5. 1509 NO’LU RİZE ŞER’İYYE SİCİLİ’NİN TRANSKRİPSİYONU Bismillahirrahmanirrahim Aded 1: Hamalyoz Lazistan Sancağı’nın merkezi olan Rize kazası kurâsından Hamalyoz karyesinden Azaklıoğlu Muharrem Efendi ibn Hacı Ali meclis-i şer’-i şerif-i enverde dava vekîllerinden Abdulhamid Efendi ibn Abdulkerim mahzarında takrir-i kelâm ve tabir-i ani’l-merâm idub karye-i merkûmeden Yakuboğlu Hüseyin bin Ahmed ile beynimizde mütehaddis alacak davasından dolayı mezbûr Hüseyin ile aid olduğu mehâkimin her derecesinde müddeî ve müddeâ aleyh sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâya ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile muma ileyh Abdulhamid Efendi’yi vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam
itmegin ma vekaa bi’t-taleb ketb olundu. Fi’l-yevmi’l-hadi aşer min Muharremi’l-haram li seneti ihdâ selâsîne ve selâsemie ve elf. Mukabele olunmuştur. Baş kâtib, nâib. Muhzır Sadık Efendi, Tüfenkçizâde Mehmed Efendi. Aded 2: Emineddin Lazistan Sancağı’nın merkezi olan Rize kazası mahallâtından Emineddin mahallesinden Sarı Ahmedoğlu Hüseyin Kaptan bin Hurşid Kaptan meclis-i şer’-i şerif-i enverde takrir-i kelâm ve tabir-i ani’l-merâm idub aleyhime ikame edilen ve edilecek olan her nevi deâvîden dolayı icab edenlerle aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis ve itirazu’l-ğayr sıfatlarıyla bidayeten ve iâdeten ve itirazen ve istinafen ve temyizen muhâkeme ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâ ve hacz vaz’ u fekkine ve tefrik u taksime ve isbat-ı verâset iddiasına ve sulh ve ibraya ve benim her hakkımı icab edenlerden taleb ve dava ve ahz u kabz ile makbuzatını bana i’tâ ve teslime ve’l-hâsıl aleyhime tahaddüs eden ve idecek olan her nevi dava ve munazaatta salahiyet-i meşrua ve kanuniye dairesinde icra-i muhâkeme ve muameleye ve mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile dava vekîllerinden Mustafa Efendi ibn İzzet Efendi ile Trabzon’da dava vekîllerinden Ordulu Hüseyin Avni Efendi ibn Ali’yi gerek münferiden ve gerek müctemian icra-i vekâlete mezun olarak kabullerine mevkûfen vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’t-tâsi’ min Saferi’l-hayr li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Muhzır Sadık Efendi, Tatoğlu Osman Efendi. Aded 3: Liparit Lazistan Sancağı’nın merkezi olan Rize kazası kurâsından zatı zeyl-i vesikada muharreru’l-esâmî müslimîn tarifleriyle muarrefe olan Liparit karyesinden Kakavanoğlu müteveffa Hasan Ağa’nın zevcesi zatı zeyl-i vesikada muharreru’l-esâmî müslimîn tarifleriyle muarrefe olan Zülfiye bint Osman meclis-i şer’-i şerif-i enverde takrir-i kelâm ve tabir-i ani’l-merâm idub Jandarma Süvari Yüzbaşılığından mutekaid zevcim müteveffa muma ileyh Hasan Ağa’dan muhassas şehrî yüzyirmialtı kuruş tekaud maaşı icab eden devâir ve memuriyetden taleb ve ahz u kabz ve makbuzatını bana i’tâ ve teslime ve imzalarıyla istid’â ve lâyıha tanzîm ve takdîm ve tahtîme ve mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile gerek münferiden ve gerek müctemian icra-i vekâlete mezun olmak üzere Liparit karyesinden Osman Habiboğlu Hasan bin Osman ile mahdum-i şakiri kabullerine mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’l-hadi aşer min Saferi’l-hayr li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Metooğlu Tahir Kaptan bin Mehmed, Osman Habiboğlu Ömer bin Osman. Aded 4: Kolyav Elhamdulillahillezi eazze havasse ibadihi bi sarfi emvalihim ila envai’l-hayrat ve e’ânehum ala iktisabi ez’âfi’l-mehamid ve’l-meberrat ve’s-salatü ve’s-selamü ala resulihi ve nebiyyihi Muhammedin hayri’l-beriyyat ve ala alihi ve ashabihi ila yevmin yestezıllu’l-meru tahte’s-sadakati emma ba’du işbu vakfiye-i celilu’ş şan ve ceride-i bediu’l-unvanın tamir ve inşasına bâis ve badî oldur ki Lazistan Sancağı’nın merkezi olan Rize kazası nevâhîsinden Kura-i Seba nahiyesinin Kolyav karyesinden sahibu’l-hayrat ve’l-hasenat Ekşioğlu ? ibn Hacı Battal meclis-i şer’-i şerif-i enverde Zikr-i âtî vakfına li ecli’t-tescîl mütevelli nasb u tayin eylediği Sürgünoğlu Hasan Efendi ibn Ahmed mahzarında ikrar-ı tam ve takrir-i kelâm idup ben etyab-i mal ve enfes-i menaldan ifraz ve kemal-i imtiyaz ile mümtaz eylediğim ikibin kuruşu hasbeten lillahi’l-ehad ve taleben li merdati rebbihi’s-samed vakf-ı sahih-i müebbed ve habs-i sarih-i muhalled ile vakf ve habs idub şöyle şart ve vakf eyledim meblağ-ı mevkuf-i mezkûr beher sene bâ yed-i mütevelli rehn-i kavi veya kefil-i melî ile irbah ve istirbah olunub senevî hasıl olan ğalle ve neması Kazançukur nâm mahalde vâki eshab-ı hayr taraflarından müceddeden bina ve inşa olunan mescid-i şerifin hitabet cihetine mutasarrıf olacak zata verile ve tevliyeti ben labis-i libas-i hayat oldukça bana ve bade’l-vefat evlad-ı evlad-ı zukûrumun ekber ve erşed ve aslahına ve bade’l-inkıraz karye-i merkume ahalilerinin re’y u intihabı ve re’y-i hâkimle içlerinden mutemed bir zata aid ola deyu meblağ-ı mevkuf-i mezkûri fariğen ani’ş-şevağil mütevelli-i mezbûr Hasan Efendi’ye teslim ol dahi tesellüm ve kabz vesair mütevellilerin evkafda tasarrufları gibi tasarruf eyledi dedikten sonra vâkıf-ı muma ileyh Hüseyin Efendi vakf-ı nukûd zımnında olan şurût ve kuyûd-i eimme-i selase indinde batıl olmağla vakf-ı mezbûrdan rucu eylediğimden meblağ-ı mezkûri bana red ve teslime mezbûr Hasan Efendi’ye tenbih olunmak matlubumdur deyu dava ve lede’s-sual mütevelli-i mezbûr Hasan Efendi dahi cevabında fi’l-hakika vakf-ı nukûd zımnında olan şurût ve kuyûd-i eimme-i selase indinde batıl ise de İmam Züfer’den İmam Ensari rivayeti üzere sahih ve caiz olduğundan meblağ-ı mezkûru red ve teslimden imtina ederim deyu her biri müterâfian fasl ve hisseme taliban olduklarından âlimen bi’l-hilafi’l-cari beyne’l-eimmeti’l-eslaf vakf-ı mezbûrun kavl-i müfta bih üzere evvelen sıhhatine bade’l-hükm vâkıf-ı muma ileyh Hüseyin Efendi tekrar bast-ı mukeddemata rucu ile her ne kadar nukûd-i mezbûrenin vakfiyeti hükm-i hâkimle sahih olduysa da İmam-ı Azam hazretleri indinde sıhhatı mustelzem luzum olmamağla vakf-ı mezbûrdan tekrar rucu eyledim deyu davayı istirdad ettikde mütevelli-i mezbûr dahi İmam Ebu Yusuf hazretleri indinde vâkıf-ı mücerred vakaftu demekle ve İmam Muhammed hazretleri indinde teslim ilel mütevelli bulunmağla onların kavl-i şerif ve re’y-i münifleri üzere hükm olunmak matlubumdur dedikte vakf-ı mezbûrun luzumuna dahi bade’l-hükm vakf-ı mezbûr sahih ve lazım olub min ba’d nakz u ibtali mumteniu’l-ihtimal oldu. Fi’l-yevmi’s-sani min Saferi’l-hayr li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Sağıroğlu Mehmed bin Ömer, Ekşioğlu Mehmed bin Reşid, Sağıroğlu Hasan bin Mustafa, Ekşioğlu Dursun bin Bahadır, Sağıroğlu Hasan Efendi bin Mustafa, Ekşioğlu Ali bin Hacı Süleyman, Sağıroğlu Mustafa bin Ömer. Aded 5: Malpet Lazistan Sancağı’nın merkezi olan Rize kazası kurâsından Malpet karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Köseoğlu zevcesi Rukiye bint Ömer meclis-i şerif-i enverde karyeden Köseoğlu İbrahim bin Mehmed mahzarında takrir-i kelâm ve tabir-i ani’l-merâm idub sadriyye-i kebir kızı Emriye bint Memiş ile bundan akdem mezbûr İbrahim’in beyinlerinde zevciyet kaim iken kızım mezbûre vefat etmekle firaşından hasıl ve mezbûreden mütevellid sulbî sağir oğlu işbu hazır bi’l-meclis Mehmed bi hakki’l-hidâne hacr ve terbiyemde olmağla babası mezbûr İbrahim üzerine kadr-i marûf meblağı farz takdir olunmak matlubumdur deyu dava ol dahi cevabında müddeiye-i mezbûrenin ber vech-i muharrer müddeâsını taven ikrar ve itiraf idub lakin şehrî kırk kuruş nafaka itasından fazla i’tâya kudreti olmadığını dermiyanla müddeiye-i mezbûre dahi ol vechile razıye olmasıyla sağir-i mezbûr Mehmed’in nafaka ve kisve bahâ vesair levazım-ı zaruriyesi içun terazî-i tarafeynle mezbûr İbrahim üzerine işbu tarih-i vesikadan itibaren beher şehrî kırk kuruş farz u takdir olunub meblağ-ı mefruz-i mezkûri sağir-i mezbûrun nafaka ve kisve vesair levazım-ı zaruriyesine harc u sarfa ve lede’l-hâce istidaneye ve inde’z-zafer mezbûr İbrahim üzerine rucua mezbûre Rukiye’ye kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’t-tasi aşer min Muharremi’l-haram li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Öksüzoğlu Dursun bin Hacı Halid, ? Ahmedoğlu Sadık bin Ahmed. Aded 6: Hamza Zikr-i âtî hususun mahallinde ketb u tahrir içun canib-i şeriat-i ğarradan mezunen bil hükm irsal olunan mahkeme-i şer’iye baş kâtibi Osman Zeki Efendi bin Salih Efendi Lazistan Sancağı’nın merkezi olan Rize kasabasında hükümet konağı civarında İskele Polis İdaresi mevkiinde zeyl-i vesikada muharreru’l-esâmî müslimîn huzurlarında akd-ı meclis-i şer’i-alî ettikde mahalle-i mezkûrde sakine kezalik zeyl-i vesikada muharreru’l-esâmî müslimîn tarifleriyle muarrefe olan Kura-i Seba nahiyesinin Hamza karyesinden olub Asbet karyesinden Aynacıoğlu Sefer’in zevcesi olan Ekşioğlu kerimesi Gülşen bint Mehmed meclis-i makud-i mezkûrde Kolyav karyesinden Ekşioğlu Hüseyin Efendi ibn Hacı Battal Efendi mahzarında takrir-i kelâm ve tabir-i ani’l-merâm idub pederim müteveffa-yi mezbûrdan mevrus ve müntakil mezkûr Hamza karyesinden vâki mahallinde beyne’l-ahâlî ve’l-cîrân malûm ve müteârefu’l-hudud verese-i saire ile müştereken mutasarrıf olduğumuz bi’l-cümle emlak ve arazideki hisse-i irsîye ve şayiamı semen ve bedel-i misilleriyle talibine katiyen bey’ u ferağ ve temlik u teslim ve semen ve bedel-i misillerini ahz u kabz ile makbuzatını bana i’tâ ve teslime ve muamele-i sairesini memurin-i lazımesi huzurunda icrâ ve îfâya takririni i’tâya ve mûceb-i muhâkeme bir hal vukuunda icab edenlerle aid olduğu her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâ ve hacz vaz’ u fekkine ve tefrik u taksime ve lede’l-hâce isbat-ı verâset iddiasına ve sulh ve ibraya ve ber vech-i muharrer aheri tevkil ve azle ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile muma ileyh Hüseyin Efendi’yi vekîl ve naib-i menab nasb u tayin eyledim dedikte ol dahi ber vech-i muharrer vekâlet-i mezkûreyi kabul ve hizmet-i lazımesini kema yenbağî edaya taahhüd ve iltizam eyledi dediğini kâtib-i muma ileyh mahallinden ketb u tahrir ve mea mürsel umena-i şer’ile meclis-i şer’e gelub ala vukuihi inha ve takrir itmegin ma vekaa bi’t-taleb ketb olundu. Fi’l-yevmi’s-sâlise aşer min Saferi’l-hayr li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Mollayüzlüoğlu Mehmed Efendi, Aynacıoğlu Sefer ve Nuri bin Kerim, Aynacıoğlu Mustafa bin Yusuf. Aded 7: Salarha Atyanoz Lazistan Sancağı’nın merkezi olan Rize kazası kurâsından Fatla karyesinden Bayrakdaroğlu nâm-ı diğeri Alininoğlu Hüseyin bin Yusuf’un Zikr-i âtî dava ve ahz u kabza vekîl-i müseccel-i şer’isi Mustafa Efendi ibn İzzet Efendi meclis-i şer’i münîrde Salarha Atyanoz karyesinden Küçük Alioğlu Yunus bin Hüseyin muvacehesinde müvekkilim Hüseyin’in oğlu Muhyiddin ile müddeâ aleyh Yunus bundan akdem Rusya’nın Batum kasabasında müştereken bir bab kahvehane isticarla icra-i ticaret etmekte iken bir müddet sonra fesh-i şirket idub kahvehanenin gedik vesairesini mezbûr Yunus’a terk ve inde’l-muhasebe mezbûr Yunus’un mezbûr Muhyiddin’e doksan aded Ruble borcu kaldığı halde mezbûr Muhyiddin meblağ-ı mezbûru kable’l-ahz ve’l-istifa vefat etmekle verâseti babası müvekkilim mezbûr Hüseyin ile zevce-i menkuhe-i metrukesi Fatıma bint Mansur Efendi’ye munhasıra olduğundan mezkûr doksan rublenin rayici olan binyüzyirmibeş kuruşdan müvekkilim mezbûr Hüseyin’in irsîyesini bana ve zevce-i mezbûrenin hisse-i irsîyesinin de mezbûre Fatıma’ya eda ve teslime mezbûr Yunus’a tenbih olunmak hasbe’l-vekâle matlubumdur deyu dava ve lede’s-sual [mez]bur Yunus dahi cevabında müteveffa-yi mezbûr Muhyiddin ile ber vech-i muharrer müştereken kahvecilik etmek üzere kahvehane isticar eyledigini ve müteveffa-yi mezbûrun ber vech-i muharrer inhisar-ı verâsetini ikrar maada müddeî vekîl-i muma ileyh Mustafa Efendi’nin müddeâsını bade’l-inkar müddeî vekîli muma ileyh Mustafa Efendi’den beyyine taleb olunduk da irae eylediği şahidlerden Atyanoz karyesinden Terzioğlu Abidin Efendi ibn İlyas’ın dava-i vakıaya şahadet edememesine ve Fatla karyesinden Bayrakdaroğlu Yehuza bin Hasan’ın dava ? seksen rublesi hakkında ber nehc-i şer’i eda-i şahadet etmemesine karşı müddeâ aleyh mezbûr Yunus şahid-i mezbûr Yehuza yemin ettiği halde şahadetini kabul edeceğini dermiyan ve lede’s-sual şahid-i mezbûre yemine hazır olduğunu beyan etmekle ber muceb-i taleb şahid-i mezbûr Yehuza’ya teklif olunan yemini kabul ve icrâ etmesi üzerine mezbûr Yunus seksen ruble zimmetinde borcumdur deyu ikrar ve itiraf ve müddeî vekîli Mustafa Efendi dahi on ruble ziyade müddeâsından feragat ve sarf-ı nazar etmeleriyle mucebince mezbûr Yunus’un ikrarına binaen seksen rublenin rayici olan bin kuruştan yediyüzelli kuruşunu müvekkil-i mezbûr Hüseyin’e izafetle vekîl-i muma ileyh Mustafa Efendi’ye ve ikiyüzelli kuruşunu mezbûreye Fatıma’ya eda ve teslime mezbûr Yunus’a tenbih olunduğu tescîl ve i’lâm olundu. Fi’l-yevmi’s-sadis min Zi’l-hicceti’ş-şerife li sene selâsîne ve selasemie ve elf. Aded 8: Bayburd kazasının Hazavrik karyesi Zikr-i âtî hususun mahallinden ketb u tahrir içun canib-i şeriat-i ğarradan mezunen bi’l-hükm irsal olunan mahkeme-i şer’iye ikinci kâtibi Hafız Rahmi Efendi bin Hafız Mahmud Efendi Lazistan Sancağı’nın merkezi olan Rize kasabası mahallâtından Babik mahallesinden vâki Hacı Mahmudzâde Emin Efendi’nin menzilinde müste’ciren sakine Bayburd kazasının Hazavrik karyesinden Hacı Şabanoğlu kerimesi Gülçehre bint Halil Ağa’nın menziline varıb zeyl-i vesikada muharreru’l-esâmî müslimîn huzurlarında akd-i meclis-i şer’-i âli ettikde menzil-i mezkûrde sakine kezalik zeyl-i vesikada muharreru’l-esâmî müslimîn tarifleriyle muarrefe olan mezbûre Gülçehre meclis-i makud-i mezkûrde zevci kaza-i mezkûrun Kürze-i(?) Süfla karyesinden Tabib Kol Ağalığı’ndan mutekaid Abdulmuttaliboğlu Abdulhalim Efendi ibn İsmail Durmuş Efendi mahzarında takrir-i kelâm ve tabir-i ani’l-merâm idub ondört seneden beru muma ileyh Abdulhalim Efendi’nin zevce-i menkuhe-i medhul-i bihâsı olduğum halde bir müddetten beru zevcim muma ileyh benimle firaşından hasıla ve benden mütevellide ve halen bi hakki’l-hidâne sulbîye-i sağire kızları kızlarım Sıdıka ve Şefika ve Naciye ve Pakize ve Zübeyde’yi mesken-i şer’î tedarikiyle infak ve iksâ etmemekte olduğundan mesken-i şer’î tedarik ve tehiyyesine değin benimle sağirat-i mezbûrât içun zevcim muma ileyh üzerine kadr-i marûf meblağı farz u takdir olunmak matlubumdur deyu dava ve lede’s-sual ol dahi cevabında müddeiye-i mezbûre ber vech-i muharrer zevce-i menkuhesi olduğu ve sağirat-ı mezbûrât firaşından hasıla sulbîye-i sağire kızları idügini taven ikrar ancak bana muhassas olan beşyüzotuz kuruş tekaud maaşım düyunatıma mukabil terk idulub mezkûr Bayburd kasabasında kâin peder ve validemin menziline gidip orada iaşelerini temin ederim binaen aleyh nafaka itasına kudretim yokdur dedikde hakikat mezbûrenin takrir-i meşruhi üzere olduğu ve Zikr-i âtî meblağ dahi kadr-i marûf idugi zatı müslimin mezbûr atın ala vechi’ş şehade işar ve ihbarlarıyla lede’ş-şer’il enverde nümâyân olmağın mucebince nafaka ve kisve bahâları vesair levazım-ı zaruriyeler içun zevc-i muma ileyh Abdulhalim üzerine işbu tarih-i vesikadan itibaren beher şehrî beherine ellişer kuruştan altısına ceman şehrî üçyüz kuruş farz u takdir olunub meblağ-ı mefruz-i mezkûru nafaka ve kisve vesair levazım-ı zaruriyelerine harc u sarfa ve lede’l-hâce istidaneye ve inde’z-zafer zevc-i muma ileyh Abdulhalim Efendi üzerine rucua mezbûre Gülçehre’ye kıbel-i şer’iden izin verildigini kâtib-i muma ileyh mahallinden ve tahrir ve mea mürsel ümena-i şer’le meclis-i şer’e gelub ala vukuihi inha ve takrir itmegin ma vekaa bi taleb ketb olundu. Fi’l-yevmi’s-sadis min Saferi’l-hayr li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Kör Osmanoğlu Ruşen Efendi ibn Hacı Durmuş Efendi, Otçuoğlu Osman bin Hasan, Babik mahallesinden Hordoloşoğlu Hafız Mustafa Efendi. Aded 9: Haldoz Lazistan Sancağı’nın merkezi olan Rize kasabası mahallâtından Haldoz mahallesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Taviloğlu kerimesi Hediye bint Hacı Osman meclis-i şer’-i şerif-i enverde takrir-i kelâm ve tabir-i ani’l-merâm idub halen zevc-i dahilim olan Kankalanoz mahallesinden Kotiloğlu nâm-ı diğeri Timür Alioğlu Mahmud bin Hacı Recep bundan akdem benimle firaşından hasıla ve benden mütevellide hâlâ bi hakki’l-hidâne hacr ve terbiyemde olan sulbîye-i sağire kızları kızlarım Kamile ve Maksude’yi bila nafaka vela munfek-i şer’i terk idub müddet-i sefer-i baid olan Dersaadet’e azimet ettikten sonra cins-i nafakadan bir nesne irsal etmediği gibi kimesne tarafından dahi havale eylemediğinden benimle sağiretan-i mezbûretan içun zevcim gaib-i mezbûr üzerine kadr-i marûf meblağı farz u takdir olunmak matlubumdur dedikte hakikat-i hal mezbûre Hediye’nin takrir-i meşruhi üzere olduğu mezkûr Haldoz mahallesi imam ve muhtar ve heyet-i ihtiyariyesi tarafından mevrud ilmuhaberden müstebân ve Zikr-i âtî meblağ dahi kadr-i marûf idugi zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olmağın mezbûre bade’t-tahlîf mucebince nafaka ve kisve bahâ vesair levazım-ı zaruriyesi içun zevci gaib-i mezbûr üzerine işbu tarih-i vesikadan itibaren sağiretan-i mezbûr etana beher şehrî yetmişbeş kuruştan yüzelli ve mezbûre Hediye’ye dahi yüzelli ki ceman üçyüz kuruş farz u takdir olunub meblağ-ı mefruz-i mezkûru nafaka ve kisve vesair levazım-ı zaruriyelerine huruc[harc] ve sarfa ve lede’l-hâce istidaneye ve inde’z-zafer zevc-i mezbûr Mehmed üzerine rucua mezbûre Hediye’ye kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’t-tasi ve’l-ışrin min Zi’l-hicceti’ş-şerife li sene selâsîne ve selasemie ve elf. Mukabele olunmuştur. Baş kâtib, nâib. Hacı İbrahimzâde Hafız Rauf ibn Hacı Osman Efendi, Hacı Alioğlu Halim ibn Ahmed. Aded 10: Kolyav karyesinden Ekşioğlu Hüseyin Efendi’ye. Kazançukur dinmekle marûf nâm mahallinde kâin mescid-i şerifin hitabet cihetinde uhdenize tevcihine dair iktiza eden i’lâm ve mazbatası fi 23 Kanun-i sani sene tarihiyle muarrahe ve 5112 numara ile murakkam olduğu halde evkaf-ı nezaret-i celilesine takdîm kılındığı lede’l-havale evrak memurluğundan ba derkenar beyan edilmiş olmağla gerekdir ki berat-ı şerif-i âlîşânın şeref vuruduna değin ikame-i salât-ı cuma ve ideyn olmak üzere kıbel-i şer’iden izin ve ruhsatı hâvî işbu murasele i’tâ kılındı. Fi 20 Safer sene 331 ve fi 14 Kanun-i Sani sene 328. Baş kâtib, nâib. Aded 11: Kozandinoz ve Mirekaloz Lazistan Sancağı’nın merkezi olan Rize kazası kurâsından Kozandinoz karyesi sakinelerinden zatı zeyl-i vesikada muharreru’l-esâmî müslimîn tarifleriyle muarrefe olan Sarıoğlu kerimesi Hatice bint Osman meclis-i şer’-i şerif-i enverde takrir-i kelâm ve tabir-i ani’l-merâm idub Mirekaloz karyesinden zevc-i dahilim olan Malazoğlu İsmail bin Abdülkadir bundan akdem benimle firaşından hasıla ve benden mütevellide ve halen bi hakki’l-hidâne hacr ve terbiyemde olan sulbîye-i sağire kızı kızım Hamdiye’yi bila nafaka ve munfek-i şer’i terk idub müddet-i sefer-i baid olan Dersaadet’e gittikten sonra cins-i nafakadan bir nesne irsal etmediği gibi kimesne tarafından dahi havale eylemediğinden zevcim gaib-i mezbûr üzerine kadr-i marûf meblağı farz u takdir olunmak matlubumdur dedikte hakikat-i hal mezbûre Hatice’nin takrir-i meşruhi üzere olduğu karye-i merkume muhtar ve muhtar-ı sanisi ilmuhaberlerinden müstebân ve zikr-i âtî meblağ dahi kadr-i marûf idugi zeyl-i vesika[da] muharreru’l-esâmî müslimîn ihbarlarıyla lede’ş şeri’l enver zâhir ve nümâyân olmağın mezbûre bade’t-tahlîf mucebince nafaka ve kisve bahâ vesair levazım-ı zaruriyeleri içun zevci gaib-i mezbûr üzerine işbu tarih-i vesikadan itibaren beherine şehrî otuz beş kuruşdan ikisine ceman yetmiş beş kuruş farz u takdir olunub meblağ-ı mefruz-i mezkûri nafaka ve kisve vesair levazım-ı zaruriyelerine harc u sarfa ve lede’l-hâce istidaneye ve inde’z-zafer zevc-i gaib-i mezbûr üzerine rucua mezbûre Hatice’ye kıbel-i şer’iden izin verilmegin ma vekaa bi’t-taleb ketb olundu. Fi’l-yevmi’s-sadis min Muharremi’l-haram li sene ihdâ selâsîne ve selâsemie ve elf. Mukabele olunmuştur. Baş kâtib, nâib. ? İsmail bin Halid, Abdullahoğlu Hüseyin bin Ahmed, Kahvecioğlu Temel bin Osman. Aded 12: Ğodri Lazistan Sancağı’nın merkezi olan Rize kazası kurâsından Ğodri karyesi sakinelerinden marifetu’z-zat Hatice bint Mehmed meclis-i şer’i münîrde karyeden Kürt Alioğlu Ali bin Mikdad muvacehesinde bir seneden beru mezbûr Ali’nin zevce-i menkuhe-i medhul-i bihâsı isem de zevcim merkum beni mesken-i şer’îsinde infak ve iksâ etmekte olduğundan üzerine kadr-i marûf nafaka takdirini taleb ederim deyu dava ve lede’s-sual ol dahi cevabında müddeiye-i mezbûre ber vech-i muharrer zevce-i menkuhe-i medhul-i bihâsı olduğunu ikrar lakin benim mesken-i şer’îm olduğu gibi nafakası da mevcud bulunduğundan mesken-i şer’îme gelerek itaat ve inkıyad etmesini taleb ederim dedikte mezbûre tekrar cevabında mesken-i şer’îyesi var ise de bana ayrı bir hane tedarik etsun deyu mesken-i şer’îsi olduğunu mukırre ve muterefe olmağın mucebince müddeiye-i mezbûre mesken-i şer’îsi olduğu mukırre ve muterefe olduğu halde ayrı hane tedarik etsun deyu ikame eylediği ber vech-i muharrer davası meşrua ve iltifata şayan olmadığı kendisine bade’t-tefhim dava-i mezkûresi ile mezbûr Ali’ye bi vechi şer’i muarazadan men olunduğu tescîl ve i’lâm olundu. Fi’l-yevmi’s-samin ve’l-ışrin min Muharremi’l-haram li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Aded 13: Canpolat Lazistan Sancağı’nın merkezi olan Rize kazası kurâsından Canpolat karyesinden Ballıoğlu Zelkifl bin Ali meclis-i şer’i enverde takrir-i kelâm ve tabir-i ani’l-merâm idub karye-i merkûmeden Velikaoğlu Osman bin Kamil tarafından aleyhime ikame olunan sirkat davasından dolayı mezbûr ile aid olduğu mehâkim-i cezaiyenin her derecesinde müddeî ve müddeâ aleyh ve müştekî ve müştekâ aleyh sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i icrâ ve’l-hâsıl hukuku şahsiye ve kanuniyemi muhafaza ve müdafaya ve mütevakkıf olduğu umûrun küllîsine tarafımdan vekâlet-i mutlak-ı sahiha-i şer’iye ile dava vekîllerinden Hafız Hulusi Efendi ibn Salih Efendi’yi kabulune mevkûfe vekîl ve naib-i menab nasb u tayin eyledim dedikte ma vekaa bi’t-taleb ketb olundu ? Saferi’l-hayr li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Burusalıoğlu Tevfik Reis, Muhzır İbrahim Efendi. Aded 14: Filandoz Lazistan Sancağı’nın merkezi olan Rize kazası kurâsından Filandoz karyesinden iken bundan iki sene mukaddem vefat eden Hacı Tataroğlu Sabit bin müteveffa Mustafa bin Ahmed’in sulbî sağir oğlu Şükrü ile sulbîye sağire kızı Saniye’nin pederleri müteveffa-yi mezbûrdan mevrus mallarını hıfz ve umurlarına tesviye ve ru’yete kıbel-i şer’iden ber vechi nasbı ehem ve elzem olmağın emanet ile marûfe ve istikamet ile mevsûfe olub her vechiyle vesâyet uhdesinden gelmeğe kadire idügi karye-i merkume imam ve muhtar ve ihtiyar azaları tarafından mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enver zâhir ve nümâyân olan işbu baisetu’l-vesika valideleri Kadife bint İzzet sağiran-i mezbûranın pederleri mutevveffay-i mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’l-hamis ve’l-ışrin min Rebii’l-ahir li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Salihoğlu İbrahim bin Ahmed, Şahinoğlu Cafer bin Ahmed, Hacınınoğlu Ömer bin Hasan. Aded 15: Asbet Lazistan Sancağı’nın merkezi olan Rize kazası kurâsından Asbet karyesi sakinelerinden marifetu’z-zat Meryem bint Ömer meclis-i şer’i münîrde Ğodri karyesinden Çolakoğlu Cemal bin Receb muvacehesinde iki seneden beri altıyüz kuruş mehr-i müeccel tesmiyesi ile mezbûr Cemal’in zevce-i menkuhe-i medhul-i bihâsı isemde zevcim mezbûr Cemal mesken-i şer’îsinde beni infak ve iksâ etmemekte olduğundan üzerine kadr-i marûf meblağ farz u takdir olunmak matlubumdur deyu dava ve lede’s-sual ol dahi cevabında mezbûr Meryem ber vech-i muharrer zevce-i menkuhe-i medhul-i bihâsı olduğunu ikrar lakin zevcem mezbûre mesken-i şer’îme gelub itaat ve inkiyad etmesinin kendisine tenbih olunmasını taleb ve bi’s-sual müddeiye-i mezbûre tekrar cevabında mesken-i şer’îsi olub itaat ve inkiyad etmek üzere mesken-i şer’îsine gideceğini ikrar ve taahhüd itmegin mucebince müddeiye-i mezbûre Meryem ber vech-i muharrer ifade eylediği dava-i mezkûresiyle zevci müddeâ aleyh Cemal bi vechi şer’i muarazaden men’ olunduğu tescîl ve i’lâm olundu. Fi’l-yevmi’r-râbi min Saferi’l-hayr li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Aded 16: Ğotoz Lazistan Sancağı’nın merkezi olan Rize kazası kurâsından Ğotoz karyesi ahalisinden iken bundan akdem vefat eden Kanbozoğlu Ali bin Hacı Temel’in sulbîye-i sağire kızları Gülşah ve Ezber’in pederleri müteveffa-yi mezbûrdan mevrus mallarını hıfz ve umurlarını ru’yet ve tesviyeye bir vasi nasbı ehem ve elzem olmağın emanet ile marûf ve istikamet ile mevsûf olub her vecihle vesâyet uhdesinden gelmeğe kadir idugi karye-i merkume imam ve muhtar ve heyeti ihtiyariyesinden mevrud ilmuhaberden müstebân ve zeyl-i vesikada muharreru’l-esâmî müslimîn ihbarlarıyla lede’ş-şer’il enverde zâhir ve nümâyân olan işbu baisu’l-vesika liebeveyn ammileri Şakir bin mezbûr Hacı Temel sağiretan-i mezbûretanın pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete vasî ve üzerine valideleri Havva bint İsmail Nazır nasb u tayin olunduklarında onlar dahi ber vech-i muharrer vesâyet ve nezaret-i mezkûreleri kabul ve hizmet-i lazımesini kema yenbağî edaya taahhüd ve iltizam itmelerin ma vekaa bi’t-taleb ketb olundu. Fi’l-yevmi’s-sâlis ve’l-ışrin min şehr-i Ramazani’l-mübarek li sene selâsîne ve selasemie ve elf. Mukabele olunmuştur. Baş kâtib, nâib. Ofluoğlu Şakir bin Mahmud, Kanbozoğlu Hasan Efendi ibn Hacı Hüseyin. Aded 17: Salarha İveroz Lazistan Sancağı’nın merkezi olan Rize kazası kurâsından Salarha İveroz karyesinden Civelekoğulları Hacı Sabit Efendi ve İbrahim Efendi benan-i Tahir Efendi meclis-i şer’-i şerif-i enverde her biri takrir-i kelâm ve tabir-i ani’l-meram idub Maraşoğlu Mustafa bin Ali ve Maraşoğlu Yahya bin Bayram ile beynimizde mütehaddis hakk-ı saky ve mesil ve mecra ve zarar ziyan ve tecavüz-i hudud davalarından mezbûranlara aid olduğu mehâkimin her derecesinde müddeî ve müddeâ aleyh ve müştekî ve müştekâ aleyh ve şahs-ı sâlis sıfatlarıyla bidayeten ve iâdeten ve itirazen ve istinafen ve temyizen muhâkeme ve muhâsama ve mucâvebeye ve ikame-i şuhûd ve tahlîf ve teblîğ ve tebellüğa ve imzasıyla istid’â ve lâyıha tanzîm ve takdîmine ve taleb-i keşf ve mümeyyiz ve hâkim ve ehl-i vukuf tayin ve azline ve taleb-i icrâya ve tefrik u taksime ve’l-hâsıl mütevakkıf olduğu umûrun küllîsine tarafımdan vekâlet-i mutlaka-i sahiha-i şer’iye ile dava vekîllerinden Hafız Hulusi Efendi’yi ? naib-i menab nasb u tayin eyledim dedikte ma vekaa bi’t-taleb ketb olundu. Fi’l-yevmi’s-sâlis ve’l-ışrin min Saferi’l-hayr li sene ? Mukabele olunmuştur. Baş kâtib, nâib. Muhzır İbrahim Efendi, Tatzâde Osman Efendi. Aded 18: Kale mahallesi Lazistan Sancağı’nın merkezi olan Rize kasabası mahallâtından Kale mahallesi ahalisinden iken bundan bir sene mukaddem vefat eden Hacı İsmailoğlu Ahmed bin Mustafa bin Abdullah’ın verâseti zevce-i menkûhe-i metrukesi Zeliha bint Hacı Ali ile anası Hafize bint Hacı Ahmed ve sulbîye-i sağire kızı Hüsniye ve li ebeveyn erkarındaşı Mehmed ve li ebeveyn kız karındaşları Fatıma, Ümmügül ve Hamdiye benun-i mezbûr Mustafa’ya munhasıra olduğu bi’l-ihbar lede’ş-şer’il enver zâhir ve nümâyân olduktan sonra müteveffa-yi mezbûr Ahmed’in Hacı Bilalzâde Edhem Efendi ibn Hacı Mahmud Efendi nezdinde eşya bedeli ve nakd-ı mevcudi olub muma ileyh tarafından teslim edilen akçenin beynel verese tevzi ve taksimini mubeyyen defter-i kassamdır. Fi’l-yevmi’s-samine aşer min Muharremi’l-haram li sene ihdâ selâsîne ve selâsemie ve elf. yekunu’l mal_______________________________________________8315-35-8 minha’l-ihracat mehr-i zevce-i mezbûre Zeliha’nın mehr-i müecceli olub fi 3 sene tarihli işbu mahkeme-i şer’iyeden muta i’lâm mucebince mezbûreye i’tâ olunan________________________________________________________1620 resmî kısmet________________________________________________165 kaydıyye___________________________________________________20 pul ve varaka baha____________________________________________14 yekunu’l-ihracat_____________________________________________1819 sahhu’l-baki li’t-taksimi beyne’l-verese ___________________________6496-40-8 hisse-i zevce-i mezbûre Zeliha__________________________________799-23 hisse-i bintu’l-mezbûre sağire Hüsniye___________________________3198-15 hisse-i ümmü’l-mezbûre Hafize_________________________________1066-5 hisse-i ehu’l-mezbûr Mehmed___________________________________533 hisse-i uhtu’l-mezbûre Fatıma___________________________________266 hisse-i uhtu’l-mezbûre Ümmügül________________________________266 hissei-i uhtu’l-mezbûre Hamdiye________________________________266 sîm mecîdi yirmi kuruş hesabıyla vechi meşruhi üzere müteveffa-yi mezbûr Ahmed’in ğayr-i ez masraf terekesi esmanından zevce-i mezbûre Zeliha’nın mehr-i müecceli olan binaltıyüzyirmi kuruşu zatı muarrefe olan mezbûre Zeliha’ya ba ilmuhaber teslim olunduğu gibi hisse-i irsîyesi olan yediyüzdoksandokuz kuruş yirmiüç para dahi kendisine i’tâ eylediği ve kezalik zatdan bi’l-muarrefe mezbûre Hafize ile mezbûrât Fatıma ve Ümmügül ve Hamdiye’ye ? binsekizyüzaltmışbeş kuruş yirmisekiz para ve mezbûr Mehmed’in beşyüzotuzüç kuruş iki para hisse-i irsîyeleri kezalik ba ilmuhaber yeden biyedin kendilerine i’tâ ve teslim olunub her biri ahz u kabz ve istifa-i hak eylediklerini bi’t-tav’ ve’r-rıza ikrar ve itiraf eyledikleri ve sağire mezbûre Hüsniye’nin hisse-i irsîyesi olan üçbinyüzdokansekiz kuruş onbeş para ? idare-i Eytâm müdürü Hafız Harun Efendi’ye teslim olunduğu müdir-i muma ileyhin tasdikine mukarin mahkeme-i şer’iye baş kâtibi Osman Zeki Efendi inha ve takrir itmegin mucebince ğıbbe’t-tasdiki’ş-şer’i ma vekaa bi’t-taleb ketb olundu. Fi’l-yevmi’t-tarihi’l-mezbûr. Mukabele olunmuştur. Baş kâtib, nâib. Aded 19: Pendoz mahallesi Lazistan Sancağı’nın merkezi olan Rize kasabası mahallâtından Pendoz mahallesinde sakine zatı zeyl-i vesikada muharreru’l-esâmî müslimîn tarifleriyle muarrefe olan Tenekeci müteveffa İbrahim Efendi’nin zevce-i metrukesi ve Yazıcıoğlu kerimesi Hatice bint Ahmed meclis-i şer’-i şerif-i enverde Eytâm müdürü Hafız Harun Efendi mahzarında takrir-i kelâm ve tabir-i ani’l-merâm idub sağir oğlum Mehmed’in malından lira-i Osmanî yüz kuruş hesabıyla müdir-i muma ileyhden istidane ve kabz ve umuruma sarfla istihlâk eylediğim binbeşyüz kuruş ile semeni işbu tarihten üç sene-i kamile müeccel olmak üzere yine eytâm-ı merkumun malından ve yine müdir-i muma ileyden iştira eylediğim bir cild Ali Efendi fetvası semeninden dörtyüzbeş kuruş ki ceman bindokuzyüzbeş kuruş zimmetimde vacibu’l-eda ve lazımu’l-kada deynim ve borcum olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbe’t-tasdik kefaletleri eytâm meclisince musaddak olan mahalleden Altıkayaoğlu Hacı Mustafa bin Hüseyin ile Romanoz-i İslâm mahallesinden Tatoğlu Osman Efendi bin Bayram ve Roş mahallesinden Sarı Ahmedoğlu Hakkı Efendi ibn Süleyman Efendi meclis-i makud-i mezkûrde müdir-i muma ileyh mahzarında her biri ikrar-ı tam ve takrir-i kelâm idub müddeiye-i mezbûre Hatice’nin ceman zimmetinde edası vacib olan bindokuzyüzbeş kuruş ile terk ve teberru eylediği meblağın edasına biz dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharın zımmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. Fi’l-yevmi’r-râbi ve’l-ışrin min şehr-i Rebii’l-ahir li sene selâsîne ve selasemie ve elf. Mukabele olunmuştur. Baş kâtib, nâib. Muhzır Sadık Efendi, Satıroğlu Mehmed Efendi. Aded 20: Fatla Lazistan Sancağı’nın merkezi olan Rize kazası kurâsından Fatla karyesinden iken bundan iki sene mukaddem vefat eden ? sulbî sağir oğulları Abdulhamid ? pederleri ? tesviye ve ru’yet ? ilmuhaberden müstebân ve zeyl-i vesikada muharreru’l-esâmî müslimîn tarifleriyle muarrefe olan lede’ş-şer’il enver zâhir ve nümâyân olan işbu baisetu’l-vesika marifetu’z-zat valideleri Hüsniye bint Mansur ve sağirun-i mezbûrunun pederleri müteveffa-yi mezbûrdan mevrus mallarını hıfz ve vakt-i rüşd-i sedadlarına değin umurlarını tesviye ve ru’yete kıbel-i şer’iden vasi nasb u tayin olundukta ol dahi ber vech-i muharrer vesâyet-i mezkûreyi kabul ve hizmet-i lazımesini kema yenbağî edaya taahhüd ve iltizam itmegin ma vekaa bi’t-taleb ketb olundu. Fi’l-yevmi’l-hamis min Muharremi’l-haram li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Terzi Hüseyinoğlu Hacı Hüseyin bin Ahmed, Kaputoğlu Ahmed Efendi. Aded 21: Babik mahallesi Lazistan Sancağı’nın merkezi olan Rize kasabası mahallâtından Babik mahallesi[-nden] sakinlerinden Atina redif taburu mülazım-ı evvelliginden mutekaid Trabzon’un Kasım Ağa mahalleli Hanım Ağazâde Ahmed Efendi ibn Haşim Efendi meclis-i şer’-i şerif-i enverde Eytâm müdürü Hafız Harun Efendi mahzarında takrir-i kelâm ve tabir-i ani’l-merâm idub Tenekeci müteveffa İbrahim Efendi’nin sağir oğlu Mehmed’in malından lira-i Osmanî yüz kuruş hesabıyla beşyüzelli ve İmamoğlu müteveffa Arif Reis’in eytâmı Mehmed ve Sabire ve Cemile ve Ayşe’nin mallarından kezalik lira-i Osmanî yüz kuruş hesabıyla ikiyüzotuz kuruş ve müteveffa Terzi İsmailoğlu eytâmı Veysel ve Ümmiye ve Fatıma’nın mallarından sîm mecîdiye yirmi kuruş hesabıyla yüz ve Öksüzoğlu müteveffa Habib’in eytâmı Mustafa’nın malından yüzotuz kuruş ki ceman binon kuruş müdir-i muma ileyh yedinden ahz u kabz ve umuruma sarfla istihlâk idub meblağ-ı mecmu-i mezkûr ile yine eytâm-ı mezbûrun mallarından işbu tarihten bir sene-i kamile müeccel olmak üzere müdir-i muma ileyhten iştira eylediğim bir cild Ali Efendi fetvası semeninden doksanbir kuruş ki ceman binyüzbir kuruş zimmetinde edası vacib ve lazım olub murur edecek eyyam içun lazım gelen meblağ ile mesarif-i saireyi dahi terk ve teberru eyledim dedikte ğıbbe’t-tasdik kefaletleri eytâm meclisince musaddak olan esnaftan Sağıroğlu Şaban Efendi ibn Memiş ile Köroğlu aşçı Recep Usta ibn Osman ve Müftü mahalleli Şeyhoğlu Ahmed Reis bin Ali meclis-i makud-i mezkûrde müdir-i muma ileyh mahzarında her biri ikrar-ı tam ve takrir-i kelâm idub medyun-i muma ileyh Ahmed Efendi’nin ceman zimmetinde edası vacib olan binyüzbir kuruş ile terk ve teberru eylediği meblağın edasına biz dahi tarafından bi’l-emr ve’l-kabul kefalet-i mutlaka-i sahiha-i şer’iye ile kefil bi’l-mal ve zamin olub tarafeynden her birimiz aharın zimmetine lazım gelen meblağa dahi başka başka kefil bi’l-mal ve zaminiz dediklerinde ma vekaa bi’t-taleb ketb olundu. ? li sene ihdâ selâsîne ve selâsemie ve elf. Mukabele olunmuştur. Baş kâtib, nâib. Satıroğlu Mehmed Efendi, Ayvazoğlu Osman Efendi. Aded 22: Peşeyan mahallesi Lazistan Sancağı’nın merkezi olan Rize kasabası mahallâtından Peşeyan mahallesinden Hacı Genç Ağazâde Hakkı Efendi ibn Hacı Hafız Ali Efendi meclis-i şer’-i şerif-i enverde Eytâm müdürü Hafız Harun Efendi mahzarında takrir-i kelâm ve tabir-i ani’l-merâm idub Tenekeci müteveffa İbrahim Efendi’nin sağir oğlu Mehmed’in malından lira-i Osmanî yüz kuruş hesabıyla müdir-i muma ileyhden istidane ve kabz ve umuruma sarfla istihlâk eylediğim altıyüzkırkaltı kuruş ile semeni işbu tarihten bir sene-i kamile müeccel olmak üzere yine sağir-i mezbûrun malından ve müdir-i muma ileyhden iştira eylediğim bir cild fetevay-i Ali Efendi semeninden ellidokuz kuruş ki ceman yediyüzbeş kuruş zimmetimde vacibu’l-eda ve lazımu’l-kada deynim ve borcum olub murur edecek eyyam güzeştesiyle mesarif-i saireyi dahi terk ve teberru eyledim dedikte ğıbbe’t-tasdik kefaletleri eytâm meclisince musaddak olan mahalleden Türütoğlu Hasan Efendi ibn Hacı Mehmed Ağa ile Hasan Efendioğlu Hafız Hulusi Efendi ibn Salih Efendi ve Keşişoğlu Pancu Efendi ibn Nikol tekrar meclis-i makud-i mezkûrde müdir-i muma ileyh mahzarında her biri ikrar-ı tam ve takrir-i kelâm idub medyun-i muma ileyh Hakkı Efendi’nin ceman zimmetinde edası vacib olan yediyüzbeş kuruş ile terk ve teberru eylediği ....
Devamı bir sonraki makalededir |
