmın birinci ve ikinci derecesinde bulunanlar ba arz-ı meşihatpenahi ferman-i âlî ile ve üçüncü ve dördüncü ve beşinci derecedeki kadılar bi’l umum müşavirler ancak intihabın intihab ve makam-ı meşihatın bi’t tensib arzı üzerine irade-i senniye ile tayin olunur şu kadar ki harameyn-i muhteremeyn kadıları içun usul-i kadimesi vecihle ferman-i âlî i’tâ olunur. Yirmikinci madde: Merkez-i saltanat-ı seniyyede bulunan memurin-i ilmiye ve şer’iyeden rüusan ve müdiran ve makam-ı meşihatce intihab ve ba irade-i seniyye tayin olunub mecalis-i aza-i encümen intihabın intihab ve makam-ı meşihatin bi’t tensib arzı üzerine bi’l irade-i senniye ve diğerleri ba işarat-i aliyye tayin olunurlar. Yirmiüçüncü madde: Kadılar la yuteazzel olub vazife-i şer’iyelerince su-i idare ve muameleleri ve vazife-i adliye ve mülkiyelerince de mucib-i mesuliyet bir halleri tebeyyün etmedikçe azl ve diğer memuriyete tahvil edemezler şu kadar ki istifaları kabul olunur ve muvafakat-i tarafeynle aynı sınıfda olan kadıların becayişleri dahi caiz olur. Yirmidördüncü madde: Harameyn-i muhteremeyn kadıları ve müşavirleri usul-i kadimesi vecihle müddet-i muvakkıta içun nasb olunur. Fıkra-i muvakkıta: Usul-i sabıka vecihle müddet-i örfiye ile tayin olunub müddetlerinin hitamı takrib ettiği halde yerlerine diğerleri tayin olunmayan mahaller nüvvabı işbu kanun hükmünce kadı ünvanına haiz ve yirmiüçüncü madde ahkamına tabi olacaklardır. Yirmibeşinci madde: Bilad-ı hareye tayin edilub üç sene vazife-i memuriyetini hüsn-i îfâ eden kadılar talebleri vukuunda sınıfları dâhilinde münhal olan mahallere tercihen tayin olunurlar. Yirmialtıncı madde: Munsabb kaza münhal oldukda kıdem ve liyakat ve hıdemat-ı sabıka itibarıyla evvelen ma’zulin hükkâmdan saniyen tarih-i mezuniyetleri ve mezuniyetlerinin derecesi itibarıyla medresetu’l kudat mezunlarından münasibi intihab olunur. Yirmiyedinci madde: Sınıfı dâhilinde olarak teklif edilmiş olan kadılığı kabulden istinkaf edenler hakkında ma’zuliyet kanunu ahkamı tatbik olunur. Yirmisekizinci madde: Bir mahalin kadılığı münhal olduk da yerine usulen aheri tayin edilinceye kadar umur-i kaza muattal kalmamak üzere müfti-i belde veya aher-i münasib ile ifa-i vazife-i şer’iye içun makam-ı meşihatdan mezuniyet verilebilir bu halde mezun olan zatın mahalli meclis idaresinden musaddak tatbik mührünü makam-ı meşihata irsal etmesi lazımdır göndermeyenler vekâlet maaşına mustahik olamazlar. Faslu-ı Rabi Usul-u terfi ve terakki Yirmidokuzuncu madde: Medresetu’l kudattan mezun olan kadılar bulundukları sınıflarda vazife-i memuriyetlerini hüsn-i îfâ eyledikleri takdirde üç senede bir kere terfi-i sınıfa ve bulunduğu sınıfın müntehasında bulunanlar terfi-i dereceye mustehik olurlar fakat herhalde terfi ve terakki ma fevki sınıf ve dereceden münhal vukuuna(?) muallak olub hal-i vukuunda dahi müstehak terfi olanlar bulundukları sınıfdaki kıdemlerine göre sırasıyla terfi olurlar. Madde-i muvakkıta: Medresetu’l kudat mezunlarından el-yevm derecat ve sunuf-i kazada bulunanların derece ve sınıflarına mebde-i kayd ve kabulleri esası ittihaz edilir medresetu’l kudattan mezun olmayan kadıların bundan sonra terfi edildiği(?) herhalde medrese-i mezkûrede okunan derslerin kâffesinden imtihana girerek isbat-ı ehliyet almasına mütevakkıfdır. Fasl-ı Hamis Usul-i mücazat Otuzuncu madde: Kadılar hakkında vazife-i şer’iyelerinden dolayı icrası lazım gelen tahkikat-ı makam-ı meşihatce icrâ edilir ve bir kadıya aid olan evrak-ı tahkika encümen-i intihabca tedkik ve lede’l-iktiza meclis-i tedkikat-ı şer’iyeden dahi mütalaası istifsar edilerek taht-ı muhakemeye alınmasına luzum görülür ise keyfiyet ba mazbata makamı-ı müşar-ı ileyhe arz olunur ba irade-i seniyye muhakemesine mezuniyet verilir. Otuzbirinci madde: Taht-ı mukakemeye alınması irade-i seniyye iktiran eden kadı memuriyetinden azl ve yerine başkası tayin olunur ve kadı-i mazul bi’l muhâkeme berat ettiği takdirde derece ve sınıfına muadil başka memuriyete tayin olunur. Otuzikinci madde: Kadıların ceraim-i şahsiyye veya vazife-i adliyelerinden dolayı muhakemeleri mehâkim-i ibtidaiye ve istinafiye ruesası haklarında mevzu olan kaide mucebince ma fevki mahkeme-i nizamiyesinde ru’yet olunur fakat vazife-i adliyesinden dolayı nezaretce taht-ı muhakemeye alınmasına mezuniyet verilen kadıların ne sebebe mebni taht-ı muhakemeye alındıkları nezaret-i müşar-ı ileyhadan makamı-ı meşihata işar olunacağı gibi muhakemeleri neticesi dahi ayrıca teblîğ edilir ve cihet-i adliyece taht-ı muhakemeye alınan kadılar makam-ı meşihatce dahi işden el çektirilir. Otuzüçüncü madde: Kadıların şer’an muhafazasına mecbur oldukları sıfat-i mahkeme-i hâkimiyete münafi-i hal ve hareketleri esbab-ı subuteye veya imarat-ı kaviyye ile tahakkuk eylediği takdirde ercanibe göre tenbih veya tevbih veya hakk-ı terfiden muvakkaten veya muebbeden ıskat veyahud azliyle beraber iki seneyi tecavüz etmemek üzere vazife-i kazadan men ki mücazat-i intibahiye-i encümen-i intihab kararıyla tayin ve ba işarat-ı aleyh icrâ olunur mesanih(?) ibadi bila sebeb-i şer’i tehir veya te’vik eylediği tebeyyün edenler dahi balada muharrer ? ale’d derecat duçar olurlar. Otuzdördüncü madde: Madde-i anifede muharrer mücazat-ı intibahiyenin cümlesine ale’d derecat maruz olduklarından sonra yine mütenebbih olmayan kadının kaydı encümen kararıyla ba irade-i seniyye terkin olunub bir daha kadılıkda istihdam olunmaz. Otuzbeşinci madde: Bir kadının bir sene zarfında vermiş olduğu i’lâm veya hüccetlerden fetevahane-i âlî veya meclis-i tedkikat-ı şer’iyece ondaikisi nakz edilir ise bir sene ve ondadördünde iki sene ve ondabeşinde üç sene muma ileyh hakk-ı terfiden mahrum olur ve ondaaltısında memuriyetten azl edilerek iki sene memuriyete ? edilmez ondanaltısından ziyadesinde mülk-i kazadan kaydı ba irade-i seniyye terkin edilir. Otuzaltıncı madde: Mevad-ı anifede muharrer mücazatın icrasına esas olmak üzere her mahkemede ve mart-ı ibtidalarında sene-i sabıka muamelatına aid bir cedvel tanzîm ve ister cedvelde o sene zarfında vuku bulan deâvî ve mesalih ile hükme iktiran edenlerin müfredatı irae ve makam-ı meşihata takdîm olunur fetevahane-i âlî ve meclis-i tedkikat-ı şer’iyece dahi her sene tasdik veya nakz edilen ilamatın tarih ve mahal hududlarını ve hükmü i’tâ eden hükkamın esamisini mübayin birer kıta cudul tanzîm ve encümen-i intihaba tevri’ edilir. Fasl-ı Sadis Müftüler ile müsevvidleri ve taşra mehâkim-i şer’isi ketebe ve hademesi ve nevâhî-i nüvvabı Otuzyedinci madde: Müftüler mecalis-i idare-i aza-i tabiiyesinden olub gerek canib kadıdan havale olunan mesail-i şer’iyeye ve gerek ahali tarafından vuku bulacak istiftalara icab eden ecvibe ve feteva-i şerifeyi i’tâ ve mahalli ulemasına riyaset mevcud medarisin nizamname-i mahsusi mucebince muhafaza-i memuriyetine ve tedrisatın müderrisin tarafından hüsn-i ifasına nezaret eyler. Otuzsekizinci madde: Bir beldede müftülük münhal olduğu takdirde o beldenin bi’l fiil tedris ile meşgul uleması ve cevami-i kebire eimme ve hutebası ve meclis-i idare ve belediye meclis-i aza-i meşıhıyye-i müslimesi meclis-i idareye celb olunarak halkın vusuk ve itimadına şayan vuku bulacak istiftalara cevab-ı sevab itasına kadir üç zati müftü intihab eylemeleri luzumu kendilerine tefhim ve teblîğ olunduktan sonra mahtumen verecekleri evrak-ı intihabiye tasnif olunarak neticesi canib-i vilayetten ilave-i mutalaayla makam-ı meşihata bi mazbata işar ve evrak-ı intihabiye ile müftülüğe müntehab olanların teracim-i ahval evrakı dahi mazbataya leffen tisyar olunur bunlardan biri makam-ı meşihatce müftülüğe tayin olunur. Otuzdokuzuncu madde: Madde-i anifede vurud edecek evrak bi’l havale encümen-i intihabca tedkik olunarak intihab edilenlerden hangisinin müftülüğe tayini iktiza edeceği esbab-ı mucibesiyle makam-ı meşihata arz ve bunlardan biri makam-ı müşar-ı ileyhden müftülüğe ba tayin müftülük menşuri tastir ve şayed evrak-ı intihabiyede noksan görülür veya intihab edilen kimselerin müftülüğe adem-i ehliyetine kanaat hasıl olur ise yeniden intihab icrası luzumu mahalline işar olunur. Kırkıncı madde: Mahallince müftülüğe ehl ve münasib kimse bulunmadığı halde ders vekâletince keyfiyet gazetelerle ilan ve zuhur edecek talibler beyninde musabaka imtihanı icrâ olunduktan sonra en münasibi encümen-i intihab kararıyla ba menşur şeyhu’l esami müftülüğe tayin ve izam olunur. Kırkbirinci madde: Ba menşur-i Şeyhu’l İslâm müftülüğe tayin edilen zevatın vazife-i iftaya adem-i ehliyetleri veya vazife-i mülkiyelerince idaresizlikleri ve sıfat-ı memuriyetlerine münafi halleri tebeyyün etmedikçe veya mahkumiyet-i cezaiyeye uğramadıkça müftülükten azilleri caiz olmaz. Kırkikinci madde: Müftü müsevvidleri müsteftiler tarafından takrir ve ifade olunan esilenin kütüb-i fetevada mestur meselesini bulub lisan-i şer’i ile tasvir ve müsveddesini tahrir ederek müftülüğe i’tâ eyler. Kırküçüncü madde: Müftü müsevvidleri ve taşra mehâkim-i şer’iyesi ketebesi idare-i vilayet kanunu ahkamına tevfiken mensub oldukları kadı ve müftü-i belde tarafından fıkıh ve feraiz ve sakk-ı şer’i ve kitabet ve hüsn-i hattan bi’l imtihan-i ehliyet ve liyakatları tahakkuk ettiği takdirde münhal olan müsevvidliğe ve kitabete intihab edilirler ve memuriyetleri makam-ı vilayetce icrâ olunur. Kırkdördüncü madde: Muhzır ve hademe intihab ve tayini munhasıran kadılara aittir. Kırkbeşinci madde: Nevâhî-i nüvvabı mensub oldukları vilayet veya liva veya kaza kadısının vekîli mesabesinde olub suret-i intihab ve imtihanları ve vazife ve salahiyet-i şer’ileri talimat-ı mahsusa ile tayin olunur. Lâhika Encümen-i intihab Kırkaltıncı madde: Encümen-i intihab müsteşar-ı meşihatın taht-ı riyasetinde münakid ve ilamat-ı şer’iye ve medresetu’l kudat ve tahrirat ve memurin ve sicil müdürleri ile makam-ı meşihatce intihab buyrulacak ruusadan mürekkebdir ve kararları istişaridir. Kırkyedinci madde: Encümen-i intihab luzumu göründükçe ictima ile bab-ı feteva ruusen ve erkanından maada bi’l umum memurin-i ilmiye ve şer’iyenin intihab ve tayin ve terfi ve becayişleriyle azillerine ve lede’l-iktiza taht-ı muhakemeye alınmalarına ve haklarında mücazat-i intibahiye icrasına mutalık hususatı ve memurin sicil ahvalına tezyil-i icab eden vukuatı bi’t tedkik mukteziyatını mazbata veya müzekkire ile makam-ı meşihata arz eyler. Kırksekizinci madde: İşbu kanun tarih-i neşrinden itibaren mer’i icradır. Kırkdokuzuncu madde: İşbu kanunun icra-i ahkamına Şeyhu’l İslâm memurdur. İşbu layıha-i kanuniyenin meclis-i umuminin küşadında kanuniyeti teklif olunmak üzere muvakkaten mevki-i icrâya vaz’i ve kavanin-i devlete ilavesini irade ederim. 19 Cumade’l Ûla 1331, 13 Nisan 1329. Mehmed Reşad Şeyhu’l İslâm Esad. Sadrazam Mahmud Şevket Mukabele olmuştur. Baş kâtib, kadı. Aded 177: Gürgen Lazistan Sancağı’nın merkezi olan Rize kazası kurâsından Gürgen karyesi ahalisinden iken bundan akdem vefat eden Arnabudoğlu Hüseyin bin Abdullah’ın ber vechi ati bi tariki’l-münasaha varisi olduğunu iddia eden ve zatları hıyn-i tevkilde muarrefe olan Fatıma ve Ayşe bintan-i Cevahir’in Zikr-i âtî verâset iddiasıyla ahz u kabza vekîl-i müseccel-i şer’ileri Vasil Efendi ibn Yani meclis-i şer’i münîrde müteveffa-yi mezbûrun medyuni Setoz karyesinden Ferhadoğlu Mustafa Usta ibn Abdulkerim mahzarında üzerine dava ve takrir-i kelâm idub müteveffa-yi mezbûrun verâseti sulbî kebir oğlu Mehmed ile sulbîye-i kebire kızı Ayşe’ye munhasıra ve badehu bintu’l-mezbûre Ayşe vefat idub verâseti sadriye-i kebire oğlu Yusuf ile sadriye-i kebire kızları müvekkilelerim Fatıma ve Ayşe bintan-i Cevahir’e munhasıra ve badehu ibnu’l-mezbûr Mehmed vefat idub verâseti zevce-i menkuhe-i metrukesi Fatıma bint Ahmed ile sulbî kebir oğulları Yakub ve Hüseyin ve Eyüb ve sulbîye-i sağire kızları Havva ve Fatıma ve Keziban’a munhasıra ve tashih-i mesele-i mirasları bi’l-münasahati’ş-şer’iye yüzseksen sehmden olub siham-ı mezkûrdan on sekiz sehmi ibnu’l-mezbûr Yusuf’a ve dokuzar sehmden ceman onsekiz sehmi müvekkilelerim mezbûretan Fatıma ve Ayşe’ye ve dokuz sehmi zevce-i mezbûre Fatıma’ya ve ondörder sehmden ceman kırkiki sehmi benun-i mezbûrun Yakub ve Eyüb ve Hüseyin’e ve yedişer sehmden ceman yirmibir sehmi benat-i mezbûrât Havva ve Fatıma ve Keziban’a isabet idub başka varisleri ve terekelerine mustahık-i ahar kimesneleri olmamağla müteveffa-yi mezbûrun hayatında mezbûr Mustafa zimmetinde cihet-i karzdan alacak hakkı olan ellidört kuruş kable’l-ahz ve’l-istifa vefat etmekle meblağ-ı mezkûrdan müvekkilelerimin hisse-i irsîyelerini müvekkilelerime izafetle bana eda ve teslime mezbûr Mustafa’ya tenbih olunmak hasbe’l-vekâle matlubumdur deyu dava ve lede’s-sual ol dahi cevabında cihet-i merkûmeden fi’l-hakika mütevaffay-i mezbûr Hüseyin’e ol mikdar kuruş zimmetinde borcu olduğunu taven ikrar ve ancak müddeî vekîli mezbûrun müddeâsı malûmum değildir deyu bade’l-inkar vekîl-i mezbûr ber vech-i muharrer verâset müddeâsını evvelen ba veraka-i mesture mensub oldukları Gürgen karyesi muhtar-ı evveli Yakub ve azadan Sefer ve Bilal ve Setoz karyesi muhtar-ı evveli Mehmed Ali ve azasından Molla Mehmedoğlu Ömer ve Ali Efendioğlu Ali’den sirren ve badehu müterâfian hazır oldukları halde Aşıkoğlu Ahmed bin Süleyman ve Yahyaoğlu Sabit bin Şaban’dan bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idukleri işar ve ihbar olunan verese-i mezbûrun ile müteveffa-yi mezbûr-i arifan olan mezkûr Gürgen karyesinden Yahyaoğlu Mehmed bin Receb ile mezkûr Setoz karyesinden Ferhadoğlu Mecid bin Ahmed nâm kimesnelerin kezalik bi’l-muvacehe tafsil-i mezkûr üzere ber nehc-i şer’i şahadetleriyle isbat itmegin mucebince verâsetlerine yine bade’l-hükm ve’t-tenbih müddeâ bih meblağdan müvekkile-i mezbûre Fatıma ve Ayşe’nin ber muceb-i mesele-i miras hisse-i irsîyeleri olan dörtbuçuk kuruş müvekkiletan-i mezbûr etana izafetle vekîl-i mezbûr Vasil Efendi’ye teslime mezbûr Mustafa’ya tenbih olunduğu tescîl ve i’lâm olundu. Fi’l-yevmi’l-hamis min şehr-i Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, kadı. Aded 178: Çoncik Lazistan Sancağı’nın merkezi olan Rize kazası kurâsından Çoncik karyesi ahalisinden Molla Ahmedoğlu Hacı Mehmed Efendi ibn Reşid Efendi meclis-i şer’-i şerif-i enverde takrir-i kelâm ve tabir-i ani’l-merâm idub aleyhimde ikame olunan her nevi deâvîden dolayı icab edenlerle aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis ve itiraz’ul ğayr-i tarik ve sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâ ve hacz vaz’ u fekkine ve tefrik u taksime ve lede’l-hâce isbat-ı verâset iddiasına ve benim her hakkımı ashabından taleb ve dava ve ahz u kabz ile makbuzatını bana i’tâ ve teslime ve’l-hâsıl leh ve aleyhimde tahaddüs eden ve idecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımdan vekâlet-i amme-i mutlaka-i sahiha-i şer’iye ile dava vekîllerinden Abdulhamid Efendi ibn Abdulkerim’i kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’t-tasi min şehr-i Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, kadı. Muhzır Sadık Efendi, Hacı Alioğlu Memiş Efendi. Aded 179: Trabzon’un Şana Trabzon vilayeti dâhilinde Yomra nahiyesinin Şana karyesinden Şatırzâde Tevfik Bey ibn Osman Bey bidayet mahkemesinde makud meclis-i şer’i münîrde takrir-i kelâm ve tabiri ani’l-merâm idub nahiye-i mezkûrenin Korki nâm-ı diğeri Falkoz karyesinde vâki mahallinde beyne’l-ahâlî ve’l-cîrân malûm ve müteârefu’l-hudud bi’l-cümle emlak ve arazideki hisse-i şayiamı vilayet-i mezkûrenin Kasımağa mahallesinde Şatırzâde Suphi Bey Efendi’ye semen ve bedel-i misilleriyle bey’ u ferağ ve temlik u teslime ve muma ileyh Suphi Bey talib olmadığı suretde taleb-i ahara kezalik semen ve bedel-i misilleriyle memuri huzurunda katiyen bey’ u ferağ ve temlik u teslime ve semen ve bedel-i misillerini ahz u kabz ile makbuzatını bana irsal ve isal teslime ve takririni i’tâya ve muamele-i saire-i lazımesini icrâ ve îfâya ve mucib-i muhâkeme bir hal vukuunda icab edenlerle aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucabeveye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâya ve tefrik u taksime ve isbat-ı verâset iddiasına ve ber vech-i muharrer aheri tevkil ve azle ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile Trabzon’un Kasımağa mahallesinden İlyaszâde Mehmed Temel Efendi ibn Temel Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’taleb ketb olundu. Fi’l-yevmi’l-hadi ve’l-ışrin min şehr-i Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, kadı. Muhzır Sadık Efendi, Şamlizâde Memiş Efendi. Aded 180: Kament mahallesi Lazistan Sancağı’nın merkezi olan Rize kasabası mahallâtından Kament mahallesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan İslâmoğlu kerimesi Hamdiye bint Süleyman meclis-i şer’-i şerif-i enverde takrir-i kelâm ve tabir-i ani’l-merâm idub zevcim mahalle-i merkûmeden İnce Mehmedoğlu Ahmed bin Ali Efendi’nin firaşından hasıla ve benden mütevellide ve halen bi hakki’l-hidâne hacr ve terbiyemde olan sulbî sağir oğlu dört yaşında Ali ile sulbîye-i sağire kızları beş ve iki yaşlarında Fatıma ve Ayşe’yi bundan akdem babaları mezbûr Ahmed bila nafaka vela munfek-i şer’i terk idub müddet-i sefer-i baid olan Rusya memalikine gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden babaları gaib-i mezbûr üzerine kadr-i marûf meblağ farz u takdir olunmak bi’l hidâne matlubumdur dedikte hakikat-i hal mezbûrenin takrir-i meşruhi üzere olduğu karye-i merkume ve muhtar ve heyet-i ihtiyariyesinden mevrud ilmuhaberden müstebân ve Zikr-i âtî meblağ dahi kadr-i marûf idugi müslimin-i mezbûrun ihbarlarıyla lede’ş-şer’il enver zâhir ve nümâyân olmağın mucebince siğar-i mezbûrunun nafaka ve kisve baha vesair levazım-ı zaruriyeleri içun babaları gaib-i mezbûr Ahmed üzerine işbu tarihten itibaren beherine şehrî otuz kuruşdan şehrî üçüne ceman doksan kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyelerine harc u sarfa ve lede’l-hâce istidaneye ve inde’z-zafer babaları gaib-i mezbûr Ahmed üzerine rucua mezbûre Hamdiye’ye kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’s-samin ve’l-ışrin min şehr-i Rebii’l-ahir li sene ihdâ selâsîne ve selâsemie ve elf. Mukabele olmuştur. Baş kâtib, kadı. Çolakoğlu Memiş bin Mustafa, Satıroğlu Mehmed Efendi. Aded 181: Mirac İlâmı Serveri-i enbiya muharrem-i kurb-i hüda aleyhi ekmeli’t tehaya efendimiz hazretlerinin semt-i alem melekute bi’s suud dahil haramgah-i kudsiyetpenah olarak müşahede-i ba kemal-i hazret zül celala mazhariyetten sonra rahmet-i kibriya müjdesiyle hubut buyurdukları leyle-i mebruke ve mualla yazılı çarşamba gecesi yani önümüzdeki bu geceye şeref müsadif olub işbu din-i mubin hidayet karyenin en büyük ve en mukaddes leyali-i mübarekesinden olmağla bu şebb-i mukaddes ve mubarekin ruhaniyet-i uluhiyyesine hürmete şiar-ı celile-i islamiyeden olduğu üzere bi’l umuma cevami’ ve mesacid ve minarat-ı şerifenin ikad-ı kanadil ile tenvir ve tezyin olunması zımnında belediyeye bera-i havale müzekkire takdîm kılındı. Fi 26 Receb 1331 ve 18 Haziran 1329. Mukabele olmuştur. Baş kâtib, kadı. Aded 182: Kura-i Seba’nın Cimil Ortaköy Lazistan Sancağı’nın merkezi olan Rize kazası nevâhîsinden Kura-i Seba nahiyesinin Cimil Ortaköy karyesinden olub Yeniköy mahallesinde sakin Kumbasaroğlu Şükrü bin Hacı Hüseyin meclis-i şer’-i şerif-i enverde takrir-i kelâm ve tabir-i ani’l-merâm idub Cimil Ortaköy karyesinden Kumbasaroğlu Hacı Mustafa bin İsmail ile beynimizde mütehaddis arazi ve emlak ve alacak ve icar davalarından dolayı mezbûr ile aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve fekkine ve taleb-i keşf ve mümeyyiz ve hâkim ve ehl-i vukuf tayin ve azline ve ru’yet-i muhasebeye ve tefrik u taksime ve lede’l-hâce sulh ve ibraya ve tedkik ve hat ve hatim ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile dava vekîllerinden Hafız Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’l-hadi ve’l-ışrin min şehr-i Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, kadı. Muhzır İbrahim Efendi, İsmailoğlu Tevfik Efendi. Aded 183: Vonit-i Rum mahallesi Lazistan Sancağı’nın merkezi olan Rize kasabası mahallâtından Vonit-i Rum mahallesinden ve teba-i devlet-i aliyyenin rum milletinden Teloğlu Yanku bin Yorika meclis-i şer’-i şerif-i enverde takrir-i kelâm ve tabir-i ani’l-merâm idub mahalleden rum milletinden Kukuloğlu Dimitri’nin zevcesi Sukife bint Hacı Karakaş ile beynimizde mütehaddis halît ve şerik ve arazi davalarından dolayı merkume ile vesairleri tarafından aleyhime ikame edilecek her nevi deâvîden dolayı icab edenlerle aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis ve itirazu’l-ğayr-ı tarik sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve taleb-i keşf ve mümeyyiz ve hâkim ve ehl-i vukuf tayin ve azline ve tefrik u taksime ve isbat-ı verâset iddiasına ve lede’l-hâce sulh ve ibraya ve benim her hakkımı ashabından taleb ve dava ve ahz u kabz ile bi’l-cümle makbuzatını bana i’tâ ve teslime ve’l-hâsıl leh ve aleyhimde tahaddüs eden ve edecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımdan vekâlet-i âmme-i mutlaka-i sahiha-i şer’iye ile dava vekîllerinden Vasil Efendi ibn Yani Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’t-tasi min şehr-i Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, kadı. Muhzır İbrahim Efendi, Dervişzâde Hacı Ali Efendi. Aded 184: Paşyan mahallesi Zikr-i âtî hususun mahallinde ketb u tahrir içun canib-i şeriat-i ğarradan mezunen bil hükm irsal olunan umenadan mahkeme-i şer’iye baş kâtibi Osman Zeki Efendi ibn Salih Efendi Lazistan Sancağı’nın merkezi olan Rize kasabası mahallâtından Paşyan mahallesinde vâki Sokyaszâde(?) Hasan Efendi ibn İzzet Efendi’nin hanesine varılıb zeyl-i vesikada muharrer’ul esami müslimin huzurlarında akd-i meclis-i şer’i âli ettikte menzil-i mezkûrde sakine kezalik zatı müslimin-i mezbûrun tarifleriyle muarrefe olan Şehnaz Hanım bint Hacı Ali Efendi meclis-i makud-i mezkûrde ikrar-ı tam ve takrir-i kelâm idub Emineddin mahallesinde vâki intikalen şureka-i malûme ile basened-i hakani malike ve mutasarrıfa olduğum malûm ve müteârefu’l-hudud mea bahçe bir bab mülk-i menzildeki hisse-i şayıa-i malûmemi yüzeli kuruş semen-i makbuzum mukabelesinde kız karındaşım Gül Cemal Hanım ile mezbûrenin oğulları Kazım ve Rıza Efendilerle yine mahalle-i merkumede vâki kezalik malûm ve müteârefu’l-hudud bir kıta tarladaki hisse-i şayiamı muma ileyh Kazım ve Rıza Efendilere bila bedel ve ale’s seviyye memuru huzurunda bey’ u ferağ ve temlik u teslime ve muamele-i saire-i lazımesini icrâ ve îfâya ve takririni i’tâya ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile Tüfenkçizâde Mehmed Şevket Efendi ibn Mehmed Efendi’yi kabulune vekîl ve naib-i menab nasb u tayin eyledim dediğini kâtib-i muma ileyh mahallinde ketb u tahrir ve mea mürsel umena-i şeri’le meclis-i şer’e gelib ala vukuihi inha ve takrir itmegin ma vekaa bi’t-taleb ketb olundu. Fi ğurre-i Şabani’l-muazzam li sene ihdâ selâsîne ve selâsemie ve elf. Mukabele olmuştur. Baş kâtib, kadı. Şevki Efendi ibn müteveffa Tüfenkçizâde Osman Efendi, Pasaport memuru Mustafa Efendi ibn Ahmed Efendi. Aded 185: Umma Tuğlu Lazistan Sancağı’nın merkezi olan Rize kazası kurâsından Umma Tuğlu karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Bıçakçıoğlu kerimesi ve Tavukçuoğlu müteveffa İbrahim’in zevcesi Fatıma bint Yunus ile mezbûre Fatıma’nın sadriye-i kebire kızı kezalik zatı muarrefe Zahide bint müteveffa-yi mezbûr İbrahim ve sadriye-i kebir oğulları Yehuza ve Arif benan-i mezbûr İbrahim meclis-i şer’-i şerif-i enverde her biri takrir-i kelâm ve tabir-i ani’l-merâm idub Umma Tarikler karyesinden Tavukçuoğlu Ömer bin İsmail ve Tavukçuoğlu müteveffa Hüseyin’in vereseleri İsmail ve Refika ve rufeka-i saireleri ile beynimizde mütehaddis arazi ve emlak ve tecavüz-i hudud ve zarar ve ziyan davalarından dolayı mezbûrun ile aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şudud ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve hacz vaz’ u fekkine ve tefrik u taksime ve taleb-i keşf ve mümeyyiz ve hâkim ve ehl-i vukuf tayin ve azline ve lede’l-hâce isbat-ı verâset iddiasına ve’l-hâsıl mütevakkıf olduğu umûrun küllîsine tarafımızdan vekâlet-i mutlaka-i sahiha-i şer’iye ile dava vekîllerinden Abdulhamid Efendi ibn Abdulkerim’i kabulune mevkûfe vekîl ve naib-i menab nasb u tayin eyledik dediklerinde ma vekaa bi’t-taleb ketb olundu. Fi’l-yevmi’l-hadi ve’l-ışrin min şehr-i Recebi’l-ferd li sene ihdâ selâsîne ve selâsemie ve elf. Mukabele olmuştur. Baş kâtib, kadı. Pehlivanoğlu Hızır bin Mikdad, Sarı Mahmudoğlu Şaban bin Mahmud. Aded 186: Mapavri’nin Kavalyoz mea Ğalata Lazistan Sancağı’nın merkezi olan Rize kazası nevâhîsinden Mapavri nahiyesinin Kavalyoz mea Ğalata karyesinden iken bundan otuzbeş sene akdem vefat eden Bakıroğlu İsmail bin Abdullah’ın ber vechi ati varisi olduğunu iddia eden sulbîye-i kebire kızları zatları hıyn-i tevkilde muarrefe olan Hatice ve Fatıma’nın Zikr-i âtî verâset iddiasıyla ahz u kabza vekîl-i müseccel-i şer’isi dava vekîllerinden Mustafa Efendi ibn İzzet Efendi meclis-i şer’i münîrde Peşeyan mahallesinden Hacı Genç Ağazâde Rüşdi Efendi ibn Hacı Mehmed Efendi muvacehesinde bi’l-vekâle üzerine dava ve takrir-i kelâm idub müteveffa-yi mezbûrun verâseti zevce-i menkuhe-i metrukesi Razıye bint Yusuf ile sulbî kebir oğlu Mehmed ve sulbîye-i kebire kızları müvekkilelerim Hatice ve Fatıma’ya munhasıra ve badehu zevce-i mezbûre Razıye dahi vefat idub verâseti sadri kebi oğlu mezbûr Mehmed ile sadriye-i kebire kızları müvekkilelerim mezbûretan Fatıma ve Hatice’ye munhasıra ve tashih-i mesele-i mirasları dört sehmden olub siham-ı mezkûrdan iki sehmi mezbûr Mehmed’e ve birer sehmden iki sehmi dahi müvekkilelerim mezbûr etana isabet idub başka varisi ve terekelerine mustahık-i ahari olmamağla müteveffa-yi mezbûrun hayatında mezbûr Rüşdi Efendi zimmetinde cihet-i karzdan alacak hakkı olan otuz kuruş kable’l-ahz ve’l-istifa vefat etmekle meblağ-ı mezkûrdan ber muceb-i mesele-i miras müvekkilelerim hisse-i irsîyeleri olan yedişer buçuk kuruştan onbeş kuruş bana eda ve teslime mezbûr Rüşdi Efendi’ye tenbih olunmak hasbe’l-vekâle matlubumdur deyu dava ve lede’s-sual ol dahi cevabında fi’l-hakika müteveffa-yi mezbûre ol mikdar kuruş zimmetinde halen deyni olduğunu taven ikrar ve itiraf idub ancak müddeî vekîli mezbûrun ber vech-i muharrer müddeâsı malûmum değildir deyu inkar etmekle müddeî vekîli mezbûr ber vech-i muharrer verâset müddeâsını evvelen ba veraka-i mesture mensub oldukları mezkûr Zancel karyesi imamı Hacı Mehmed ile muhtar-ı evveli Ömer’den sirren ve badehu müterâfian hazır oldukları halde Sarıoğlu Hasan bin Hurşid ve Uluvveoğlu İlyas bin Yahya’dan bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idukleri işar ve ihbar olunan ve müteveffa-yi mezbûr ile verese-i mezbûr uni arifan olan mezbûr Zancel karyesinden Şerifoğlu Mustafa Asım Efendi ibn İlyas ile yine karyeden Kamiloğlu Hacı İlyas Efendi ibn Ahmed nâm kimesnelerin kezalik bi’l-muvacehe ber nehc-i şer’i tafsil-i mezkûr üzere şahadetleriyle isbat itmegin mucebince verâsetlerine bade’l-hükm ve’t-tenbih meblağ-ı müddeâ bih’den hisse-i irsîyelerine isabet eden ceman onbeş kuruş müvekkiletan-i mezbûr etana izafetle vekîlleri mezbûr Mustafa Efendi’ye eda ve teslime müddeâ aleyh mezbûr Rüşdi Efendi’ye tenbih olunduğu tescîl ve i’lâm olundu. Fi’l-yevmi’r-râbi aşer min Cemaziye’l evvel li sene ihdâ selâsîne ve selâsemie ve elf. Mukabele olmuştur. Baş kâtib, kadı. Aded 187: Salarha Likoz Lazistan Sancağı’nın merkezi olan Rize kazası kurâsından Salarha Likoz karyesinde vâki cami-i şerif’in ba hüccet-i şer’iye mütevellisi Maraşoğlu İsmail bin Hacı Receb meclis-i şer’i münîrde Hacinoz mahallesinden Şabanoğlu Emin Efendi ibn Hacı İdris Efendi aleyhine ikame eylediği alacak davasından dolayı mezbûr Emin Efendi’ye ayrı ayrı günlerde gönderilib teblîğ ettirilen üç defa davetiye verakası üzerine mezbûr Emin Efendi mahkemeye gelmekten ve tarafından vekîl göndermekten imtina eylediğine binaen talebiyle vekîl-i musahhar tayin olunan Hafız Hulusi Efendi ibn Salih Efendi muvacehesinde mütevellisi olduğum cami-i şerif-i mezkûrun nukûd-i mevkûfesinden onbir buçuk aded Osmanlı lirası mütevelli-i sabık Civelekoğlu Hacı Hurşid üçyüzondört senesinde mezbûr Emin Efendi’nin babası Hacı İdris’e i’tâ ve ikraz ve teslim ol dahi ahz u istikraz ve umuruna istihlâk ederek meblağ-ı mezkûri kable’l-ahz ve’l-istifa mezbûr Hacı İdris Efendi vefat etmekle verâseti zevce-i menkuhe-i metrukesi Ümmü Gülsüm bint Abdullah ve sulbî kebir oğulları Emin ve Hasan ve Ali ve Rıza ve Hamza Efendilerle sulbîye-i kebire kızı Mahfuze’ye munhasıra olub tereke-i vafiyesine müvekkil-i mezbûr Emin Efendi bi’l-verâse vazıu’l-yed olduğundan meblağ-ı mezkûr onbir buçuk aded Osmanlı lirasını vazıu’l-yed olduğunu babası müteveffa-yi mezbûrun tereke-i vafiyesinden vakf içun bana eda ve îfâya müvekkil-i mezbûr Emin Efendi’ye izafetle vekîl-i musahhar muma ileyh Hafız Hulusi Efendi’ye tenbih olunmak bi’t tevliye matlubumdur deyu dava ve lede’s-sual ol dahi cevabında müddeî mütevelli-i mezbûrun ber vech-i muharrer müddeâsını tamamen bade’l-inkar müddeî mütevelli-i mezbûr İsmail ber vech-i muharrer tamamiha müddeâsını evvelen ba veraka-i mesture mensub oldukları Likoz karyesi imamı Civelekoğlu Mustafa Efendi ibn Hurşid ile muhtar-ı evveli Civelekoğlu Rıdvan bin Arif’den sirren ve badehu tayin olunan günde vekîl-i musahhar muma ileyh Hafız Hulusi Efendi’nin gelmemesine mebni diğer vekîl-i musahhar tayin olunan Abdulhamid Efendi ibn Abdulkerim muvacehesinde zabt-ı sabıkın kıraatından sonra müterâfian hazır oldukları halde Likoz karyesinden Civelekoğlu Sadık bin Hurşid ile Kulaksızoğlu Hacı Yusuf bin Hacı Ali’den bi’l-muvacehe ber nehc-i şer’i alenen lede’t-tezkiye adl ve makbulu’ş-şehade idukleri işar ve ihbar olunan müteveffa-yi mezbûr ile verese-i mezbûrunu arifan olan mezkûr Likoz karyesinden Kasımoğlu Şakir bin Kasım ile Civelekoğlu Kemal Efendi ibn Hacı Hurşid nâm kimesnelerin kezalik bi’l-muvacehe ber nehc-i şer’i tafsil-i mezkûr üzere şahadetleriyle isbat itmegin müddeî mütevelli-i mezbûr İsmail istizharen bade’t-tahlifi’ş şer’i mucebince müddeaya onbir buçuk aded Osmanlı lirasını vazıu’l-yed olduğunu babası murisi müteveffa-yi mezbûrun tereke-i vafiyesinden müddeî mütevelli-i mezbûr İsmail’e eda ve teslime müvekkil-i mezbûr Emin Efendi’ye izafetle vekîl-i musahhar muma ileyh Abdulhamid Efendi’ye tenbih olunduğu tescîl ve i’lâm olundu. Fi’l-yevmi’s-samin ve’l-ışrin min şehr-i Rebii’l-ahir li sene ihdâ selâsîne ve selâsemie ve elf. Mukabele olmuştur.

Devamı bir sonraki Makalededir.